蛋糕課程-第三堂_凍&熱疏乎里

今堂Miss教嘅係蜜糖凍疏乎里&芒果熱疏乎里兩款

芒果熱疏乎里疏乎里焗好啦,睇吓升得幾高

我哋一人可以有兩杯食,因為唔可以帶走,要即刻食哂,食完後都覺幾滯

另外一款凍蜜糖凍疏乎里,可以帶番屋企,慢慢嘆

簡單午餐-消淡涼拌喬麥麵

唔知係咪昨晚同老公去食泰國菜食滯咗,今日覺得飽飽滯滯,無乜胃口,所以晏晝整咗個簡單嘅涼拌喬麥麵食就算.

淨係得紅蘿蔔,青瓜加少少芝麻沙律汁

又再Encore蒸包

又再蒸包原因好簡單,因為明日無早餐,加埋上禮拜啲餡有剩,今次包好餡後記得醒發,所以包皮比上次鬆軟好多,不過包面始終比較黃,可能梘水落多咗,同堆蒸包火力唔夠猛,不過算啦,反正都係自己食,健康就OK.

桂花豆沙包,我下次會唔落桂花,因為覺得味道有啲怪.唔係同豆沙好夾.

椰菜肉包

滋潤止咳嘅龍利葉,南北杏,羅漢果水

呢排進入秋天,天氣開始乾燥,喉嚨有啲痛和乾`嘅感覺,所以今朝起身即刻攞番之前自家種已經曬乾咗龍利葉浸軟身,因為我屋企有天台,而老公又鐘意種野,咁就最好種啲實用食得嘅植物,好過種花啦.

將浸軟身嘅龍利葉,南北杏,沙參,玉竹&羅漢果一齊慢火煲一粒鐘,就可以飲,非常簡單,唔加廋肉或豬展煲湯嘅原因,係因為我老公唔鐘意飲豬肉湯,佢嫌肥膩.

前面個兜就係曬乾嘅龍利葉&羅漢果,後面係沙參,玉竹,&南北杏

倒哂落去煲...一粒鐘,就飲得LU.

樣衰嘅日本棉花蛋糕

今朝上完烹飪堂之後,求其係街市買咗小小餸就趕番屋企整日本棉花蛋糕,其實好想整呢個蛋糕好耐,但又唔想食咁多蛋糕,卒之搵到藉口,明日約咗老媽子見面,可以拎去俾佢食.

點知真係一波三折,首先溶咗牛油,落完麵粉攪勻,唔記得落奶,就直接落蛋黃,越攪越黏,再睇Notes&蔡師奶Video,先至知無落奶,雖然後加番,但麵粉已經同油&蛋汁混合成一團,努力用奶開稀後都有粒粒,又唔捨得全部唔要,唯有過篩,粉漿勉強比較滑身,唔理3721都焗咗佢至算,蛋糕一路升起,但焗完後發覺糕面裂開,好似火山爆發咁,仲有放涼後,竟然有一盤(大啲)糕心唔熟,因為懶無用竹簽插入去檢查,死死地氣再攞番入焗爐再焗,最後全部都食得,蛋糕好鬆軟同有蛋香味,又唔係好甜,因為我減咗糖,我會再做多次,但爐火要再較低啲,約150度,時間亦都要長啲,可能30分鐘.

幾樣衰嘅蛋糕面

好彩切開後食落都算OK

烹飪課程-第三課(葡國雞&黃薑飯)

今日又去上烹飪課程,教嘅係葡國雞&黃薑飯,Miss專登去印度商店買印度米嚟煮飯,我間中都有煮葡國雞,但Miss用咗隻水牛牛油起鑊爆香香料同乾蔥,就非常香,最後仲加埋新鮮椰絲鋪面入焗爐焗香,味道就更加VERY正.

炆近已經香噴噴嘅葡國雞

灑上新鮮椰絲再焗至金黃色,就更加好味,祗係可惜汁少咗啲,撈飯食一流

呢個就係蒸好嘅黃薑飯,飯粒係長形成條狀,入口係散收收,加埋豆寇,丁香,小茴,桂皮,黃薑粉等香料去煮,同我哋平時食嘅飯唔同,我自己就唔多慣.

食包包食飽

過咗忙碌嘅昨日,今日都唔俾自己停,因為上個禮拜上堂整嘅麵包已經食哂,課程又完咗,所以開始自己做包先有早餐,因為我嘅早餐淨係鐘意食麵包,如果唔係就要買,但係自從學識做麵包後,已經儘量唔食出面嘅麵包,因為知道落咗好多化學添加劑和人造色素.

好耐都未整個中式蒸包啦,因為發麵種都幾煩複,要早最少2-3日開始,今日蒸咗兩款包,但唔知係咪唔記得醒發,所以包皮唔夠鬆軟,食完後再要試整過至得.

有咸同甜包:圓形無扭紋係桂花紅豆沙餡,有扭紋係椰菜豬肉餡

朋友生日飯食越南菜

有好朋友呢個月生日,上網睇Openrice介紹,終於決定去位於帝苑酒店內嘅Le Solieil食晚飯,因為佢哋做近Promotion,印Openrice嘅贈卷,有八折(4個人或以上),兼夾今個月生日嘅客人有生日蛋糕送.

因為朋友遲咗放工,所以一坐低好肚餓,就將枱面嘅炸蝦片全部食哂,仲想Encore添,以下係我們揀咗嘅菜式:

首先登場係越南海鮮薄餅,表皮好薄同脆,裡面有香濃嘅芝士芽菜,蝦粒等等.

跟住係鮮蝦酸湯,有番茄,波羅 同香芧,味道酸酸甜甜,好開胃,幾好飲.

再來就係香芧牛肉生菜包,牛肉好嫰滑,用生菜包埋墊底嘅米粉,酸紅蘿蔔絲,好清新唔覺肥膩.

呢碟係叫做炒越南龍豆,經理介紹話係越南來嘅疏菜,味道非常清爽帶有甜味,類似天葵嘅食法,係意外驚喜咁好食.

當然要食啲飯頂肚,呢個鬆郁濛就係椰盅海鮮焗飯,個汁好香,有金不換葉落咗

亦都多料,由於侍應攞咗個椰盅去分飯,所以影唔到.

最後生日蛋糕出場啦,應該都有一磅蛋糕,現場仲有鋼琴&小提琴合奏生日歌,氣氛好溫馨!

回程係尖東海徬影過對面曚曚查嘅香港夜景,作為今晚完美嘅結束.

忙碌嘅一日

昨日一早起身未刷牙洗面已經衝入廚房煲浸過夜嘅紅豆,準備陣間要炒紅豆沙,因為我想今日蒸豆沙包,當做哂朝早指定動作約10:30左右,紅豆已經稔身就開始大製作(自己話),到咗大概11:30已經大功告成,立刻又係雪櫃攞咗冷飯,叉燒&雞蛋出來炒飯,因為趕完要下晝學蛋糕.

Miss應同學要求,提早教整焗南瓜芝士蛋糕應節,不過焗完出來,唔覺有芝士味,可能因為用咗Mascapone芝士,所以味道唔係好濃,但蛋糕就好鬆軟.

蛋糕面比較燶,因為已經落堂,蛋糕仍然未熟,Miss心急開猛火焗

今次一人有3塊帶番屋企食

一落堂就急急腳番屋企梳洗換衫,然後搭車出尖東,因為有朋友生日,約咗出來食飯慶祝,結果食完飯番到屋企已經10:30PM,抖一陣本來準備瞓覺,但心思思拆開朋友送嘅智慧珠遊戲拼盤試吓玩,阿SO都有係電視介紹過,話可以訓練IQ,因為我無乜,點知一玩已經到凌晨,唯有收埋上床瞓,結果今朝非常唔想起身,覺得好攰,終於都掙扎起床,然後出去跑步.真係玩物喪志,下次都係要自律好啲.咁就過咗唔知忙乜嘅一日啦.

又嚟一煲過蒸飯

今日晏晝繼續蒸飯,不過係黑白糯米飯,因為之前包稯剩下啲黑白糯米放係冰格, 所以攞出嚟解凍食咗佢.

首先切碎已浸過嘅蝦米,江瑤柱(已撕成絲)&冬菇,鋪係米面,怕惺可以加羗絲,放係已煲熱滾水嘅電飯煲裡面蒸,中途翻動一下,如有需要可以加些水,之後淥菜,咁又攪掂一餐,我無落油同鹽,因為蝦米,江瑤柱已有醎味,所以都算幾健康嘅一餐.

鋪好材料係米面,準備水滾蒸飯

眨眼就蒸好食得飯啦

一煲過嘅簡易午餐

今日預咗唔出街,所以之前已經買咗免治牛肉放在冰格,今朝攞番出來解凍,首先係煮飯前一個鐘頭,將半嘜米(量米膠杯)用一個不銹鋼兜浸水僅僅過米多少少,加幾滴油,咁飯就唔會咁黏身. 因為免治牛肉會有汁,所以米唔好加到平時煲飯嘅水份. 我通常一個人會蒸飯,因為可以唔駛煲咁多飯,而飯少又會黏埋底.好麻煩

然後學阿SO咁用些少豉油,糖,胡椒粉將免治牛肉醃一陣,利用此空檔時間切碎羗,蔥同埋已浸過嘅陳皮,跟住放入豆粉,&麻油牛肉裡面,然後分數次加水,不停攪拌,直至感覺牛肉輕身,再加回切碎羗,蔥,陳皮,放入雪櫃一陣,約半個鐘左右.

跟住倒水入電飯煲內,開掣煲沸水再將個兜已浸水嘅米放係煲裡蒸大概25-30分鐘,要視乎米受水情形決定,我係中途將米翻轉2次,等米平均受水,當飯熟時,可以將牛肉平均放上飯面,再蒸多約10分鐘,攞起兜飯,加少少煲仔飯豉油,將菜放落飯煲熱水中淥熟,就食得啦,而且唔駛洗咁多碗碟.

其實我覺得免治牛肉餅真係可朔性好高,可以加青豆,黍米,紅蘿蔔,窩蛋,老少咸宜,簡單易做,所以我好多時都會買定擺係冰格,以備不時之需.

用電飯煲蒸飯熱水淥菜

本來想加窩蛋,但係見牛肉餅好多,差唔多同飯一樣厚度,所以無加.

曲奇餅製作課程

好多人都話整曲奇餅係唔駛學,因為做法簡單,我因為總覺得雖然簡單,總會有啲竅妙之處,係睇書或且跟網友食譜未必會寫得咁清楚,見到一堂可以學5種唔同款嘅曲奇,於是上星期走去報名.

今朝長途跋涉出尖沙咀上堂,成班竟然有24人之多,真係人頭湧湧,見阿Sir同埋助手都幾忙,因為短短3個鐘要做5款,有啲仲要事先做定雪藏或且等餅皮風乾,上完後都覺得幾值得,因為真係要一路上堂阿Sir一路講至知,譬如烘焗時間,溫度控制,乜野材料可以加減都好重要,會影響到製成品,甚至切或搓嘅形狀都會唔同食法.

每款都有5塊左右帶走,都算大豐收,食後我自己嘅評價係:

第一名:綠茶芝麻曲奇-夠鬆化,芝麻味又香,會考慮自己整

第二名:柚子蜜曲奇-柚子蜜味道幾濃郁,如果切成塊狀可能會無咁實

第三名:芝士曲奇-芝士味唔多夠,又唔鬆化,如果日後自己做,可能要加重料.

第四名:法式杏仁馬卡龍-超甜,若果有糖尿病千祈唔好食,而且風乾時間長,焗餅溫度非常重要,好容易失敗,要有耐性慢慢烘同睇火,阿Sir有一盤餅底唔夠乾都失敗咗,不過唔係我杯茶,未必會整.

第五名:羗餅人曲奇-應該係純粹用來裝飾,因為餅乾死死實實,完全唔好食,阿Sir叫我哋自己番屋企開蛋白糖漿唧圖案,我都懶得做.

烹飪課程-第二課(雞絲紙米卷&三色千層糕)

其實今日教嘅兩樣食物,我自己係屋企都有整,祇不過材料份量有些出入,做法都好容易.

已經蒸好共有9層嘅三色千層糕

切開之後嘅糕,層次分明,但因為未夠凍,所以切落黏刀,同埋食落比較淋

將雞絲,紅蘿蔔絲,青瓜絲,花生碎,九層塔等等,用醬汁撈勻,準備包入紙米卷內

包好咗個樣,但我無切開影相,即包即食,味道幾清新,可以當夏天午餐或沙津食