曲奇餅製作課程

好多人都話整曲奇餅係唔駛學,因為做法簡單,我因為總覺得雖然簡單,總會有啲竅妙之處,係睇書或且跟網友食譜未必會寫得咁清楚,見到一堂可以學5種唔同款嘅曲奇,於是上星期走去報名.

今朝長途跋涉出尖沙咀上堂,成班竟然有24人之多,真係人頭湧湧,見阿Sir同埋助手都幾忙,因為短短3個鐘要做5款,有啲仲要事先做定雪藏或且等餅皮風乾,上完後都覺得幾值得,因為真係要一路上堂阿Sir一路講至知,譬如烘焗時間,溫度控制,乜野材料可以加減都好重要,會影響到製成品,甚至切或搓嘅形狀都會唔同食法.

每款都有5塊左右帶走,都算大豐收,食後我自己嘅評價係:

第一名:綠茶芝麻曲奇-夠鬆化,芝麻味又香,會考慮自己整

第二名:柚子蜜曲奇-柚子蜜味道幾濃郁,如果切成塊狀可能會無咁實

第三名:芝士曲奇-芝士味唔多夠,又唔鬆化,如果日後自己做,可能要加重料.

第四名:法式杏仁馬卡龍-超甜,若果有糖尿病千祈唔好食,而且風乾時間長,焗餅溫度非常重要,好容易失敗,要有耐性慢慢烘同睇火,阿Sir有一盤餅底唔夠乾都失敗咗,不過唔係我杯茶,未必會整.

第五名:羗餅人曲奇-應該係純粹用來裝飾,因為餅乾死死實實,完全唔好食,阿Sir叫我哋自己番屋企開蛋白糖漿唧圖案,我都懶得做.