終於完成心願-焗咗蜂蜜蛋糕

我好鍾意食台灣蜂蜜蛋糕,自己好想試吓焗,但見到好多網友都話唔容易成功,加上木框價錢都幾貴,上禮拜終於忍唔住買咗,又去書局買堆白紙,今日開工啦,真係戰戰兢兢呀!

好啦!首先鋪好白紙係木框內

跟住攞哂所需材料出來,都有好多種,右上角個盒攞錯咗,應該係奶唔係忌廉,我係跟妃娟嘅食譜(一半份量),因為個框係8吋X8吋

再請埋我嘅幫手(坐檯打蛋機)出來,就順序將蛋,糖,SP,打起先,跟住落麵粉,奶,已加熱嘅龍眼蜜,味霖,最後要盤一面轉一面落溫熱嘅牛油&菜油,用慢速再打一陣就可以將麵糊倒入已鋪紙木框

再將摺咗幾層白紙墊底,就可以將麵糊放入去焗,由於我個焗爐無得分開較上下火,所以祗好先開面火190度焗到糕面上色,再將木框放落低層,調低溫度至130度焗多50分鐘,就可以出爐啦.

撕開四邊紙,倒扣攤凍,好彩無下陷

攤凍後就切開入面同試食,睇吓裡面組織都好粗糙,唔得細密,蜜糖味唔夠濃,偏甜,今次叫做總算成功,但仍有待改進,我自己話都有70分