中式蛋黃蓮蓉包

今日雖然好忙碌要準備聖誕大餐，但仍然抽空蒸咗蛋黃蓮蓉包，因為之前學人炒蓮蓉，攪到舊蓮蓉餡又硬又起哂砂，差啲要餵垃圾桶，但唔訓氣第二日再攞番佢出來，加水慢慢再將佢煮開，最後加埋粟粉打獻，估唔到竟然可以起死回生，攤凍後雪到今日都仲非常軟熟同滑溜。

講番呢個蒸包，首先將中筋粉加糖，依士，梳打粉，少量菜油同奶水攪勻，搓至光滑，成為麵團，再靜至少半個鐘以上。

等待麵團發酵時，將蓮蓉餡包入半隻蛋黃（已用燒酒蒸熟）

發酵後分割麵團，搓成圓形，拍扁成中間厚側邊薄嘅麵皮，包入蛋黃蓮蓉餡，收口向下，包紙墊底，放入蒸籠作最後發酵，坐在鑊中暖水約２０分鐘。

跟住開爐火（猛火）蒸約１０分鐘，再熄火焗１０分鐘，就可以將包攞出攤凍食。

蒸完之後變咗蓮蓉大包，右下角嗰個包，我用麻油掃面加蔥，捲成饅頭。

切開後試食，包皮幾煙ＵＮ，發得唔錯，餡唔太甜適中，仍然好軟滑，都叫做有番啲安慰。