蝦餃餡有出過水嘅荀粒,剝殼索乾水蝦仁同埋蛋白
將蝦仁切粒加鹽,胡椒粉搓至起膠,再加入荀粒,麻油&蛋白攪勻,放入雪櫃雪凍待用.
將滾水撞入澄麵粉&生粉中,焗一陣,再將餘下嘅生粉倒入其中,加冷水搓勻成軟滑粉團,再搓成數條圓長形狀,切約10g重一粒,用已搽上油嘅拍皮刀(兩邊刀鋒都未開嘅刀,係上海街有得買),壓薄成圓形粉皮,睇吓我初期壓到幾肉酸,又厚薄唔均勻.
跟住中期就比較似樣.
到咗後期就漸入佳境,睇吓已經好圓,同埋厚薄均勻.
包好就可以蒸啦,正宗摺法應該要有8摺,但以我啲3腳貓功夫梗係無啦,形狀更加參差不齊.
第一籠因為唔記得時間,蒸耐咗,啲皮淋哂
第二籠記得蒸5分鐘就夠啦,當堂無咁樣衰,似番啲樣
攤凍後仍然好通透,至於食味就無酒樓嗰啲咁多汁,因為我無落肥豬肉粒,我寧願揀無咁好食,好過唔健康囉.
坦白講拍皮同包餡真係難度幾高,需要多多練習先會包得靚.
最後個盤成係似模似樣哩! 好厲害呀!
回覆刪除[版主回覆12/30/2008 21:03:00]多謝讚賞!
我唔識整蝦餃皮架!
回覆刪除但係你講起用未開封既拍皮刀整出蝦餃皮，令我諗起我學整菠蘿包既時候，師傅整個皮既做法，簡直係令人驚嘆，真係要功多藝熟架! 努力啊!
[版主回覆12/31/2008 08:37:00]多謝鼓勵!
好厲害...蝦餃都識整!
回覆刪除[版主回覆12/31/2008 13:52:00]其實你睇唔到真正嘅一面,包得好肉酸,仲要多加練習先見得人.
嘩!! 好勁呀~ 真係好勁呀, 蝦餃妳都識整呀~
回覆刪除搓皮同整皮, 妳寫就好似好容易咁.,.....但係咪好難呢??
我睇見妳啲餡又多, 真係皮薄餡靚~
[版主回覆12/31/2008 19:10:00]梗係唔勁啦!三腳貓功夫,上堂學過3個鐘,就番屋企自己憑記憶重做,雖然有食譜派,但阿Sir改到飛起,都唔知自己寫啲乜?唯有靠估無辛苦咁試吓整囉.
嘩 ! 蝦餃 ? 好難整個播 !
回覆刪除[版主回覆01/01/2009 22:36:00]少少難啦,要買拍皮刀,又要多練習,功多藝熟,咁就得架啦
睇見都好想食, 請問澄麵粉&生粉份量比例可以講下嗎?
回覆刪除用拍皮刀個皮真係薄D喎
回覆刪除[版主回覆06/15/2009 08:22:00]係呀,不過要識用把刀至得,因為壓落去後要旋轉一圈先會變成圓形架.