午餐@Freshness Burger

今日去荃灣幫朋友買"金桶"牛油,順便去二記買麵包粉,買完後本來想去新村街個間"家樂"冰室試下食晏晝,點知11點半已經人頭湧湧,要等位,裡面地方又細,於是漫無目的行咗去千色店附近,見到有一間"Freshness Burger",唸起係Openrice口碑都唔錯,於是入去order咗個set,但唔似麥記要排隊攞包,收銀員俾一個坐枱號碼你,入去自己揀個位坐低,會有人送埋來,時間都係5-6分鐘到.

地方都幾清靜,一邊有排矮嘅灌木,有音樂播放同電視睇,坐位都好寬落

打開包入面共有四層,上面係一層厚切蕃茄,跟住中間有碎肉醬&芝士,下面係漢堡扒,食落好多汁,扒都好鬆化,不過我唔鍾意生嘅洋蔥粒,我食完有時會嘔.

飲品係柚子茶,無乜特別,但要另加$5,認真唔抵

呢個係沙律焗薯皮,有蕃茄,青瓜,菠蘿粒,雖然無另一款芝士,煙肉薯皮咁香口,但就比較健康啲

呢個餐都唔平,要成$51,試吓無妨,但唔會再Encore囉

最後呢一堆就係我今日大出血換番來嘅大堆頭,包括有日本高筋麵粉,兩種預拌粉,椰絲,戚風&貝殼模,黑白朱古力,金桶牛油,香葉kaya醬,泰國棘醬,卷蛋蛋糕膠殼,呢兩日買咗咁多野,有排用,我唸近期都唔會再買野住,除咗麵粉類.