麵包材料有日本高筋粉,沖繩黑糖粉係去沖繩旅行時買嘅,白色個兜係冷飯湯種,琴晚食完飯後再加熱水煮爛米飯,攤凍後放入雪櫃,今朝攤番出來解凍.乾藍莓就用Rum酒浸一晚,等佢濕潤同有香味,黑麥汁今朝係超級市場順手買呢試吓,已經加咗糖,有甜味可以當飲品,有啲似飲啤酒感覺.
由於冷飲湯種太濕同黏手,所以今次用麵包機,等攪拌完準備發酵時先加埋浸過酒嘅藍莓落麵團.
睇吓焗完後,麵包嘅內部組織都幾好,非常軟熟,不過應該要再落少啲糖,雖然我已經減咗糖,但我唔記得乾藍莓本身已經甜,所以焗出來麵包甜咗啲.
根據上次經驗,冷飯湯種做出來嘅麵包,比較其他方法做嘅麵包濕潤&軟熟,2-3日後仍然可以保持軟熟,唔會咁快老化,唯一係要用水煮爛米飯,比較麻煩.
