雙色方包

我見係日本麵包網站,登咗呢個雙色包食譜,見都幾好,況且我又未整過雙色包,所以今日試吓焗.

首先用綠茶粉&紅蘿蔔汁分別搓咗兩舊粉團,原著係用菠菜葉攪爛搾汁,我嫌麻煩,所以改咗用綠茶粉.

同平常一樣,經過第1&2次發酵,放氣後,將麵團各分成3份,再搓成長條形

相間地放入麵包模中作最後發酵

發到8-9成滿,就可以放入焗爐焗

呢兩個就係焗完之後嘅側&正面

原本係相同份量麵粉,但發完後唔知點解紅蘿蔔個邊比較多,而綠茶個邊好似無咁發,應該係格仔樣,但而家變成唔知乜樣,但幸好食落都好軟熟無乜差別,祗係形狀唔得靚仔.

手痕又買書

今朝去街市買餸,經過書店,就行入去睇吓,見到所有烹飪書籍全部八折,以我意志力咁薄弱嘅人,梗係出事啦,結果....又買咗以下呢3本書,基本上海綿蛋糕我已經識焗,不過好奇睇吓書點寫,至於冰淇淋就留番出年夏天先試囉,做餅乾就對我非常有用,因為到而家我仲未掌握得好.