芝麻合桃香蕉包

早幾日見到醒目媽咪自創香蕉合桃包咁吸引,又話好好食,一於試吓跟佢整番一個嚟食.

今次因為即興,所以祗係用直接法,我選擇將香蕉連麵粉一齊搓勻,但低估香蕉含水量,結果成個麵團打完好黏手,造型時比較困難,要不停加手粉,做咗個3辮包,摺好放係模內,而面頭就灑上芝麻.

呢個就係焗好嘅樣.

甩模後.

攤涼後切開睇吓點先? 都發得唔錯喎.

食一片先,唔....好香合桃味,但香蕉味唔夠,可能因為祗落一隻蕉嘅原故,但都好鬆軟,幾好食喎.醒目媽咪無介紹錯.

中式香蔥花捲

明日奄尖大少開始放聖誕假,為咗以防佢突然話要食饅頭,趁今日有時間就整咗先,不過次次都係整饅頭,會好悶架,所以就試吓跟食譜書整花捲.

其實都好似整饅頭咁,搓好麵團,不過今次聽咗醒目媽咪意見,唔再攪兩次發酵方法,一搓完麵團,等5分鐘就用棍碌麵團成長方形,再灑上少少鹽,胡椒粉,掃一層油,將蔥粒(要俾少少油撈一撈,以乃蔥出水)鋪上麵團,輕輕按壓一下.

將1/3麵皮向內摺,再將另外1/3覆蓋係面,接口要黏緊.

將麵團用刀切成約2.5cm闊度.

將兩塊麵團上下相疊,再用竹籤由中間壓至底部.

等幾分鐘後,將麵團底部摺疊,再慢慢拉長.

用竹籤擺在拉長麵團中間扭兩扭,而尾端則黏實盤好在底部,成為一個圓形.

放係蒸籠中發酵約20分鐘,就可以開火蒸嘞,開頭一,兩個造型麻麻,唔係咁掂,所以肉酸D.

蒸好後,個樣都算OK,唔知係咪新鮮熱辣蒸好,食落好鬆軟喎,希望奄尖大少唔好又嫌3嫌4就好咯,不過下次我唔會落胡椒粉,反而想用麻油掃麵團,應該會香好多,

我與Tiramisu的相遇

回想係好多年前,偶然行過商場,見到一間新開餅店,行入去見到啲餅幾特別,所以胡亂買咗兩件唔同味道番屋企食,點知一食之下,發現其中一件芝士好香滑,好好食,自此之後,連自己生日都指定要奄尖大少買一個俾我,因此亦去查清楚呢個蛋糕嘅正式名稱,原來叫做"Tiramisu"-意大利芝士蛋糕,之後呢間餅店係唔同商場開咗分店,我總會入去買件"Tiramisu"食,不過後來因為健康問題,唔再食嚕...,但自從去學整蛋糕之後,我好想自己親手整番一次俾自己食.

終於下定決心買咗"Mascarpone"芝士,開工大吉,首先焗兩塊手指餅蛋糕片.

用保鮮紙包好慕士圈底部.

放入一塊比慕士圈細,已經搽上咖啡酒液蛋糕片.

倒入一半已混合好雞蛋,淡忌廉加Mascarpone芝士糊.

再放上另一塊蛋糕片,輕輕壓入芝士漿內.

再將剩餘芝士漿倒入平頂,放入雪櫃雪硬身,至少3個鐘或以上.

我將佢雪咗一晚,灑上無糖可可粉,胡亂做些少裝飾就算嘞,食落好軟滑,但已經忘記以前嘅味道,所以無從比較,但現在一定唔會自己一個人食哂囉,我會分甘同味,食一塊已經了卻心願就算嘞...

女性養生液???

呢個名稱係從"生物精華萃取機"食譜搵到,主要材料包括有山藥(即係淮山),蘋果,木瓜,啱啱朋友送咗一枝有機淮山俾我,屋企又有其餘兩樣生果,即管試吓好唔好飲?

將山藥刮去表皮,洗淨,蘋果去核,一開四件(唔駛批皮),木瓜刮肉,加一茶匙蜜糖,少少凍滾水,一齊放係攪拌杯中.

按"自動"掣,攪打一分鐘,已經打成蓉.

由於我加多咗蘋果,木瓜,所以好杰,倒出嚟好似食近生果糊仔,但幾好味,份量有兩水杯咁多,由於擺得耐,氧化會變色,營養成份會消失,所以祗好自己飲哂佢,甜甜地有木瓜味,唔錯架,其實我都唔係太介意佢功效係咪好,但至少我飲咗兩樣生果落肚,唔駛慢慢食,已經有益健康啦,係咪?

頸巾作禮物

呢排天氣轉冷,剛巧經過冷鋪,見到勁粗嘅冷繩,最適合用嚟織頸巾,而且又快到聖誕新年,於是一口氣買咗四舊唔同顏色嘅粗冷,每日祗需要抽出3-4個鐘,好快就織好哂,趕及可以作禮物送俾朋友,物輕情意重,希望收到嘅人會喜歡啦.

中西式包一齊做

今朝原本祗係諗住焗麵包,點知奄尖大少突然話想食饅頭,難得佢主動話鍾意我整嘅野,考慮一陣,應承整饅頭,所以我變咗同一時間要整兩種中西式包,都有些少擔心,兼顧唔到不同發酵方法和時間,不過唔理咁多,開工至算嘞.

首先西式包係做伯爵奶茶方包,主要係用呢兩種有佛手柑味茶葉同埋茶包,將奶加熱沖入茶葉中,焗一陣,壓出濃奶茶同麵團材料一齊搓勻,而茶包剪開倒出茶葉碎同麵團混合.

仍然用低溫中種法,不過天氣寒冷,所以要將麵團放入盛有暖水嘅鑊裡面發酵,最後將空氣壓出後,將麵團捲成圓柱體放入麵包模內作最後發酵至8-9成滿,就放入焗爐焗. 焗好一打開爐門,就聞到好香佛手柑茶葉味.

攤凍切片,望吓都發得唔錯,食落就非常有茶葉味,如果鍾意飲呢隻茶嘅人,一定會鍾意呢款包,我就係其中一個嘞..

至於中式饅頭,我用兩次發酵方法,即係70%麵粉,酵母,水搓勻發酵兩個鐘先,然後將剩低30%粉,糖,少許油加入一齊搓至光滑,靜置約5分鐘後就可以用擀麵棍來回壓出氣泡,鋪上芝麻餡同預先煮淋隔去水份紅豆,呢個係應奄尖大少要求咁做.

捲實成圓柱體,切成等份,放入蒸籠作最後發酵.

蒸完後,因為紅豆太多,令到中間有空隙,所以中間位置鬆開,唔得緊密,表面仍然有豆皮,呢部份除非用壓麵機或改用泡打粉代替酵母,先可以改善到.奄尖大少話好食喎,至緊要佢滿意就得啦.

總刮嚟講,同時整兩樣包都叫做OK.

再試新機-芝麻杏仁茶

天氣繼續寒冷又天陰,唔想出街,於是又攞部機出嚟試打芝麻杏仁茶.

我將芝麻炒過,杏仁焗過,等香味可以多啲.

將芝麻,杏仁,300cc滾水,少少冰糖粒放落攪拌杯中.

高速打完10秒,覺得仍然好粗粒,再打多約20秒,已經變成粉末狀,汁液比較濃稠.

開水籠頭,將汁液放出,隔去泡沫,咁就可以飲嚕....,但跟食譜杏仁份量,味道唔夠濃,所以再加多一倍杏仁打多一次,今次好味好多,咁凍天時飲,真係好正.

見到攪拌杯中杏仁粉末唔好浪費,於是將粉末倒落細煲中,加少少水,糖慢火煮滾,加粟粉煮成糊狀,成為杏仁糊食埋唔好哂,不過味道已經淡好多囉.

試新機-生物精華萃取機

兩日前係工展會買咗部昂貴嘅生物精華萃取機,當然要試機睇吓係咪好似做示範咁掂啦?

第一樣試嘅係蔬菜汁,包括有:西芹一條,青瓜,苦瓜(去核,括囊)一小段,用水沖洗後,再用凍滾水過一次.

然後將蔬菜,一茶匙蜜糖,200-300cc凍滾水放入攪拌杯中,鎖好杯蓋安全掣.

按"AUTO"掣,自動設定為打4秒,停2秒,連續5次,再不停打30秒,自動停機,有烏鳴聲提示,按熄"POWER OFF"開左手邊水掣,用杯盛住流出汁液飲用.

攪完出嚟大約有我相中嘅水杯一杯半,飲落蔬菜果然攪到好溶,完全感覺唔到係渣,祗係蔬菜蓉,甜甜地,成杯飲哂唔駛浪費,真勁!

第二樣試嘅叫五寶葯膳湯,藥材有北耆,人參鬚,麥冬,紅棗,南棗(可以唔駛去核),全部洗淨,用滾水浸泡一陣.

將隨機附送隔網插入攪拌杯中,將浸泡過藥材,少許冰糖,300cc熱滾水一齊放入杯中.

按"PULSE"高速掣10秒,放水掣,用杯盛出汁液飲用,但我想濃稠啲再打多20秒,結果太溶,太杰,抯住出口隔篩,汁液流唔到出嚟,祗好成杯倒出,自己用隔篩壓汁出嚟飲,份量加埋有兩水杯,味道就有葯材味,不過唔係太濃,少甜,都OK.

睇吓啲渣滓打到真係好溶爛,至於清洗都好方便,除咗基座外,全部都可以拆出來洗,用水沖乾淨就攪掂,至於隔網就要用牙刷刷去潛藏微粒.

總括而言,效果幾理想,若果有恆心,成日打汁,或藥材湯,杏仁糊之類,呢部機應該值得買.