牛年開爐-紅棗桂圓包

經過兩個禮拜忙碌,要大掃除,蒸糕,團年,拜年,開年,最後終於可以休息吓,今日(年初五)有時間再開爐,而且已經無麵包做早餐,為咗應節,所以焗咗呢個健康嘅紅棗桂圓包.

首先睇吓啲年花，雖然今日已經係年初五,但奄尖大少係年30晚買番來嘅花仍然開得好燦爛,但佢自己浸嘅水仙,因為天氣凍關係,就仍然未開花,祗係綠草如茵.

好嘞,講番麵包嘅材料,有隔日用Ruｍ洒浸過夜切碎嘅紅棗＆桂圓肉，我將一部份紅棗肉去衣壓成棗泥，仲有浸過紅棗桂圓水＋呢隻香棗片糖煮溶攤凍，另一碗係麥皮湯種。

經過第一次發酵，排氣，再發酵後，將麵團碌平成長方形，鋪上紅棗桂圓碎粒，再捲成長形，放入個半月形嘅模裡面作最後發酵至九成滿，就可以焗啦。

經過約２５分鐘左右，已經焗好出爐啦，睇落係咪好靚呢？其實。。。個包底焗燶咗，睇唔睇到條燶邊呀？因為我用另一個焗盤壓住麵包底個面焗（係焗爐焗時上下方向係掉轉，即係包面向上，見到車輪紋個面係下），開猛火焗，唔夠１５分鐘已變黑，即刻熄咗面火，較番細火再焗至熟。

焗好後攤凍，將包底片走，又變成靚樣ｌｕ。。切開試食後，好鬆軟，有啲紅棗香味，又唔甜，夠哂健康，唔。。。錯，幾好

牛年蒸糕,步步高升

每年新年我例牌都會蒸糕,一來自己蒸真材實料,二來希望能夠將呢啲傳統手藝繼續保留,今次蒸咗一底鹹二底甜糕.

鹹嘅係蘿蔔糕,材料雖然同往年一樣,但無論切同煮都有很大分別.因為我去學過蒸糕同埋參考其他網友嘅資料

1)蘿蔔切粗絲唔刨,話咁樣蘿蔔水份唔會流失咁多,會甜啲.

2)唔將粉漿倒入煮熟蘿蔔絲同配料中煮至半熟,改做熄火後先將粉漿倒入推勻.

3)粉漿中除咗粘米粉外,加入粟粉,生粉同澄麵粉,以往祗係將粘米粉加埋粟粉就算.

4)改用方型糕盤唔用圓型,切糕會容易啲.

呢盤就係已攪勻嘅蘿蔔糕生料,可以攞去蒸.

蒸咗45分鐘左右,就蒸好啦,係面灑上蔥粒同炒香芝麻,但奄尖大少唔鍾意芝麻係糕面,所以我淨係落埋一面.

無得抖,要繼續努力,批好馬蹄切租粒,煲桂花糖水,桂花係由奄尖大少親手種,再開粉漿,粉漿今次除咗馬蹄粉之外,仲加咗澄麵粉同吉士粉,.而糖就改用蒸年糕片糖,將馬蹄粒倒入糖水中,滾起後,將粉漿慢慢倒入,開慢火攪至半透明,就可以倒入糕盤中蒸約30分鐘.

好嘞,一氣呵成,最後蒸埋南瓜椰汁年糕就大功告成.

材料有蒸熟壓爛嘅南瓜蓉,糯米粉加澄麵粉,糖係用年糕片糖,Miss之前話會比較黏同好色水,煮溶糖水攤凍,加入椰汁,南瓜蓉,再倒落粉中攪勻後過篩2-3次,令粉質幼滑.

當粉漿涂涂流落盤中,就可以倒落糕模蒸約30分鐘至熟為止,呢兩條係其中之二,總共蒸咗3條同埋半底留番俾自己,其餘會係年三十晚送俾奶奶,大伯&叔仔,每人一條金鯉魚.啲顏色係咪好金黃呢?無落人造色素架.

呢啲就係我今日嘅製成品,由朝早9:30開始,到晏晝約2點左右就攪掂哂,包洗切,煮蒸都算快手啦.其中有一細兜馬蹄糕已俾我同奄尖大少試味食咗lu.,另外你睇吓蘿蔔糕亦俾佢趁熱挖咗一舊食,好彩今次佢都覺得唔錯.

此外我要介紹係呢個12人嘅大飯煲,每次蒸糕我都會用佢,點解?因為貪佢比鑊存氣,又唔駛成日加水,令到啲蒸汽溜走,溫度下降,一次可以擺得8吋寬x2吋高圓糕盤兩底,蒸起碼45分鐘都唔駛加水架,今日係咁先,明年再嚟蒸過.

Home make火腿蛋早餐

今朝起身,唸起雪櫃仲有一塊火腿,驚佢過期,於是決定整咗個豐富嘅火腿蛋麵包早餐,我係跟阿蘇嘅炒蛋方法,首先用叉將蛋黃攪散,再倒番落蛋白內加豉油,胡椒粉攪勻,不過唔好起泡,燒紅鑊,落少少油,將鑊中心晾勻,然後將蛋漿倒落,之後急炒,見差不多凝固,就熄火鏟起炒蛋,用鑊餘溫熨熱火腿加埋之前自家焗嘅心型麵包,就上檯食得,當然唔少得我至愛嘅奶茶,我用一個百爵茶包加一個Marks&Spencer Extra Storng茶包沖製而成.

咁樣炒蛋真係好滑,雖然好食,但都係間唔中食吓好啦,因為蛋黃嘅胆固醇好高(266mg,但人每日可以吸收祗係300mg)

 回想起以前要番工日子,早出晚歸,相比而家可以為自己做一個早餐,慢慢欣賞食物,個種感覺真係轍然不同.

一人冬菇牛肉煲仔飯

今日開始大掃除,但淨係洗廚房抽氣扇,已經洗到索哂氣,但仍然為自已整咗呢個煲仔飯做晏晝.

材料包括有醃咗嘅牛栁粒,冬菇絲,蔥粒,至於個煲仔從來未用過,唔記得邊個送?因為太細,所以都唔知攞來點用好?而家剛好可以用來煲飯

首先落半筒米,水剛過米面同落幾滴油.

開大火煲到見水滾起,見到差唔多收水,其實祗係3分鐘左右,就收細火,落冬菇絲,再平均鋪好牛肉粒,再煲多5分鐘熄火,落埋蔥粒再焗多5分鐘就食得.

加埋碟焯菜就可以開飯,係咪好簡單呢?前後都係用咗20分鐘,已經食到又好味同健康嘅晏晝. 不過無乜飯焦,因為焗時間短. 而家又有力氣繼續大掃除啦.

中日素食-第三課_嘻哈滿堂&四海昇平

因為臨近新年,所以今日學嘅中日素食,又係好意頭餸菜

呢一款就係嘻哈滿堂,其實即係沙律海鮮卷,不過係素食,所以用咗素蝦仁&芒果條,用威化紙包捲好,上脆漿,再黏上麵包糠炸好就食得,熱食時都幾好味,但Miss話想脆啲,脆漿做好後等四個鐘頭再做多一份脆漿加入原來個份,就會更脆口,可惜我唔太鍾意食炸野,怕油膩,應該唔會係屋企整,除咗即場有得食之外,仲一人可以帶兩舊走.

另外一個叫四海昇平,係湯羹嚟架,湯底用大荳芽菜,用少許油同薑汁,略炒芽菜一陣再放落滾水中滾約45分鐘,再加入已爆過嘅薯仔粒,煲淋薯仔後,最後落已經爆過嘅蕃茄粒,草菇粒同竹笙,臨食前落馬蹄粉同埋生粉水作獻,芫茜,麻油,調味等等,就食得,因為始終係素菜,味道比較清,但都幾好飲,而且多材料,所以都幾飽肚.

上完呢堂後要放完年假後先再會繼續上堂lu.

呢兩個氣球公仔同上面煮野食無關,祗係回程時,經過一個戶外臨時遊樂場,見到幾得意就影低佢,其實呢兩個公仔可以俾小朋友係入面當彈床跳,應該會幾好玩,可惜我無得玩.

慈母手中線,女兒身上衣

先知聲明呢件冷衫唔係我織嘅,係我娘親嘅傑作,其實佢都係編織高手,屋企子孫嘅冷衫都係由佢一手包辦,之前我發現呢包花冷買咗係度好耐,但又提唔起勁織,所以要求佢織俾我著,估唔到佢咁神速,2-3個禮拜已經織起,咁我新年就有新衫著嘞,下身襯裙或褲都得,雖然款式簡簡單單,但內裡已包含佢對子女嘅愛意,日後我亦可以作紀念之用.

烘焙日

今日差不多全日都係折磨個焗爐,唔俾佢停,用到佢夠本.死未!

今朝食完早餐,做完運動後,首先發咗個麵包中種,跟住將已回溫嘅忌廉芝士同溫熱牛奶,打成漿,再加牛油,最後將過篩麵粉/粟粉/蛋黃混合.

另再打起蛋白+糖至濕性狀態,同芝士粉漿快手撈勻,倒入模中,放入已裝有熱水嘅焗盤,就開始焗啦..,講咗咁耐,係整乜蛋糕? 之唔係焗日本芝士蛋糕囉.我都係第一次焗呢款蛋糕咋,都好驚唔得架.

經過約40分鐘左右就出爐,雖然大個底有啲裂痕,但相比前兩次焗日本棉花蛋糕已經算好啲,細個兜係我要來試味,大個兜係準備明日送俾我娘親嘅生日蛋糕.

甩模後,糕面掃上黃梅醬開嘅鏡面啫喱,睇吓個啲裂痕係冷卻後,竟然合番埋啲,無咁明顯lu..

切開蛋糕入面都好濕潤同鬆軟,至於味道...就同伊x家差唔多,其實我已經好開心有咁嘅製成品,唸番對上兩次日本海棉蛋糕,真係沮喪到對自己失哂信心呀.

好啦,食過好簡單嘅晏晝,又再開工,但焗爐就無得停,奄尖大少趁呢個空檔,攞咗有殼嘅夏威夷果仁,同松子仁,仲有公魚乾出來焗香,當零食,話咁先鬆脆喎,真係無佢咁好氣,而我呢就攞番今朝發個舊中種麵團出來,加入主麵團打至起薄膜,經過第一次發酵,排氣,第二次發酵後,用棍碾平麵團,放入呢啲白色葯丸,你估係乜呢? 係...我同網友買嘅芒果粒粒,第一次用,求其亂放,唔知變成點?

捲起麵團成條狀,放入呢個鐵筒(麵包模)裹面作最後發酵,約8成滿左右就將呢筒野放入焗爐焗.

180度火焗咗30分鐘,登登...出爐啦,係心形麵包嚟架.

切開後芒果粒粒已經變成啫喱糖咁,食落甜甜地,少少煙un,幾得意,麵包組織都OK.終於攪到4點幾先完,仲要洗埋用過啲工具,先至可以收檔同收爐,我唸如果唔鍾意烘焙嘅人,會覺得煩死,但我呢..就樂在其中囉!

第一百篇網誌-生日快樂

係咪覺得呢個標題有啲無喱頭呢? 其實今日係我生日,亦適逢寫到第99篇網誌,所以就寫咗呢一篇作為生日一啲感想同回顧過去,用作湊夠100篇.

首先要講吓生日願望,就係唔止生日先快樂,希望嚟近將來嘅日子日日都健康快樂,記得我18歲生日時,為咗記念自己大個女,同埋相差一個月嘅好同學,一齊開咗一個盛大嘅party,當時流行開party作為社交,請咗約20-30朋友&同學,當時真係好開心,亦好天真爛漫,唔知世途兇險,之後每逢生日又一定要有生日禮物或者去旅行慶祝,係多數情形許可下,至少生日當日都會請假,唔返工,覺得一年到晚,如果生日都要捱世界,好似好悽慘咁,但呢幾年,覺得生日同普通日子差唔多,祗係同死亡又行近一步而已,無乜特別期待或者好開心.

然而都仲收到好朋友同埋奄尖大少送嘅生日卡,前面個張有Hello Kitty就係佢昨晚送俾我,真係有啲意外,以佢咁古板,又唔浪漫(從拍拖到而家,祗係送過1001枝玫瑰花咁大把,好彩我鼻敏感,唔聞得花香味),竟然會揀張咁cutie嘅卡送俾我.

翻開內頁,竟然仲有立體生日蛋糕&hello kitty彈出來,都幾得意,本來佢問我想食乜野生日晚餐慶祝,但為咗唔想出去食咁多肥膩野,卒之決定今晚由佢親自下廚,買啲新鮮海鮮番來自己煮,又可以免舟車勞動之苦,人老真係越來越懶,

好啦,講咗咁多廢話,最後祝願所有人健康快樂,豐衣足食,世界和平.

甜品蛋糕技巧班-第三堂-Sacher朱古力餅

今日學整Sacher朱古力餅.

首先要焗個朱古力海綿蛋糕,再片成3片待用.

然後預備朱古力餡,坐溶牛油&朱古力,加淡忌廉攪至杰身.

然後一塊蛋糕片,一層朱古力餡相間,糕面同邊再抆朱古力漿至平滑,放入雪櫃雪至硬身.

將坐溶朱古力漿淋上雪凍糕面好似鏡一樣拎身.

唧上字型&圖案作裝飾就完成啦,鐘意食朱古力嘅人一定會覺得好正,因為朱古力味非常濃郁,但落好多牛油先至咁好味,都係偶然食吓好啦.

南瓜椰汁年糕

啱啱學完蒸年糕,所以迫不及待試吓蒸.

黃色個兜係將南瓜批皮切粒蒸熟壓爛成蓉,再同糖水/粉漿混合,另一兜係椰汁同糖水/粉漿混合.

倒一層南瓜粉漿落模,大火蒸3分鐘左右.

見糕面凝固後,再倒椰汁粉漿,如是者直至模有8-9成滿為止.

蒸好後攤凍就反轉,就係呢個樣,因為今次試蒸,祗係用咗一半份量,所以模唔滿.

切開來食,幾煙un,我無放落雪櫃,淨係昨晚放係廚房攤凍一晚,所以唔硬,過幾日會做足一底份量.