楓蜜甘荀包-麵包機

前日焗嘅蘿勒菠菜芝士咸包,昨日終於順利送咗俾人食,所以又要繼續焗包,由於知道落咗冷飯湯種非常黏稠,因此就搬出麵包機代勞.

材料有磨好紅蘿蔔絲,楓蜜糖漿,砂糖,雞蛋,牛奶,筋粉,仲有無鹽牛油,冷飯湯種(無係圖中)等.

磅好所有材料,就可以全部放入麵包機內攪lu...睇吓變咗橙色喎.

但.....唔知點解焗完出爐後?成個麵包竟然下陷,坐低成吋有多,攪乜呢?

攤凍後切開,食味都OK,但好似鬆餅,唔多似平時食麵包嘅口感,呢排都係唔用冷飯湯種住,再研究一下先.

陶瓷刀&削皮刨測試

早前在淘寶網買咗菜刀,生果刀同削皮刨,除咗生果刀用過後,証明名符其實外,今日繼續再測試餘下嘅菜刀&削皮刨.

首先用削皮刨刨薯仔同埋紅蘿蔔,用時候都非常暢順,亦唔需要太用力,輕輕刨下去,已經去了皮,都好乾淨.

而薯仔我平時用金屬刨未刨完已經開始變啡色,要立刻放入水中,今次我特意唔用水浸,祗係放置係度,過咗20分鐘,仍然未變色,果然無誇大功效.

跟住用菜刀切滾刀塊狀,真係輕脆利落,唔需要太用力,好快已切完, 但至於紅蘿蔔比較硬身,需要用力切,但都好快完成使命,祗不過刀身沾染了紅色蘿蔔汁,不容易洗甩.

呢兩兜係已經切完,放係度約30分鐘,薯仔仍然未變色,今次測試過關,以後都會常使用呢個刨同刀,但聽網友講,用咗約半年後刀鋒會開始鈍,我唸到時再搵代理,睇吓點磨番利佢,暫時用住先啦.

甜品蛋糕技巧課程-第七堂_楊枝甘露蛋糕

今日學嘅係楊枝甘露蛋糕.

講明做蛋糕,當然要有海綿蛋糕啦,呢個就係啦,倒扣攤凍後要切蛋糕片.

跟住就要做楊枝甘露餡,材料有芒果粒&蓉,西施柚撕開成絲狀,已經煮熟西米,同淡忌廉+糖打起成忌廉狀.

將西米,芒果粒,西施柚絲混合,加入坐溶魚膠片,最後與淡忌廉撈勻成餡.

一切準備就緒,就可以開始砌餅,最底層係海綿蛋糕片,跟住倒入一半楊枝甘露餡料,再鋪上另外一塊蛋糕片,最後面層倒入餘下嘅餡料,放入雪櫃雪凍.

雪凍後就可以甩模,今次仍然欠缺裝飾,其實裝飾比較個人自由創作,最重要係識整體做法,表面祗係無咁美觀,但用作送禮就一定要做啦.

呢個係切開後裡面餡料,試食後味道比較清新,好香芒果味,日後都會考慮自己動手整.

蘿勒菠菜芝士包

見到雪櫃有菠菜,靈機一觸,上天台摘埋啲新鮮蘿勒(即係金不換)嫩葉焗咗個蘿勒菠菜芝士包.

首先介紹吓材料有法包粉,筋粉,冷飯湯種(隔日已煮好攤凍),切碎菠菜葉,細碗裝住係蘿勒葉,Pamesen 芝士碎,糖,牛油,乾伊士等等

將湯種,粉類,水,糖,伊士放入機中攪一輪,之後再加牛油,差不多時再加埋蘿勒葉,菠菜葉碎,芝士碎落去攪,但....點知打咗差唔多20分鐘,仍然都係麵糊,成唔到團狀. 雖然加多咗筋粉,都埋唔到欄,唯有由佢做第一次發酵,約45分鐘後有發大,跟住係咁意放氣,黏住手根本攞唔起舊麵糊,最後唔理咁多,放入麵包模中作最後發酵至8成滿就放入焗爐焗.真係有啲胡亂來感覺,無法啦.

出爐後甩模都差啲甩唔倒,一出來麵包軟綿綿,企都企唔穩,凍後硬咗就稍為硬身少少.

切開裡面都好軟熟,食落軟綿綿,但我嫌佢稍為軟身,應該減湯種或者水會好啲,又或者用麵包機,由於呢個係咸包,我本人唔可以食太多咸野,明日唸辦法送俾人食算啦.

清蒸蒜蓉竹節蝦

今日去街市買餸,見到有一份份生猛游水竹節蝦賣,約十二兩左右,$78都幾底,於是買來慰勞奄尖大少辛勞工作啦.

睇吓都幾大隻同新鮮.

清洗後,首先剪去蝦鬚,蝦腳,挖走沙囊,去腸,然後開邊

再切碎蒜蓉,乾蔥蓉,蔥粒灑上面,可以加油,鹽撈勻再鋪上蝦面,比較野味.

跟住就可以放入盛有滾水中嘅鑊,大火蒸約5分鐘就可以食啦. 嘩,睇吓有啲仲有膏添,好肥美呀,食落鮮甜彈牙,Yummy.

鳳凰酥&士多啤梨果醬

呢兩樣野其實無乜關連,祗不過都係我今日整來送俾細佬一家食,因為明日會見到佢.

鳳凰酥即係鳳梨酥加咸蛋黃,今日祗需要搓粉團就可以包餡焗,因為之前我已經炒好鳳梨酥餡同用酒焗香咸蛋黃.

呢個麵團唔好用力搓,首先將室溫牛油,白油加糖粉打至鬆軟,加入蛋,最後加埋已過篩嘅麵粉,奶粉,芝士粉,撈勻成團就得,但最好擺入雪櫃雪硬先好包餡,唔係軟身就好難包.

將鳳梨餡包住咸蛋黃,再將切開粉團碾成圓形包住餡,放入模中,輕手壓平於模中,就可以入爐焗,中途要翻身一次,底面倒轉,約焗20分鐘左右.

焗好出爐啦.

但今次由於鳳梨餡炒得唔夠杰身,所以有啲餡裂開爆咗出來,唔係好好樣.

切開裡面見到咸蛋黃,食落唔係好甜,外皮都算鬆化,下次再改良吓,希望可以做好啲.

至於士多啤梨,因為見到近排好平,兩盒都係$15咋.

將佢切碎後加糖醃3-4個鐘.

再放落煲煮至杰身,加半個檸檬汁,最後加多兩湯匙麥芽糖,溶解後就可以熄火攤凍準備入樽,記住玻璃樽要加熱消毒,

細個兜留番俾自己,另外個樽明日送俾細佬.

國貨-陶瓷刀

成日聽朋友話陶瓷刀幾好用,但正宗日本個種好貴,差唔多要成千元一把,我唔捨得買咁貴嘅刀用,近日係網上溜覽,見到原來大陸都有製造呢把刀,祗要二百零就可以買到,於是心思思都想試吓用,雖然知道唔可以斬骨,唔可以跌落地或切雪藏肉類,但都想買來見識吓.

終於昨日下午係淘寶網同一個廣州賣家買咗以下呢3樣野,估唔到佢哋啲效率非常驚人,竟然今日晏晝速遞公司已經送貨到我屋企,真係快到自己有啲唔信,仲好過係香港拍賣網買,又要安排見面交收,或者郵遞都要2-3日啦.

講番我買咗一把6吋長中式菜刀(白色個把),一把3.5吋長黑色令面嘅生果刀,同埋一個瓜皮刨,連埋運費你估吓幾多錢? 答案係盛惠人民幣$222正,換算港紙都係約$250左右,你話底唔底嘞? 原來佢哋都有3年保養,仲係香港都有辦事處,所以有乜問題,都可以攞去俾番佢哋.

收咗刀之後,我當然要牛刀小試啦,即刻用生果刀切個橙,果然鋒利無比. 至於菜刀就用來試切咸蛋黃,完全無難度,明日再試吓切其他野先. 咁我都好快手,轉頭已經通知支付寶過數俾賣家,咁就貨銀兩訖.

中日素食-第七課_日式麵製法&大碗麵

今日學整日式麵,主要係用高筋粉,鴨蛋,少許鹼水同清水,將清水,蛋汁和鹼水混合後,逐少撈入粉中,輕手按壓成粉團,千祈唔好大力搓,之後由麵團鬆弛一陣約10分鐘,灑上粉用棍碌薄麵團,中間要不停灑粉,最後用刀切成幼條或粗條,隨各人口味,揚開麵條就可以放入滾水中,要不停用筷子攪拌,唔好俾麵條黏埋一齊,當水再滾起後就可以撈起,放入冷開水中過冷河,撈起用些少麻油撈勻.

至於大碗麵湯底都係用大荳芽菜,再加花生醬,糖,鹽調味,配料就有素蝦仁,素魚肉,素蟹柳等,但我嫌太"啩",所以帶番屋企再加牛肉同白菜仔.

呢碗就係我加料嘅日式大碗麵嘞,係咪好豐富呢? Yummy,好味道

水泡包-Bagel

今日試吓整呢個包,上堂時見阿Sir整都唔係幾難,而且幾健康,無油,奶,蛋,祗有筋粉,水,伊士,少許鹽&糖.

同普通搓麵包一樣,用手搓或機打至起薄膜後,發酵至兩倍大,放氣,分割,搓圓,再鬆弛10分鐘左右,用手指係麵團中間鑽一個洞,將佢擴大,另外3 個我捲成花卷形.

然後將麵團放入滾水(已加入少許砂糖)中煮約20秒後,撈起.

分別灑上麥皮,小麥胚芽&黑白芝麻係面,就可以放入焗爐焗啦.

焗咗約20分鐘就出爐.

切開入面就係咁樣,食落係皮脆肉UN,同平時食嘅麵包唔同,中間可以夾餡或搽果醬都得.

自家混醬-青瓜雞絲粉皮

感冒咗差唔多兩個禮拜,仍然未全部好番,無乜胃口,所以今日晏晝就整咗呢個清清地嘅麻醬青瓜雞絲粉皮.

將雪藏雞柳肉加些少調味,胡椒粉,鹽,燒酒等蒸熟後,用手撕開成為雞絲,最好唔好貪快用刀切,食落口感無咁好,會比較鞋啲.

青瓜去皮或者連皮,去囊切絲,我用乾粉皮,所以要用滾水浸一陣,約4-5分鐘,浸軟身後再用冷水浸,令粉皮爽口啲,隔水切成條狀

我自己就用麻醬,花生醬,豉油,糖,烏醋等混合成醬汁,淋上面就食得,都好方便同容易做.

甜品蛋糕技巧課程-第六堂_洋金菊慕士蛋糕

繼上禮拜嘅蘋果紅茶慕士蛋糕後,今個禮拜仍然係慕士蛋糕,係洋金菊慕士蛋糕,但就無上次咁複雜.

主要有杏仁蛋糕底,洋金菊朱古力醬,要用來搽上蛋糕面,另外仲要準備洋金菊慕士心同埋牛奶朱古力慕士.

杏仁蛋糕用分蛋法,唔需要落油,祗要將蛋白加糖打起至起角,再混入蛋黃,杏仁粉,過篩麵粉就可以攞去焗,倒扣攤凍後切成蛋糕片備用.

洋金菊係花茶店有得買,或者係超級市場買茶包,但都係要用乾磨機打成粉先可以用,再同蛋黃,砂糖,牛奶,坐溶魚膠片,打至杰身嘅淡忌廉混合成慕士,倒落模中雪凍成為慕士心備用.

跟住準備洋金菊朱古力醬,將洋金菊粉末同溶解牛奶朱古力&無鹽牛油,熱奶,淡忌廉混合成醬.

至於牛奶朱古力慕士都係大同小異,唔用洋金菊粉,加入溶解嘅朱古力漿而已.

好啦,開始砌餅,最底層係杏仁蛋糕片,搽上洋金菊朱古力醬.

再將雪凍嘅洋金菊慕士心放在朱古力醬上面.

最後倒入牛奶朱古力慕士覆蓋成個蛋糕,雪凍甩模就可以切嚟食,如果想糕面靚啲,可以淋上朱古力漿或其他裝飾.

切開裡面就係咁樣,食落真係有洋金菊味,無俾牛奶朱古力慕士蓋過,又幾軟滑,唔錯.