柑桔蜜小蛋糕

今日利用之前自製嘅糖柑桔焗咗幾個小蛋糕送俾朋友.

材料有全蛋,柑桔蜜,將部份糖柑桔切碎,一部份完整作面頭裝飾,奶,芥花籽油,過篩麵粉同泡打粉少許.

將全蛋同柑桔蜜攪拌均勻,加入油同奶,再加入過篩麵粉,泡打粉,最後拌入糖柑桔碎,將麵糊放入蛋糕模內,將一顆糖柑桔放在面就可以焗啦.

經過約30分鐘左右就可以出爐,試食後有濃郁柑桔味又唔甜,但因為唔係落牛油,所以唔夠香,都算幾好,下次可以再encore.

越南尋親之旅

今個星期一同阿媽去越南開始尋親之旅,其實我係懷著戰戰兢兢心情上路,因為大家從未見過面,要去到機場舉牌相認,又唔知人哋會唔會覺得我哋冒昧,好彩見面後發覺佢哋非常熱情,,大家都好高興,而相處幾日發現搵番以前中國人個種濃厚人情味同埋尊敬長輩嘅傳統,本來打算同阿媽住酒店,但點知到埗後,堂姐極力邀請我哋去佢屋企住,將唯一有冷氣房間讓俾我哋瞓,而佢同個女就去另外一層無冷氣房間,我覺得好感動之餘亦唔好意思.

係網上搵到最平宜嘅越南航空機票,就係坐呢架機不過唔係直達入境大堂,而係需要坐接駁巴士.

由於呢個時間得我哋一班機到,所以輸送帶都係空空如也,不到10分鐘辨理完入境手續,行李已到,唔駛等,而天氣等於香港夏天,不過大部份地方都無冷氣,除咗高級酒店&餐廳.

跟住去到堂大哥鄉村屋企,又受到佢熱情款待,雖然不是甚麼佳餚,但全部都係自家出品,天然無添加,包括有走地雞,新鮮疏菜,豬肉,魚等,週圍嘅田園鄉村環境令我不禁想起昔日童年住嘅地方都好類似,雖然要乘坐3個鐘以上車程,但亦非常值得,下次要去住長啲時間,而鄉村好多路已鋪上柏油,非常平坦同清潔,不再塵土非揚,真係出乎我想像.

豐富嘅一餐午飯,計有無油薄皮自家養走地雞配新鮮沙薑,豬雜炒荷芹,蕃茄魚,冬菇炆豬肉,新鮮生菜,其實仲有清補涼煲豬肉湯等.

走地雞隨地走

自家養3頭豬

堂大哥嘅屋企,四面通風,非常涼爽.

越南人家家必備吊床,瞓係上面真係好寫意,好容易瞓著.

估唔估到係乜東東?答案係下一張.

就係新鮮腰果,將表面厚皮撕去,焗乾就係腰果嘞.

睇吓我似唔似游擊隊員?其實因為坐電單車,怕塵土飛揚,要戴上口罩同頭盔.

好多芒果嘅樹,垂手可摘,唔駛爬樹,可惜未夠熟唔可以摘來食,

大樹菠蘿掛係樹上

 講番係胡志明市,交通真係非常恐怖,四圍都係電單車,完全唔識或無可能過馬路,交通燈極少,就算有都唔會遵守,橫衝直撞,相當驚險,由於逗留日子短,加上阿媽唔行得,祗係去咗幾個地標,天氣又好熱,成日出汗,不停飲水,慳番唔駛去廁所,早餐就有3日都係係街市檔口食湯河粉,烏繩四圍飛,不停要趕,但味道都唔錯,雖然盡量飲樽裝蒸餾水,但後來忍唔住都飲加冰汽水,好彩都無肚疴,佢哋又好客,不停輪流請飲茶,食晚飯,雖然中菜味道普通,但親情搭救.

胡志明市清晨街頭

郵政總局大門好優雅古典,係呢度買咗張postcard寄番香港俾自己.

前總統府無乜特別

總統府內會議室

雙塔天主教堂,可惜過咗參觀時間,要等到下晝3點先再開放.

最後臨走時,大家又爭相送禮,個啲手信多到嚇死人,攪到前一晚不停計算是否超重,結果我將所有衣服鞋等放係手提旅行袋,而空出成個行李喼先勉強將所有手信帶走,而且番屋企更要逐步將喼拉上四樓.

手信大堆頭,左邊係10包雞肉乾河粉,中間紅花紙係共5KG紮肉,左上角有1KG焗腰果連皮,中間上面係大樹菠蘿,雜果同芋頭乾,右上角有沙虫乾0.5KG,最右邊係10包牛肉乾河粉,而前面正中共6袋4黑2白胡椒粒,係自家種,仲有0.5KG蝦米係阿媽到,遲啲先拎番.我阿媽亦都有相同份量嘅手信,真係嚇死人囉,今日切開紮肉好好食,而河粉都好軟滑,連奄尖大少都話好味,食唔停口.

總括而言雖然短短5日,來去怱怱,但係感受到好耐都未曾有過嘅濃厚人情味同親情,好開心有今次旅程同親人見面相認.我諗下次有機會會再去探訪佢哋.

糖柑桔

早前見到網友自製柑桔蜜,自己都好有興趣自己醃製,前幾日經過生果檔見有得賣,於是以$10買咗兩磅.

首先洗淨柑桔,將硬嘅桔蒂摘去,再用熱水滾2-3分鐘消毒外皮,所以見到有啲裂咗.

跟住切開半邊,去核,因為之前滾過,桔皮已經軟熟,用手指大力一壓,核已經出來.

然後準備糖水,不過我無跟足食譜嘅糖份,因為試食柑桔,我覺得幾甜,所以減咗糖,當糖全部溶解於滾水中,就可以倒柑桔落去滾2-3分鐘,熄火用抹手紙,或係我呢張係10元店買,要用作蓋係蒸熟飯面嘅紙都得,咁樣啲柑桔完全浸係糖漿裡面,係煲中焗一晚.

第二朝將柑桔撈出來,將糖漿煮滾,再將柑桔放番入去,用紙蓋住,直至第3日.

第3日就撈起柑桔同埋糖漿放入乾淨嘅膠樽,擺入雪櫃待用. 試食後啱我嘅甜度,我準備用佢來整雪芳蛋糕,麵包,或整柑桔果醬,或加蜜糖沖水飲,都會好好味,不過到時要再將柑桔切碎啲先可以用,真係用途廣泛呀.

甜品蛋糕技巧課程－第十課－士多啤梨拿破崙

今日係呢個課程最後一堂,原本課程係做另外一款甜品,但Miss好好人,應我哋要求,又無人反對之下,改為教呢個酥餅.

做酥餅首先要搓皮再夾牛油,反覆摺疊,鬆弛數次,才可以用.

放入焗爐之前要用叉拮洞係面,以免焗嘅時候漲起,或者要用重物壓在餅面上,真係要好多功夫同技巧,簡單快捷就可以買現成酥皮,但好似係用酥油做,無牛油咁好,指嘅係反式脂肪.

焗完出爐嘅樣.

另外要準備吉士忌廉,用牛油加奶煮熱,而吉士粉加砂糖,蛋黃,少許奶混合後,慢慢倒入煮熱奶加牛油中,要不停攪拌,以免黏底,直至杰身為止,要攤凍再分數次加入打起淡忌廉備用.

仲要洗乾淨士多啤梨,索乾水,將大部份切片,小部份連葉留作裝飾.

將酥餅切成長方形等塊,唧上吉士忌廉,放士多啤梨片,再唧吉士忌廉,放上另外一塊酥餅,重複擺放,最後作面裝飾便完成啦.

係咪好靚呢?但除咗有外在美,內在美(味道)都好好味,非常好食,但記住夾完吉士忌廉就要即刻食先會鬆脆,放得太耐酥餅會淋,同埋用超多牛油夾,所以真係少食多滋味,超高膽固醇呀.

再來士多啤梨慕士蛋糕

詢朋友要求,又再做了這個士多啤梨慕士蛋糕,由於已經做過一次,所以今次無論份量控制,流程都比較上次好,唯一是到最尾見慕士漿稍為稀啲,再用打蛋器打多一陣,變咗汽泡多咗啲,但味道都幾好,希望朋友會喜歡啦.

中日素食-第十課_藍莓果子凍&香蕉藍莓鬆餅

今日係呢個課程最後一堂,學嘅甜品同鬆餅,都好簡單,我自己都係屋企做過.

藍莓果子凍,係用熱滾水同果凍粉攪拌,或稍煮一陣,直至無粒狀,跟住稍涼後可以倒入啫哩模或布甸杯,而係面放入新鮮藍莓,放入雪櫃雪至凝固就食得,同做啫喱一樣,而果凍嘅比較"煙UN",無啫喱咁稀,我諗小朋友會鍾意食.

另外一款香蕉藍莓鬆餅,將香蕉切片同鮮奶一齊用攪拌機打成蓉,如果想口感好啲,可以一部份打成粗粒狀,而香蕉最好用比較熟有"梅花點",咁就比較有香味同甜啲.

首先將牛油加糖打起,再分數次加入雞蛋,其次倒入牛奶香蕉蓉,最後將已篩嘅麵粉,高筋粉,梳打粉拌至均勻,無粉粒,用匙羹將麵糊放入錫紙兜,面上放上藍莓,就可以放入焗爐焗啦,但因為鬆餅要落好多牛油,所以我自己就絕少整.

再次失敗嘅蛋糕卷

今日趁開爐焗海綿蛋糕,順便再嘗試焗蛋糕卷,因為上次捲完裂開後,買咗呢本蛋糕卷書參考,今次揀咗其中一款紅豆綠茶慕士蛋糕卷試做.

首先焗咗個綠茶海綿蛋糕底,書教要用兩個焗盤,一個用濕報紙墊底,再放上另一個已鋪牛油紙嘅焗盤,將打好嘅蛋糕漿倒入掃平,我諗主要係唔想糕底太乾,因為要開220度火焗.

蛋糕出爐後之後用乾毛巾墊底,撕開蛋糕四邊紙,倒扣,用搾乾水濕毛巾蓋至涼為止,再將蛋糕反轉於紙上,搽上已打起嘅綠茶慕士漿,,旁邊放上煮淋嘅紅豆,咁就可以捲,捲完後兩邊扎實,放入雪櫃雪約半小時,切開就食得.

以上講嘅係正常流程,而我呢係鋪上慕士漿,捲完後,慕士漿已經流哂出來,成條蛋糕卷濕漉漉,又唔想掉咗佢,於是將流出慕士漿,搽勻成條表面,用保鮮紙擰實攞入雪櫃照雪.

係雪櫃攞出來後切開入面慕士仍然好稀,試食其實味道唔錯,唯讀買相唔見得人,檢討原因第一我怕失敗祗做咗一半蛋糕份量,所以蛋糕好薄,第二淡忌廉打得唔夠杰,或者要再落多啲魚膠粉.

我會再試做,直至成功為止.

杏仁黑糖麥包

前幾日係"二記"買咗包黑麥芽精,於是今日試吓跟"盂老師的100道麵包"書嘅麥汁紅糖包食譜改良版做.

材料用沖繩黑糖代替紅糖,用黑麥芽精代替黑麥汁,加埋湯種.

如常地搓好麵團經過第1次發酵後,放氣再第2次發酵,將麵團碌平成長方形.

鋪上杏仁芝士餡料,由室溫忌廉芝士,加焗香杏仁粉同糖撈勻.

捲好放入模中作最後發酵.

經過約發酵45分鐘左右,發至8-9成滿,搽上蛋汁同杏仁片,就可以放入焗爐焗.

焗咗約25分鐘度,就可以出爐啦.

切開後試食都好鬆軟,但係...因為捲得麵團唔夠實,麵包內部有空隙,下次要留意捲實啲. 仲有呢隻黑麥芽精色就有,不過麥味唔夠濃,下次要加黑啤再加強麥味.