百爵紅茶曲奇&士多啤梨果醬杏仁曲奇

因為之前買咗本手工餅乾書,睇完後打鐵趁熱,今日除咗焗麵包仲焗埋呢兩款曲奇餅.

呢款百爵紅茶曲奇,整形時都幾黏手,唔知係咪俾少咗牛油,好似唔係太鬆化,睇吓明日食會唔會無咁硬,但茶味好濃,幾好食.

另外呢款係士多啤梨果醬杏仁曲奇,麵團加咗焗香切碎杏仁片,中間整個洞放果醬.

將士多啤梨果占用茶匙放係中間個洞,果占係我自己煮架.

跟住放入焗爐焗,熄火後等10分鐘先出爐,試食後都係覺得硬咗啲,下次都係唔好減牛油.

柑桔土司(中種法)-新鮮酵母

今日做呢個土司用咗兩樣唔同嘅新野,第一係酵母,早兩日買咗呢舊新鮮酵母,用之前要搣碎佢,再用暖水加少少糖(可以唔加)浸約5-10分鐘,等啲酵母活躍先再加粉同其他材料.

首先我搓好舊中種麵團,靜置約90分鐘,再加埋主麵團其他材料,用機打到出薄膜,就放落呢個係十元店買嘅發泡箱(當然唔止$10咁平)內作第一次發酵,過咗30分鐘已經發到黏住箱頂,真係勁.

如是者再經過分割,第2次發酵,整形,最後放落土司模內作最後發酵至8-9成滿,就可以放入焗爐焗.

焗約30分鐘就可以出爐,就係呢3個小山丘嘞.

攤凍切開試食,真係幾鬆軟,旁邊個塊争啲企唔穩,唔知係新鮮酵母或是發酵時間夠呢? 都要試多幾次先肯定.

今晚焗鱔

奄尖大少成日念念不忘上次BBQ燒鱔,話好好食,但又無理由為咗咁再BBQ,所以今日我就用焗爐試吓整,睇吓得唔得?

首先去街市買半條白鱔,叫魚檔去潺後起肉,番到屋企洗淨索乾水後,就用胡椒粉,生抽,薑汁,味淋醃咗兩個鐘.

跟住放入焗爐焗3-4分鐘,等魚身比較乾身,再攞去蒸5分鐘度,咁就可以令魚身定型同半熟,將蒸出嚟嘅水倒咗唔要,開始搽鰻魚汁係魚身兩面,放入焗爐鐵架,而下面用兩層錫紙包好焗盤墊底盛魚油.

焗咗5分鐘後就翻身再搽鰻魚汁焗另外一面,至少重複3次或以上,視乎顏色係咪已經金黃.  呢個樣已經翻身咗3次.

最後搽上蜜糖焗多5分鐘就可以攞出來上碟,切開淋上鰻魚汁,加埋淥菜就可以開飯lu..

張相咁暗係因為無開閃光燈影,其實焗完都幾好樣.

食落肉質嫩滑,無過火,無蒸鱔咁肥膩,而今次奄尖大少無彈,淨係完全食哂,問佢意見都話唔錯,咁以後就唔駛再等BBQ都可以有得食,但係小朋友就要小心有幼骨,好難拔走,我睇電視見日本人係用機將魚肉同骨一齊放入去收絞碎,所以係屋企唔易做.

手痕又買書

今日趁出開旺角,去買埋呢本"孟老師100道手工餅乾"書,我前後已經總共買咗4本佢嘅書,因為買咗第一,二本麵包同蛋糕書後,發覺跟住做,成功機會高,而且有啲書有埋DVD附送,唔明都可以睇番作參考,尤其中式麵食又係好詳細,不過佢個本下午茶點就唔會買啦,因為有啲好似同前面啲書大同小異,最主要係我唔飲下午茶呀嘛.

其實餅乾我都小做,因為普遍落牛油較多,我諗都係揀2-3款試做,或者送俾朋友食就算.我淨係有興趣睇書又唔想去圖書館借書,所以都買咗唔少書.

我的新玩具-乳酪機

我有日日食乳酪嘅習慣,但係如果要買就唔化算,同埋味道偏甜,所以我自己用土法自製乳酪已經好耐,但溫度都幾難控制,有時發過籠會好酸,有時溫度唔夠高又發得唔足夠,好耐之前已經係淘寶網發現有自然乳酪機賣,但又驚電壓唔啱,唔可靠,所以都係度猶豫咗一排,結果上星期六上淘寶網買咗,估唔到今日黃昏已速遞送到屋企.

其實呢個紙盒外面仲有卡通紙包到實,再用膠紙封實哂,我都唗咗啲時間先可以將外層撕開.

我買呢個可以一次做500ml乳酪,另外再買多兩個分杯,咁就可以分開兩份食.賣家仲送咗1g一包乳酪粉,話可以做2斤乳酪,我諗大概400ml度,試機後都ok,不過屋企要準備好轉換插蘇,因為機本身係兩腳扁插,但電壓就係220V,啱香港用架.

最後你哋估吓幾多錢? 答案係乳酪機係$55 RMB,兩個分杯共$6,運費$20,即係總共$81 RMB,港紙約$92, 100元都唔駛,係咪好底呢? 我係Yahoo拍賣網見到要$198,仲得一隻款,無得揀.有咗呢部機,以後整乳酪就唔駛咁閉翳lu....

精緻蛋糕甜品班-第二課-日式菠蘿包

今堂仍然係教整麵包,呢款叫做日式菠蘿包,但其實同港式菠蘿包分別不大,主要係造型同菠蘿皮有啲唔同.

因為時間關係,Miss係未上堂前已經搓好麵團,做咗第一次發酵,然後分俾我哋一人4個小麵團做第二次發酵.其實都係甜麵包.

趁發酵時就做菠蘿皮,牛油加糖打至鬆發再加蛋,最後加麵粉同少許泡打粉攪拌成團,放落雪格雪至硬身,分割等份,將皮壓至邊薄中間厚,而又大個發酵麵團,之後包裹麵團,收口係底部,再沾上細砂糖係麵包面,用刀背係面輕輕劃斜格,作最後發酵至約3倍就可以攞去焗.

焗約15分鐘就可以出爐啦.旁邊個啲係當普通餐包,因為怕菠蘿皮太肥膩.

一人有4隻包可以帶番屋企食,試食後菠蘿皮都好脆,不過比港式嘅皮稍為厚身啲.

獨來獨往返-深圳灣口岸

今朝食完早餐後就自己一個人出發去深圳灣,點解一個人?因為我啲朋友同屋企人都唔係住新界西,兼夾要返工,無人好似我咁得閒.我今次主要去見識吓深圳超級市場有幾大?有幾多野賣?同價錢係咪平過香港?

首先坐輕鐵去天水圍鐵路站坐個架"B2"巴士,我計過如果去屯門士中心坐"B3"貴啲,可能係尾站又係單層,所以上車無位坐,兼夾一車過半數都係耆英,好快約15分鐘度已經到咗深圳灣口岸,兩邊出入境加埋都係5分鐘,兩邊都係行e通道.

一出深圳灣口岸,又見到一大班耆英排隊搭機場8路車,我當然唔執輸,即刻排隊上車,因為睇網友資料,知道呢架車班次好疏,司機好好人,問哂全部人係咪都係去海岸城後,行咗另一條快線,送到去海岸城附近,唔駛我哋行咁多路,但結果係問題回程番香港時,我用咗好多時間先搵到正式嘅巴士站,真係有辣有唔辣囉.

呢度就係司機俾我哋落車地方,行埋去就係海岸城同保利文化廣場.

裡面真係好大,如果唔認路嘅人,好容易行失方向,我當然無問題啦,係日本北海道自悠行都係咁四圍去,個商場無乜人行,唔知係咪閒日關係?冷冷清清咁,首先我去咗吉之島個超市,真係好大好多野賣,但一般價錢都唔平,如果牛油,出前一丁麵就貴過香港,電器價錢一般,之後就經二樓平台過對面保利文化廣場個間家樂福,裡面又係超大,拍得住美國,加拿大啲超市,但賣嘅野唔係我杯茶,祗係見特價就買咗呢個焗茶杯,盛惠RMB18.9,約$20港紙.

呢度就係兩個商場互通嘅平台,由中間白色蛇形蓋頂連接.

保利文化廣埸下層得幾間食店開張,其他仲未開業,我隨處行,搵到呢間叫"永康寶島牛肉麵"食晏,職員話真係台北個間分店喎. 其實主要食牛肉,麵就祗有拉麵同刀削麵兩款.

我揀咗一碗細半筋半肉嘅牛肉拉麵,得2舊筋,1舊腩,加一杯凍綠豆沙,唔甜幾好飲,而牛肉湯都幾好味,不過好似無係台北食咁濃同辛辣. 埋單RMB28.

食完晏又唔想再行去Wal-mart,係附近胡亂四圍行一陣之後,就去搵巴士站番深圳口岸,打道回府lu>>>,由上車開始計時間,一個鐘已經番到屋企,當然唔計搵車站個啲時間啦,而車費都用咗唔駛$30港紙,平過出香港,同出九龍差唔多.

總括嚟講,深圳灣南山區主要係住宅民居多,唔似羅湖或福田區咁旺同商業化,但見到起近好多屋同商業中心,將來會好旺,下次有時間會試吓去行福田區個邊.

#最後講俾大家聽,我唔係亂碰亂撞架,我之前已經係網上搵齊資料,印埋巴士路線同附近地圖先敢單人匹馬上去.

又嚟中式包點-生煎牛肉包

趁奄尖大少番工,無人係旁邊吟沉,今日晏晝整咗呢個中式包點,就係生煎牛肉包.

餡料有绞碎牛肉同半肥瘦豬肉(如果淨係牛肉會鞋身),菜莆粒,洋蔥粒,撈勻成餡.

而麵團就用中筋粉,糖,泡打粉,乾伊士,水,加埋昨晚發定麵種攪成光滑麵團,靜置10分鐘就碌成長形,再切等份,碌薄細麵團成包皮,包入餡料,表面掃去多餘粉焙,搽上一層油係包面,咁煎時就唔會黏埋.

用煎Pan開細火落油,將包放入去煎一陣,加水約1/3,用蓋焗一陣,直至水份完全蒸發,中途要不時移動煎pan,令到四周受熱平均啲.

睇吓煎好食得啦,可惜旁邊個幾隻無咁金黃同脆身.

食落皮薄脆,餡多,拍得住出面街買8-9成,俾咗幾隻清潔阿嬸食,佢話good喎,今次成績算唔錯啦.

滋味家常菜餚課程_第一課_豆漿&豆渣麥香餅

今日開始跟番以前個Miss上呢個新一期家常菜餚烹飪班,第一堂教嘅係豆漿同埋豆渣麥香餅.

豆漿其實唔難做,祗要將黃豆浸至少8個鐘或一晚,今次因為要用豆渣,所以黃豆要去衣,再用攪拌機打爛成蓉,一齊倒落煲中煮滾,但要小心一滾起就要收細火或離火,重複3次,仲要將豆漿面嘅泡捌走.

如果甜豆漿就加糖,直接飲用,但今日係整咸豆漿,所以配料要多啲,有即食菜莆粒,都要用水浸過炒乾身再加少許糖,蝦米浸軟身後炒香再打碎,蔥切粒,油炸鬼切塊.

係碗中加完配料後,將滾熱豆漿撞入碗中,後加胡椒粉,麻油調味再放入油炸鬼,就可以飲. 呢碗係我嘅,但加多咗麻油,但都好好味.

至於隔出嚟嘅豆渣,一樣唔浪費,加入麥粉,自發粉,同攤凍糖水攪勻成麵糊,再分數次倒入燒熱加油平底鍋中,煎至金黃色熟透,就好似pancake咁,加糖漿淋面就食得.

因為麵糊已加糖水,我覺得已夠甜,唔駛加糖漿,係咁食有啲煙韌,又唔鞋,最緊要係健康嘛,所以都有攞啲豆渣番屋企試吓用焗,睇吓效果如何?

再度出擊-中式包點-小籠包

自從上個禮拜買咗本中式麵食書之後,今日已經係第3次試做包點,我揀咗整小籠包,祗係做一半份量.

餡料就好簡單,祗係將绞碎豬肉用水打起後加調味料,至於包內湯汁關鍵係豬皮凍,前幾日已經做好冷藏,好似啫哩咁,用時就切成細粒狀,加埋蔥粒,攪勻就用得嘞.

至於包皮係用燙麵法,即係一半滾水,一半冷水,先落滾水攪勻麵粉後再加冷水,不過係好黏手,所以輕力搓勻成麵團就得,再靜置20分鐘,搓成長形,用手掌壓成圓餅狀,用碌麵棍碌成包皮.

再包入餡料,放入鋪咗蒸籠紙嘅蒸籠內,當水滾後蒸10分鐘度就可以食啦.

食後發覺唔多夠湯汁,另外由於包皮碌得薄咗,有部份包皮底穿洞漏汁.

總括嚟講,連續做咗3次唔同中式包點,發覺同西式麵包係兩回事,知易行難,要做得好,並唔容易,真係要俾多啲心機,試做多幾次,先至會有好成績.

中式包點-金絲卷

繼續唔俾佢停整中式包,咁就唔會浪費買咗本書係度封塵,今日試整呢個金絲卷,其實同銀絲卷分別在於裡面麵條加入蕃薯蓉,變成黃色.

首先將中筋粉加糖,酵母搓勻成光滑團,再一開二,半份加入蕃薯蓉混合.

静置一陣,將蕃薯麵團碌薄再揩成3份,再碌開成長方形,搽上菜油係面,對摺後再搽油,用刀切成條狀,再搽油以免黏貼.

將白麵團如上碌開,摺成3 摺後再碌成長方形,將蕃薯麵條放入,捲成長柱體.

將圓柱體切成等份,放入蒸籠靜置約20分鐘,再放入鑊中連冷水一齊蒸約20分鐘.

今次成績麻麻,因為第一我落多咗蕃薯蓉,麵團好黏手難搓難切,其次蒸火侯,表面唔夠光滑好似豆皮,最後因為祗係加咗酵母發麵團,而無用老麵或中種,所以無咁鬆軟,因此有待改進.