卡士達土司-中種法

因為要消滅雪櫃內的卡士達醬(Custard),所以今日就焗咗呢個土司做明日早餐.

首先做咗個中種先,將70%麵粉,水,少許糖,酵母搓勻成團放置係室溫約兩個鐘.

然後將其餘30%麵粉,奶粉,糖,一半卡士達醬,蛋液等攪至成團,再將中種麵團撕成塊狀加入攪拌至有筋性,後加牛油至展開見到有薄膜就可以作第一次發酵. 今次我將一杯熱水加熱至滾後,連埋麵團放入微波爐內發酵,效果都唔錯.

跟住排氣作第二次發酵約20分鐘,就可以攞出來用麵團棍碌平成長方形,將餘下一半卡士達醬平均鋪係面,再捲實放入已搽油方包模中作最後發酵.

當發至8-9成滿就搽上蛋汁,灑上榛子粉係面就可以焗嘞.

但唔知攪乜一路焗一路升高,我即刻用錫紙遮面,終於出爐,個麵包好似戴咗頂模咁,唔知係咪個模唔夠大呢?

切開之後,試食又無乜唔妥喎,仍然好似平時其他中種麵包咁鬆軟.