又嚟中式包點-生煎牛肉包

趁奄尖大少番工,無人係旁邊吟沉,今日晏晝整咗呢個中式包點,就係生煎牛肉包.

餡料有绞碎牛肉同半肥瘦豬肉(如果淨係牛肉會鞋身),菜莆粒,洋蔥粒,撈勻成餡.

而麵團就用中筋粉,糖,泡打粉,乾伊士,水,加埋昨晚發定麵種攪成光滑麵團,靜置10分鐘就碌成長形,再切等份,碌薄細麵團成包皮,包入餡料,表面掃去多餘粉焙,搽上一層油係包面,咁煎時就唔會黏埋.

用煎Pan開細火落油,將包放入去煎一陣,加水約1/3,用蓋焗一陣,直至水份完全蒸發,中途要不時移動煎pan,令到四周受熱平均啲.

睇吓煎好食得啦,可惜旁邊個幾隻無咁金黃同脆身.

食落皮薄脆,餡多,拍得住出面街買8-9成,俾咗幾隻清潔阿嬸食,佢話good喎,今次成績算唔錯啦.