今晚焗鱔

奄尖大少成日念念不忘上次BBQ燒鱔,話好好食,但又無理由為咗咁再BBQ,所以今日我就用焗爐試吓整,睇吓得唔得?

首先去街市買半條白鱔,叫魚檔去潺後起肉,番到屋企洗淨索乾水後,就用胡椒粉,生抽,薑汁,味淋醃咗兩個鐘.

跟住放入焗爐焗3-4分鐘,等魚身比較乾身,再攞去蒸5分鐘度,咁就可以令魚身定型同半熟,將蒸出嚟嘅水倒咗唔要,開始搽鰻魚汁係魚身兩面,放入焗爐鐵架,而下面用兩層錫紙包好焗盤墊底盛魚油.

焗咗5分鐘後就翻身再搽鰻魚汁焗另外一面,至少重複3次或以上,視乎顏色係咪已經金黃.  呢個樣已經翻身咗3次.

最後搽上蜜糖焗多5分鐘就可以攞出來上碟,切開淋上鰻魚汁,加埋淥菜就可以開飯lu..

張相咁暗係因為無開閃光燈影,其實焗完都幾好樣.

食落肉質嫩滑,無過火,無蒸鱔咁肥膩,而今次奄尖大少無彈,淨係完全食哂,問佢意見都話唔錯,咁以後就唔駛再等BBQ都可以有得食,但係小朋友就要小心有幼骨,好難拔走,我睇電視見日本人係用機將魚肉同骨一齊放入去收絞碎,所以係屋企唔易做.