炒韓國粉絲

買咗包乾韓國粉絲好耐都未開工,今日決定郁身啦.

黃色個包就係嘞,首先將粉絲浸軟身,放落滾水中煮至透明色,撈起過冷河,隔乾水份,落啲麻油撈勻,咁就唔會黏埋一堆.

炒材料有三色椒,紅蘿蔔,洋蔥,雲耳浸軟,全部切絲,另外仲有乾蔥同蒜蓉,我無落泡菜,因為唔太鍾意食太咸同辣.

用乾蔥,蒜蓉起鑊,放哂所有材料落去炒,再放調味料(豉油,糖,魚露,胡椒粉,麻油,水等),再將粉絲回鑊兜炒至汁乾身,盛起放碟上,鋪上蛋絲,灑上芝麻就食得.

不過我覺得凍食好過熱食,因為熱食粉絲比較淋身,無咁煙韌.