又嚟拉布蝦米腸

今日趁有心情,又嚟做拉布蝦米腸粉練習,材料就好簡單,有溝好嘅粉漿,包括粘米粉,生粉,澄麵,先落油同粉搓勻,然後再落已經加鹽嘅水開稀,再用篩隔粉漿,咁腸粉皮蒸好會軟滑啲,仲有切碎蝦米&蔥粒, 還要準備腸粉布&腸粉盤,咁就可以開工嚕.

首先煲滾水係鑊裡面,浸濕腸粉布鋪落腸粉盤,一定要四平八穩,唔可以傾斜,倒少少粉漿落去,晾勻盤底塊布,呢一層係墊底,唔係要嚟食,蒸一分鐘後當見到粉皮起泡,就可以攞起再浸水,再鋪番落盤中,放一湯殼粉漿落塊布,放粉漿之前要攪起,如果唔係粉會沉底,再灑上蝦米,蔥粒係面,蓋上鑊蓋,蒸約一分鐘或者見到粉皮起泡就可以攞出來.

將蒸熟腸粉布成塊鋪係已經掃油長形嘅玷板或者托盤之類,而腸粉皮擺係底個面,用切割麵團嘅刀由尾部輕輕拉開腸粉皮同布分開,再捲起成圓柱形,如是者重複至粉漿蒸完為止.

捲好切開一截截,灑上炒香芝麻同煲仔飯豉油,就係我今日嘅晏晝嘞,食落雖然無出名個幾間鋪頭咁軟滑,但一定好過一般10元4-5條個隻,而且多蝦米同蔥,係我嘅至愛.

拉腸粉其實用屋企圓生鐵鑊係好難平穩,粉漿流得唔平均,蒸好就會有厚有薄,幾考功夫,而且鑊裡面蒸汽好熱,一唔小心,好容易焯傷手腕,之前我已經試過.

仲有唔好以為蒸腸粉係健康食物,係開粉漿中有落油,拉腸粉時底個面又要掃油先唔會黏底,再加埋食時如果加熟油,麻醬,真係同"健康"呢兩個字扯唔上關係,不過鍾意食就暫時唔好理佢lu...係咪?