肉鬆麥包-17小時低溫中種

呢排不停試用不同發酵時間焗麵包,發覺出嚟效果差異不大,所以今次用番17小時低溫中種就算.

中種麵團加入主麵團打至有薄膜後,就可以作第一次發酵,跟住排氣,分割,滾圓,再靜置約20分鐘,就可以開始整形.

將麵團拍扁,搽上沙律醬.

灑上肉鬆壓實,再捲成圓柱體,放入模中作最後發酵.

但由於麵團太軟熟,放入模後好似飲醉酒咁,係模內企唔穩,東歪西倒,都無法唯有照焗.

一入爐係咁向上升,要即刻蓋錫紙,同較低爐溫,以免變燶雞,所以有模個部份上得唔夠色,其實可以再焗耐啲,但又唔係送俾人,自己食,亦都唔影響食味,費事再攪咁麻煩,算數囉,至多下次再整好啲啦.