24小時低溫中種-斑蘭椰絲卷

呢款麵包係跟"天然麵包香"做嘅,因為今日忙碌,所以中種發足24小時.

主要用新鮮斑蘭葉切碎打汁,加埋椰汁去搓麵團,第一次發酵後,排氣,分割麵團成3等份,捲成圓柱體,約20分鐘左右,碌成長方形,搽上Kaya醬,重疊三層,因為屋企無原味,祗好用咗斑蘭Kaya醬,所以變成全部青BB,無乜層次感.

將麵團直切成長條後再扭繩,打圈成圓形,放係紙兜中作最後發酵.

發酵完搽上蛋汁,灑上椰絲,就可以放入焗爐焗.

新鮮斑蘭汁真係零舍唔同,一路焗已經聞到好香,焗完後出爐仍然聞到香味,同以往用班蘭油無得揮.

因為焗爐太細,所以攪到啲包包變咗形,但仍然保持一貫低溫中種包嘅鬆軟同好香,我諗以後都會買斑蘭葉自己打汁,唔會再用斑蘭油,因為相差實在太大.