36小時低溫中種-豆腐麥麩包

今日又嚟做實驗,試吓36小時中種同17小時有乜分別?為咗整呢個包,重專登去買咗一舊日本豆腐,因為知道用唔哂全部,昨晚攞咗一半浸魚湯,淨係覺得豆腐好滑,但豆味又唔算太濃喎.

講番呢個包,星期日做定中種,今日由雪櫃攞出嚟加入主麵團,豆腐要隔去水份先好撈勻,照平時一樣,發酵,排氣,分割,滾圓,第二次靜置,整形,放入模中作最後發酵,當發至2.5-3倍大,就由模倒轉落焗盤.

睇吓發得幾勁,灑上筋粉係面就入爐,中途噴水入焗爐中2-3次.

約20分鐘,呢個疑似UFO物體就出爐嘞.

攤涼切開麵包內部組織都幾好,食落皮脆內心軟熟,但再放耐啲,包皮已經唔脆,包心仍然保持軟熟,但又食唔出同17小時中種有好大分別喎.