一蝦兩味

夏日炎炎,去到街市真係唔知買乜餸好?見到冰鮮明蝦好新鮮,雖然唔算平,都買咗一斤番嚟剝殼去腸,用鹽,生粉去潺後就做咗以下兩個菜式.

呢款係咖喱海鮮,其實除咗蝦仁外,仲有兩條煎好倉魚係兜底,所以睇唔到,將薯仔,紅蘿蔔切角,紅洋蔥切片,爆香蒜蓉,紅蔥頭蓉,薑茸,咖喱醬,沙爹醬,檸檬葉等,就落紅蘿蔔加水煮至淋,再加薯仔一齊炆至淋身後,再加埋已爆香紅洋蔥片,最後將蝦仁回鑊,加調味,椰汁就可以熄火,放倉魚係底,因為如果再回鑊煮,魚肉就會兜爛,咁就攪掂一味餸嘞.

跟住呢味係蝦鬆炒粒粒,將綠豆角切粒,浸軟冬菇切粒,生拆新鮮黍米粒,蝦仁切粒加調味,生粉,蛋白落鑊走油再盛起,爆香蒜蓉落綠豆角,黍米,冬菇粒,贊酒,再落啲魚湯,焗一陣,加埋調味汁料打獻,就可以洗手開飯嚕.....係咪好簡單呢?