特色蛋糕甜品班-第二課-紅豆栗子綠茶蛋糕卷

今日學嘅係蛋糕卷,亦係我最弱嘅一環,已經做過4次,都未算十分成功.

首先用分蛋法打起蛋黃同蛋白加糖,再將過篩麵粉,粟粉加入撈勻,一半加入綠茶粉,再分別將兩種麵糊放入唧袋,相隔斜線唧落焗盤內.

刮平麵糊就可以放入焗爐焗.

當焗至表面微金黃色,按下有彈性回彈就可以出爐攤凍.

跟住準備餡料,先將栗子蓉加RUM酒撈勻,再加入蒸淋原粒紅豆,再加入溶解魚膠液,最後加入已打至軟雪糕狀嘅淡忌廉,將蛋糕反轉,將紙掀起,再將蛋糕反轉做底(亦即捲起後蛋糕面),搽上己凝固成膏狀餡料.

用保鮮紙墊底捲起成圓筒狀雪至硬身.

雪凍後就可以切件,食落唔甜幾好,有時間會試吓自己整.