我最喜愛碟頭飯

已經好耐未煮過呢款碟頭飯食,我鍾意自己整,因為可以落多啲喼汁去醃色治牛肉同煮汁.

將洋蔥碎爆香,再加青豆炒一陣,之後炒熟醃過嘅免治牛肉,將全部材料兜勻後打獻,咁就可以放係白飯面,上碟食得,前後用咗15分鐘,唔計白飯,真係簡單得嚟又好味呀..Yummy.

柑桔麥包-低溫中種

又要焗麵包做早餐嘞,見到雪櫃有之前自製嘅糖柑桔,所以就做咗呢款麵包,加埋全麥粉,咁就可以增加多啲纖維.

如常經過麵包發酵,排條,靜置過程後,再捲成圓柱體,放入模中作最後發酵,但模大咗啲,所以麵團東倒西歪.

眨眼就焗完出爐,但太遲鋪錫紙係面,結果面太燶.

底同側面還可以, 一出爐已經聞到好香柑桔味,麵包都好鬆軟.

特色蛋糕甜品班-第七課-酥皮啤梨條

今日Miss示範呢款酥皮,但唔係用傳統夾牛油酥皮方法,佢話叫做快速酥皮,將冰凍牛油切粒,加入低筋,高筋粉各一半,再加冰水,鹽等,就用手輕力搓勻,用棍拍扁麵團成長方形經過4次3摺而成,中途如果見到牛油開始溶,就要放落雪櫃至硬身再碌過,最後碌平至2mm厚度長方形,靜置約30分鐘後,切成約3吋寬長條形,而作面層麵皮要闊過底層.以便覆蓋.面層麵皮要橫切開一條條,但仍然相連唔斷.

餡料有去皮去心新鮮啤梨切粒,用牛油炒軟身,再加入切粒罐頭桃,蛋糕碎,果仁粒(杏仁+合桃),少許吉士粉撈勻.

掃全蛋汁係底層麵皮,放上餡料,再用面層麵皮覆蓋,掃上蛋汁就可以放入焗爐焗嘞.

焗好出爐就係咁樣.

然後切開一塊塊,雖然好食,但始終落好多牛油,所以我自己就唔想整太多呢類酥皮或者批.

斑蘭戚風蛋糕

今日焗咗呢個戚風蛋糕,準備明日送俾阿媽,今次加入之前自製斑蘭咖吔醬.

眨吓眼就焗好出爐,賣相都OK.

至於甩模....底部有啲蛋糕碎.

呢個係切開蛋糕入面,都好鬆軟,但如果再落多啲斑蘭咖吔醬,味道會濃郁啲.

黑啤黑糖麥包-低溫中種

因為要用埋剩低嘅黑啤,同埋係沖繩島買嘅黑糖,所以就焗咗呢個簡簡單單嘅麥包.

唔係好想造型,所以捲好放入麵包模內就算數.

焗咗20分鐘度就可以出爐嘞,無特登做到頂角,自己食無乜所謂.

麵包仍然維持低溫中種一貫鬆軟,但因為捲得唔夠實,所以麵包頂有個大洞,下次要留意先得.

特色蛋糕甜品班-第六課-紅桑子白朱古力慕士蛋糕

今日Miss示範呢款貴價蛋糕,貴價在於紅桑子,一盒特價都要成$34.5,如果唔係特價就要成$50幾蚊.

餅底仍然用番手指餅底,但就教多一樣轉印紙圍邊,但效果就唔係太好,有啲花紋甩唔到落蛋糕,變成一忽忽,而且轉印紙都幾貴,要成$10幾蚊一張.

焗好切高度=模一半左右,放入手指餅底.

而紅桑子用水沖洗後,要立即打成汁,再將雲尼拿條切開,刮籽一齊同淡忌廉隔水加熱,拎起雲尼拿條唔要,加入加熱打蛋黃漿(蛋黃+糖),魚膠溶液,白朱古力溶液等.

另外用兜打起淡忌廉至軟滑雪糕狀與上述材料混合,倒入模中,頂部刮平,放入雪棋至硬身甩模.蛋糕底要掃上一層紅桑子汁,先倒餡料.

加上紅桑子係面裝飾就完成嘞.

黑啤藍莓&無花果麥包

今次攪攪新意思,用黑啤代替水做呢款麥包,加咗全麥粉,藍莓&無花果乾(切絲),所以係一個健康包包.

打好麵團後,加埋浸咗Rum酒嘅藍莓&無花果乾就可以作第一次發酵.

經過正常排氣,滾圓,靜置程序後,將麵團捲起成圓柱體,放入麵包模作最後發酵至8-9成,灑上筋粉,再用刀片割界線,之後入爐.

跟住噴水2-3次,直至焗熟為止.

切開試食仍然保持水準,好鬆軟,切咗一半俾朋友,佢都話好食過街賣麵包.

簡單美味XO醬蛋白蝦仁炒飯

琴日整雪糕,剩低蛋白,所以今日就用咗嚟炒飯,將蛋白煎成蛋皮切絲,將鮮蝦處理好,加入調味後走油,爆香XO醬,蔥粒,加入冷飯炒至軟身,將蛋白絲,蝦仁回鑊,加少許麻油,豉油,就可以開餐啦.

自家製造,真材實料,零舍好味架.

特色蛋糕甜品班-第五課-香橙白朱古力沙巴翁蛋糕

今日學呢款仍然係凍餅,叫做香橙白朱古力沙巴翁蛋糕.

餅底仍然用手指餅蛋糕底.

而沙巴翁係將蛋黃加糖坐熱水打至杰身後,分別加入坐溶白朱古力,魚膠液,橙汁,最後拌入打起7成淡忌廉,跟住就可以將一塊蛋糕放係模底層,倒入一半沙巴翁漿,再鋪一塊蛋糕,將其餘嘅漿倒入,掃平餅面,放入雪櫃雪凍,用橙汁,糖,魚膠液混合,倒上已凝固蛋糕面,再雪硬就食得嘞.

呢塊係自己嘅,仲未食所以唔知味道如何?

自製雲尼拿雪糕-好味!

今日除咗焗麵包外,趁麵團發酵時,煮咗個雪糕漿,因為第一次試用雪糕機,所以做咗祗係一半份量(250ml),首先將蛋黃加糖攪至淺黃色,再加入少許粟粉,然後將半條雲尼拿條開邊,刮出雲尼拿籽,連奶同外殼一齊煮至85度c,徐徐倒入蛋黃漿中攪勻,再隔熱水煮至蛋黃漿黏稠熄火待涼,最後加入打起7成淡忌廉撈勻成雪糕漿.

黑色一點點就係雲尼拿籽.

將雪糕漿倒入雪糕機兜內,合上蓋鎖好,再放上機頭,襟掣放入冰格內,雖然說明書話攪拌40-50分鐘就可以,但我望吓雪糕漿仍然好稀,卒之總共攪咗2個鐘,開始杰身先將雪糕漿倒入膠盒中,雪多兩粒鐘,好似軟雪糕狀,因為我好心急已經攞咗啲出嚟食,唔....食咗第一啖就唔停得口,真係好香滑,奶味濃郁,,同"H"字頭雪糕有得fight,今次証明機仔細細,原來都好掂架,下次要整乜味道雪糕好呢?

洋蔥吞那魚&午餐肉黍米包-直接法

今朝起身天陰落住毛毛細雨,呢啲天氣適宜留係屋企,於是又去整包,參考"香港麵包"書改良,焗咗呢兩款包包.

首先將黍米粒打成茸,同其他麵團材料混合,打至有薄膜,就可以作第一次發酵.

經過排氣,分割,滾圓,靜置約20分鐘,就可以包餡,餡料分別有圓形嘅洋蔥吞那魚黍米粒,同埋長方形午餐肉,最後發酵後,做麵包裝飾,就可以入爐嘞.

焗約20分鐘度,就可以出爐,今次麵包好似有啲燶,下次都係早啲用錫紙遮面.包包軟熟好味,Yummy....

舊嘅唔要,新嘅會嚟!

其實我講嘅係呢部雪糕機,之前用信用卡積分換咗個部雪糕機,容量同體積都大,個兜太大,好難擺得落雪格,所以將佢讓咗俾人,偶然見到有網友買咗部話用電池發動雪糕機,體積又細,啱哂我要求,價錢又唔貴,於是買番部學人玩吓先.

今日收到部機嘞,呢個係裝機嘅紙盒.

成部機裝好後都好細,一次祗可以做到500ML雪糕,啱我呢鍾意攪攪震又唔太鍾意食嘅人.

呢支係插落去嘅膠掌,掉轉放入兜裡面,加入雪糕漿,開機放入雪格內,佢會攪一陣停一陣,大概40-50分鐘就完成,我會儘快試吓整雪糕,然後再講俾大家聽結果係咪成功

蜜汁焗排骨

以前未結婚,同屋企人一齊住,因為多食肉獸(哥哥&細佬),所以都會整俾佢哋食,但結婚後,奄尖大少唔太鍾意食肉,加上年紀大,所以已經好耐無整過嚟食,今日突然想重溫以前味道,於是二話不說,趁去買餸時.順便買咗3條一字骨,叫豬肉檔一開二斬開半條.

洗淨肉排後,落海鮮醬,磨豉醬,麻醬,豉油,砂糖,蒜蓉,紅蔥碎,玫瑰露等撈勻,放入保鮮袋,迫出空氣,索緊袋口,放入雪櫃.

我醃咗約4個鐘,就將排骨攞出嚟,將蒜蓉,蔥蓉抹去,以免焗燶變苦,排係燒烤架上,下墊鋪錫紙焗盤就可以開始焗嘞.

每10分鐘將排骨轉身一次,搽上醃料醬汁,總共焗咗40分鐘,最後搽上蜜糖,再焗多5分鐘就大功告成嚕..

至於味道嘛....仍然可以保持一貫水準,味道唔錯,但如果醃過夜應該更入味.

自製蝦漢堡

食過麥記出嘅蝦漢堡,但好少蝦肉,又無乜蝦味,所以今日自己試吓DIY.

將急凍蝦仁解凍,索乾水份,用刀背拍爛,加調味料,攪拌至起膠,再撻數十下,放入雪櫃雪硬身.

用手將蝦膠搓成圓餅狀,放入煎pan煎熟.

將麵包一開二,放上生菜絲,沙律醬,蝦餅.

夾埋就食得,切開睇吓蝦餅同麵包一樣咁厚,但由於唔係新鮮蝦,所以味道無咁鮮甜,但一定好過麥記,因為真材實料嘛.