芝麻冰皮月餅材料比較簡單,麻蓉餡係用開邊綠豆煮淋壓爛成茸,再加油,糖煮至硬身,芝麻炒香打成茸混合一齊,冰皮係將熟麵粉,糕粉,固體菜油,糖霜搓勻雪凍.
切出等量冰皮同芝麻餡包好,滾上糕粉,壓模,雪凍就食得嘞.
另外一款士多啤梨冰皮月餅就較為繁複,將新觧士多啤梨打成茸,一部份加入溶解魚膠液,糖&粟粉攪勻雪凍成餡心,其餘就加熟麵粉,糕粉,固體菜油,糖霜搓成皮備用.
將忌廉芝士同煮好綠豆蓉溝勻成餡,中間包入士多啤梨凍作餡心.
將冰皮包入餡,滾上糕粉,再壓入模中吸出就成為呢款冰皮月餅嚕....
兩款唔同口味,明日攞去送俾好朋友.
俾大家睇吓內餡,都唔錯架,不過......士多啤梨個款因為放得餡太多,所以包到穿崩,認真唔靚仔,下次都係唔好咁貪心囉.
試食後士多啤梨酸酸地都幾好味,但始終比較鍾意食麻蓉,減咗糖唔太甜啱我食多啲.
勁呀，全部自家制！我就懶喇，由皮至餡都係用玩成嘅！我只係個包裝女工呢！
回覆刪除[版主回覆09/14/2009 15:30:00]因為學嘅時候都係學全套,所以自己都要練習吓,加上現成冰皮粉唔夠自己搓咁軟熟,我試過食麻麻地.
點解會用咗個果凍模?? 下次可唔可以幫我整芝麻餡, 我都想整月餅, 不過要開火....我唔係好得架
回覆刪除[版主回覆09/15/2009 20:18:00]因為我個月餅模太大,成100g一個,唯有用果凍模頂住檔.
無問題你想幾時要,最好早兩日通知,先做得切俾你.
今個星期五你得唔得閒會唔會見到你呀 ?
回覆刪除[版主回覆09/15/2009 21:06:00]今個星期五會去學最後一堂蛋糕,如果你番工,我會帶埋幫你買紅外線測溫鎗俾你,如果你想要麻蓉餡,到時煮好攞埋俾你,好唔好?
但晏晝約咗蛋糕班同學一齊食,下午之後再一齊去學整月餅,所以可能唔同得你食,要再另外約時間.
Ok 星期五見啦, 咁下次再約你食Lunch
回覆刪除個士多啤梨冰皮好靚呀!
回覆刪除如果唔加綠豆蓉得唔得架?或者又無其他野可以代替呀??
[版主回覆09/16/2009 08:18:00]因為上堂學嘅時候,都係教用綠豆蓉,我都唔知可以用乜野可以代替喎? 或者去DIY烘焙店睇吓有無現成冰皮月餅餡料賣?其實自己煮,坦白講都幾麻煩架.
又幾特別喎
回覆刪除唔該晒^^我試下去diy店買預拌粉同睇下有無現成無豆蓉餡先..
回覆刪除