聖誕西點甜品班-第四課-聖誕薑餅屋

Miss 應同學要求,提早教整薑餅屋,咁就可以多啲時間練習,有問題可以下堂問.

主要將薑粉,麵粉,玉桂粉,丁香粉,豆蔻粉,梳打粉加入煮溶蜜糖,黑薑糖,牛奶,雞蛋中搓勻,放入雪櫃至少20分鐘,或者隔一夜.

至上要切四塊,兩塊屋頂,兩塊牆壁.

長形係屋頂,三角形係牆壁,入爐前要叉洞,但仍然唔平,因為我碌得唔夠平均.

打起蛋白,糖霜硬身後就可以砌屋,因為時間關係,無做平台,用白紙墊底就算.

呢間係Miss整嘅.

呢間係我整嘅.

最後係全部同學嘅作品,真係各有特色,好有創意呀.

玉桂蘋果包&南瓜餡辮包

拜完山後攞咗啲蘋果番嚟,但又無乜興趣食,於是攞佢嚟整麵包.

首先將紅蘋果去芯切塊,用少少水,1/3個檸檬煮到蘋果軟身,將檸檬拎走唔要,加糖,鹽調味後,再用攪拌機打成茸備用.

另外將青蘋果去芯,去皮,切粗粒,用少少牛油,砂糖煮至微黃,再加入蘋果粒,檸檬汁煮剩一半汁,加入浸透Rum酒藍莓乾,再將麵粉水倒入煮至杰身,攤凍成餡.

將蘋果茸,中種麵團一齊加入主麵團搓勻,經過第一,二次發酵後,分成等份,搓成長形,放入煮好蘋果粒,捲成長條形.

再將麵團打結放入模中作最後發酵,發至約2-3倍大,搽上蛋汁就可以放入焗爐焗.

焗好出爐就可以甩模攤凍.

同一份麵團,包咗上次用剩南瓜茸做餡,做咗個四辮包.

兩款都唔錯架,so far so good 啦.

聖誕西點甜品班-第三課-意大利青瓜合桃提子蛋糕

今日學嘅係意大利青瓜合桃提子蛋糕,做法唔複雜,祗要將所有材料撈勻,加入打起蛋白就完成,所以中間個程都無影低.

材料包括有意大利青瓜刨絲,焗香合桃切碎,焗香葵花籽,全麥粉,泡打粉,什香粉,梳打粉,玉桂粉,用蛋黃全部撈勻,再加菜油. 蛋白加黑蔗糖粉打起勾狀再同麵糊撈勻,倒入模內就可以焗,爐溫同埋焗時間要視乎模具大細而定,細模爐溫要高,但時間要短,相反亦然.

用焗盤焗,但蛋糕唔係好升高.

另外有用細長方模同Muffin杯焗.

呢個蛋糕比較實同無牛油蛋糕嘅香味,不過由於係落菜油,果仁,相對比較健康,又唔太甜,但成本唔平,淨係兩條意大利青瓜都成$5x,再加埋果仁,菜油等,如果想換吓口味,不妨一試.

應節南瓜方包-低溫中種

"萬聖節"就快到,所以我買咗個南瓜焗麵包嚟應吓節.

將南瓜部份去皮切塊蒸熟,再壓爛成南瓜蓉,部份刨絲,一齊放入麵團搓勻.

最後發到8-9成滿,可以放入焗爐焗啦.

金黃色麵包出爐.

攤涼切開望吓都唔錯架,不過始終南瓜味比較淡,唔係好覺有南瓜味.

古法馬拉糕

我雖然唔太鍾意食馬拉糕,但見到好多網友DIY整得都唔錯,所以我又嚟趁熱鬧,整番一個,我揀咗用古法製.

環亞佳餚精選課程-第三課-臭豆蝦仁&椰香雜菜

今日上第3堂,兩款都係印尼菜色,主要將香料臼碎,加調味料成醬汁.

臭豆蝦仁中嘅臭豆,其實祗係個名,好似蠶豆咁,扁身綠色,無乜味道,首先將馬拉盞切片,再切條焗香,同蒜頭,乾蔥,指天椒臼爛成蓉,番茄去皮,去粒切細塊.

蝦仁去殼,去腸,背部開一刀,用生粉,鹽醃一陣,抹乾水份,用蛋白,胡椒粉麻油略為醃一陣,放入雪櫝,抽乾水份.

將臭豆片用油略為爆香後鏟起備用.再爆香香料,加入蕃茄臭豆,水份煮一陣,最後加入蝦仁,調味料便完成.

臭豆食落無乜味,但有同學話覺得有苦味,我就覺得普通,自己就唔會煮囉.

至於椰香雜菜,包括有合掌瓜(切粗粒),青豆角(切條),珍珠荀(切粗粒),青/紅牛角椒切絲,蝦乾浸軟身.

將香料(石粟,乾蔥,黃薑,指天椒,蒜頭等)臼爛成蓉爆香,加入瓜菜,蝦乾,檸檬葉煮至菜淋身,再加入椰漿煮至滾,加入調味就完成嘞.

如果任揀一款菜式,我比較鍾意椰香雜菜.

日式咖哩雜菜烏冬

近日我鍾意食日式咖哩,貪佢無咁辛辣,甜甜地,又有肉桂味,見到超市有日式咖哩磚賣,一於買番嚟自己DIY.

今次想清啲,所以無落肉類.

材料祗有紅蘿蔔,薯仔,洋蔥,全部切粗粒.

首先爆香洋蔥,鏟起備用,跟住爆香紅蔥頭碎,蒜蓉,落紅蘿蔔粒,加水煮至淋身,再加薯仔,煮至淋後,將已經爆香洋蔥回鑊,最後放入咖哩磚,煮至溶解,試味就攪掂.

其實呢個時候可以再加埋你喜歡肉類煮一陣至熟為止.

將煮好烏冬隔去水份放入碟內,再將雜菜咖哩放面就食得,或者配飯都可以,真係又簡單,方便,百搭菜式呀!

紅洋蔥香草包-低溫中種

今次主要加咗紅洋蔥粒同埋薯仔香草預拌粉一齊搓.

最後發酵後準備入爐.

甩模後,麵包外層稍為倉白,因為減咗爐溫.

切片後太軟熟,有啲企唔穩咁樣,今次麵包太軟,唔係好啱我口味.

其實整包當日唔太順利,因為要緊急出門,所以淨係第一次發酵輪流放入雪櫃,又再攞番出嚟室溫,都重複兩次,到最後發酵未到8-9成滿,又趕住入爐,好彩都焗得成麵包咋.

聖誕西點甜品班-第二課-花旗參慕士蛋糕

今日第二堂學嘅係花旗參慕士蛋糕.

蛋糕底係海綿蛋糕,焗完倒扣攤凍後橫切,底面唔要.

將海綿蛋糕放係慕士圈底層.

而花旗參慕士餡,首先將花旗參片加水煮至滾起,再焗一陣,攤涼後加入蜜糖,隔出花旗參蜜糖水同打起淡忌廉,魚膠片溶液撈勻,再將部份煮過花旗參片切碎加入.

將慕士餡料倒係海綿蛋糕之上,雪至硬身,貼上煮過原塊花旗片,再倒入由花旗參蜜糖水加魚膠溶液成啫哩面.

一人分到一塊,暫時未食,所以唔知好唔好食?

虎皮蛋糕卷

今日跟書食譜試吓整虎皮蛋糕卷.

首先用戚風蛋糕方法焗好蛋糕體,倒扣攤涼,將預先煮好嘅吉士檸檬醬搽係蛋糕面,捲實,用焗爐紙包好,放入雪櫃內雪至硬身.

然後將蛋黃,糖打至奶白色,加入少許粟粉攪勻,倒入焗盤中焗至金黃色.

虎皮攤涼後搽上一層吉士檸檬醬,包住已經雪硬身蛋糕卷,然後用焗爐紙捲好,放入雪櫃再雪至硬身,就可以切一塊塊食.

試味後蛋糕好軟熟,吉士檸檬醬味道都好清新,但由於爐火問題,蛋糕一捲就裂,唔通細爐真係唔可以焗蛋糕卷?要再諗吓點先可以征服呢個難題.

環亞佳餚精選課程-第二課-青芒沙律&香蘭葉炸雞

今日上第二堂, Miss示範嘅菜式有青芒沙律&香蘭葉炸雞

首先講香蘭葉炸雞,將班蘭葉洗淨抹乾,雞脾起肉,去皮,切件,落調味醃至少30分鐘或以上,用葉包起,不過Miss教包方法都幾難包,可以用牙簽將收口拮好,用中火炸至葉變色後,再開猛火將油迫出.

而青芒沙律,要將酸/甜兩種芒果刨絲,甘荀拖水切絲,洋蔥切絲浸冰水,蝦米煮一陣再用攪拌機攪碎,乾蔥片切絲炸至金黃色撈起,將所有全部加調味料撈勻,再灑上花生碎同紅椒粒,金不換葉(切碎).

全部完成可以試食嘞,味道幾好唔錯.

藍莓乾麥包-低溫中種

自從學識做麵包後,真係無乜幫襯出面麵包鋪,因為一食已經知道同自家製分別好大,所以就繼續焗麵包嘞.

今日仍然係健康包包,加咗全麥粉&藍莓乾,用低溫中種法,最後發酵至9成滿,蓋上麵包蓋就放入焗爐焗.

出爐後甩模

攤涼後切開睇吓,無問題,保持一貫鬆軟,但低溫中種嘅麵包出爐後,好多時都會回縮,可能水份比較多影響,真係好難兼顧,下次試吓俾少啲水,睇吓會唔會回縮無咁嚴重.

聖誕西點甜品班-第一課-蛋白釀朱古力慕士

今日又開始去上新蛋糕甜品班,內容主要集中會教聖誕嘅蛋糕甜品,但由於未到聖誕,所以會學其他蛋糕甜品先,今次學呢款叫做蛋白釀朱古力慕士.

首先將蛋白加糖打起至7-8成彎勾狀,亦即馬令,然後用唧袋唧入銻/錫布甸杯內,約8-9成滿,焗盤底加約一半水,而面要用錫紙封好,放入預熱焗爐120度C焗約20分鐘.

出爐後將中間蛋白挖走,以便陣間釀入朱古力慕士餡.

至於朱古力慕士餡,要將一半淡忌廉煮熱,加入苦/黑朱古力溶解,另一半淡忌廉打起,再將頭先挖走蛋白馬令加入溶解朱古力液體內,再拌入打起淡忌廉,用唧袋唧入蛋白中,放入雪櫃雪凍.

跟住仲要準備雲尼拿汁,將新鮮雲尼拿條切開,括出種子,加入奶,糖,淡忌廉內煮熱,撈起雲尼拿豆夾唔要,熄火加入蛋黃,攪勻後再開慢火煮至杰身.

除此之外,仲要焗朱古力薄餅乾作裝飾之用,用淡牛油,糖,麵粉,唂咕粉,蛋白撈勻成粉漿,抹係膠模內,入焗爐焗4-5分鐘.

食時將雪凍布甸杯倒出蛋白朱古力慕士,底部糖水要隔走,將雲尼拿汁淋上碟旁,朱古力餅乾插係蛋白面作裝飾.

坦白講,呢個蛋白馬令超甜,我諗我自己唔會整,至多都係整朱古力慕士.