聖誕西點甜品班-第六課-三文魚卷伴香檳忌廉汁

眨吓眼已經上到第6堂,今日學嘅係西式頭盤,不過係熱食,就係呢款三文魚卷伴香檳忌廉汁.

首先要將龍脷魚柳打爛成茸,菠菜葉出水後亦打爛成菠菜茸,再加入蛋白,胡椒粉,淡忌廉坐冰水攪勻,然後係半圓模鋪保鮮紙,再鋪三文魚片,紫菜,唧上龍脷魚漿,或倒入抹平,上放幼條三文魚,再唧入龍脷魚漿,用外面紫菜,三文魚片包好,保鮮紙封實,就可以攞去隔水煎熟.

而香檳忌廉汁,將紅蔥頭蓉略為爆香,同香檳酒一齊煮至剩下一半,隔去紅蔥頭,加入淡忌廉再煮至剩下一半,可加麵粉水煮至杰身或者唔加,熄火後落檸檬汁,鹽調味就完成.

將蒸熟三文魚卷切片,加入薯仔,西蘭花伴碟,淋上香檳忌廉汁就食得.

至於味道都OK,但唔食魚嘅人會覺腥味,未必接受到,始終三文魚生食好過熟食.