我嘅第一次整白切雞

從來都未整個白切雞,原因係由細到大,我哋幾兄妹祗係鍾意食豉油雞,我媽祗好遷就我哋,淨係整豉油雞,否則就個個都唔肯食,但結婚後就剛剛相反,淨係白切雞,因為老爺奶奶係拜神,所以奄尖大少亦跟屋企習慣,淨係鍾意食白切雞,所以為妻我而家要學整白切雞囉.無計呀!

今日買咗隻新鮮活雞番來.

洗淨雞後,將佢掉入已放咗薑,蔥,八角(約2-3粒),鹽(2茶匙),紹興酒嘅熱水中浸約20秒後,再放入冰水中約10-15分鐘,令雞皮唔會熟咗後爛皮.

再將浸雞水滾起,放番隻雞入熱水中,直至再滾起,熄火用瓦碟反轉壓住隻雞,令佢唔會浮起約25-30分鐘左右.

然後將佢放入冰水中冷卻約10-15分鐘,令皮脆肉爽.

跟住吊乾佢,到食時先斬件.

斬件後加埋薑,蔥,鹽,鑽熱油伴食就攪掂lu.....,果然好有雞味,雞皮好爽.

但....其實我有失手,就係雞脾位唔熟見紅,結果要番蒸,所以係相中見唔到雞脾部份,因為我太心急祗係浸咗20零分鐘就攞出來,爭咗些少時間,下次一家要浸多5-10分鐘先得.

中日素食-第一課_XO素鮑魚發財蘿蔔糕&笑口棗

今日去上另一個新烹調課程,名為中日素食,因為年近歲晚,所以Miss會係第1&2堂教賀年食品先,不過可惜就係佢唔准我哋影低過程,祗係准影製成品,所以以後就唔可以圖文並列,同大家一齊分享.

首先要準備蘿蔔糕材料,呢啲係佢未講之前影低佢唔知嘅,材料:有蘿蔔一半用刀切粗絲,另一半刨幼絲,另外仲有素臘腸,素鮑魚,榨菜,發菜,芫茜,全部切絲,冬菇切絲後要用冬菇調味水煨一陣,令佢滑身啲,繼而就煮蘿蔔絲,但千祈唔好落鹽,祗可以用糖煮,令蘿蔔絲快啲淋,跟住就開粉漿,用粘米粉同埋粟粉混合再加水,跟住加鹽,發菜入去.

起另外一鑊爆炒其他配料,再混合煮熟蘿蔔絲,最後加調味,有胡椒粉,少少五香粉,素XO醬,麻油&薑汁,用來辟蘿蔔嘅寒涼.

而粉漿要逐1/3加入煮熟蘿蔔絲&配料中,用鑊鏟順同一方向混和,而鑊就仍然開著火,所以加完粉漿後,會好黏稠,越來越難推,見粉漿熟變透明色,就可以鏟落爐盤或錫紙兜中,攞去蒸約45分鐘,之後攤凍少少,灑上芫茜,芝麻就可以食得,如果要煎,就要攤多一日先可以夠硬煎.

呢啲係已經蒸好嘅蘿蔔糕.

左邊係當堂試食,而右邊係俾我哋帶走,味道都唔錯,有些少辣味,並且食到蘿蔔絲,主要係無落肉,係一個健康嘅蘿蔔糕.

另一款係笑口棗,主要材料包括有麵粉,泡打粉,梳打粉,黃片糖,麥芽糖少許,雞蛋等,首先用少少水煮溶片糖&麥芽糖,之後再將所有材料混合,輕手混合成粉團,再搓成幼長條形,切粒狀,放入水中,好快將粉粒再放入芝麻中黏實,用手搓成圓粒狀,就可以用中慢火炸,炸至浮起並且爆開口,就可以撈出,不過係炸過程中,千祈唔好攪動,祗能用筷子輕輕反轉粉粒,剛撈上來時都唔可以郁動,否則會散哂,攤凍之後食好鬆脆,同我以前係街買個啲好大分別.