一人冬菇牛肉煲仔飯

今日開始大掃除,但淨係洗廚房抽氣扇,已經洗到索哂氣,但仍然為自已整咗呢個煲仔飯做晏晝.

材料包括有醃咗嘅牛栁粒,冬菇絲,蔥粒,至於個煲仔從來未用過,唔記得邊個送?因為太細,所以都唔知攞來點用好?而家剛好可以用來煲飯

首先落半筒米,水剛過米面同落幾滴油.

開大火煲到見水滾起,見到差唔多收水,其實祗係3分鐘左右,就收細火,落冬菇絲,再平均鋪好牛肉粒,再煲多5分鐘熄火,落埋蔥粒再焗多5分鐘就食得.

加埋碟焯菜就可以開飯,係咪好簡單呢?前後都係用咗20分鐘,已經食到又好味同健康嘅晏晝. 不過無乜飯焦,因為焗時間短. 而家又有力氣繼續大掃除啦.