慳得就慳-大魚兩味

香港雖然經歷金融風暴,百物騰貴,但其實如果自己煮,都可以豐儉由人,譬如我今日係街市買咗條淨魚身嘅大魚,叫檔主幫我將魚斬開兩舊,魚腩開邊,而魚尾原條.

番到屋企,將魚尾煎香滾湯成奶白色.

將白菜仔淖熟放湯碗底,而魚湯隔去渣後再滾起,放入豆腐塊,加鹽,糖,胡椒粉調味當湯再滾起時熄火,倒入湯碗中,咁就成為白菜豆腐魚湯嘞.

另外洗淨魚腩,蔥段墊底,係魚腩上放薑絲,再鋪上已出水,白鑊炒過加糖嘅梅菜粒就可以攞去蒸,我一滴油都無落,但一啲都唔腥,蒸熟後落埋豉油,就可以開飯.

係咪好健康又有營養呢?如果講俾大家聽今餐買咗幾多錢?包你哋會好驚奇,正確答案係約$25度.

條數係咁計: 大魚魚身$15+豆腐一塊$3+白菜仔一斤$3.3(我去菜欄買$10/3斤菜)+梅菜$4,總共係$25.3,就算加埋白飯,應該都係$30左右.

如果屋企有小朋友,又唔想咁清淡,可以將魚腩切條狀,用豉油,糖,酒醃一陣,半煎炸,再起鑊落薑,蔥焗,一樣咁冶味架.

呵呵!又買書嘞

今日出開旺角,順便去馬健記幫朋友買書,結果忍唔住自己又買多兩本,真係無事出街又破財,不過鬼叫我唔鍾意借書睇咩,唯有繼續買下去囉.無計

滋味家常菜餚課程_第四課_錦繡冰豆腐_蒓菜炒蛋

今日學嘅係外省菜,包括有錦繡冰豆腐&蒓菜炒蛋.

首先講冰豆腐,買一磚或一盒新鮮豆腐,用熱水沖乾淨豆腐四周,然後用膠盒或原本個盒,封好蓋,或用保鮮紙封好頂部,放入冰格雪過夜,咁豆腐內部會成蜂巢狀.

其次將毛豆仁,紅蘿蔔粒,銀杏(白果)出水,再用魚尾或其他魚滾湯取汁,,將冰豆腐從冰格攞出解凍後,壓出水份,切方塊,放入魚汁中煮滾,再將其他配料加入兜勻,滾起後放調味料就可以食得.

呢個餸好清爽同健康,冰豆腐嘅食法同普通豆腐有分別.

至於蒓菜係水生草本植物,以太湖,西湖等地方最出名,外省人多數用來煮湯羹,買番來係用水浸住,倒去水份後再用熱水沖洗,索乾水份,打起蛋液,加生粉,咁可以令到炒蛋後唔會咁快出水,再加埋蔥粒,開紅鑊落油一齊兜炒至蛋熟就可以食.

個買相雖然唔係咁討好,但食落蒓菜無乜味道,祗係感覺係口裡面滑脫脫,都幾得意,但我自己就唔會特登走去買來煮餸嘞.