日本麻蓉豆沙大福

做呢個點心係因為奄尖大少唔鍾意食有花生粒或者紅豆沙糯米糍,所以琴晚我用包粽剩低開邊綠豆隔水蒸淋壓爛,加入芝麻粉,糖,固體菜油炒成麻蓉豆沙餡.

今日就用白玉粉(因為就快過期,其實可以用糯米粉),粘米粉過篩,再倒糖,麥芽糖,最後用滾水(要90度C以上)撞入粉堆中,快速攪勻,倒入已掃油碟,再放入鑊蒸12-15分鐘,粉漿變透明就熟.

呢啲就係餡同埋蒸熟粉團.

將蒸熟粉團放入保鮮袋,帶膠手套搓揉一陣,捲成圓柱形,切成11-12等份,將熟麵團搓圓壓扁包入麻蓉豆沙餡.

表面再滾上片粟粉放係紙兜中分隔開就攪掂嚕,其實都好容易整,俾咗一個奄尖大少試食,佢都話OK.