廢物利用-雜菜渣燒餅

今日榨完雜菜汁飲,諗起仲有日本燒餅粉,靈機一觸,廢物利用,於是就煎咗呢個燒餅做午餐.

首先將雜菜渣(西芹,青瓜,白玉苦瓜)混合燒餅粉.青綠色個啲就係雜菜渣已經變成茸.

再加水,雞蛋,鮮蝦粒撈勻成麵糊.

將麵糊倒落煎pan中用少許油慢火煎.

煎至燒餅邊硬身就番轉煎另一邊.

煎至熟透就鏟起上碟,加沙律醬同燒餅醬.

最後灑上紫菜絲同木魚片就食得嘞,因為雜菜渣有水份,所以燒餅比較軟身,但都好好味,而且多咗啲纖維,比較健康,都唔錯...