特色蛋糕甜品班-第四課-生薑芝士蛋糕&藍莓提子乾鬆餅

今日學呢兩款蛋糕,其實生薑芝士蛋糕上期已學過,因為Miss重複放入課程,佢應承加料補番重複嘅幾樣蛋糕,

起初以為鬆餅好簡單,原來都有竅妙,首先牛油加糖一定要打到好鬆軟,雞蛋要用分蛋法,將蛋白打至彎曲狀,再加入麵糊內撈勻,最好用手撈,跟住分開一半加入新鮮開邊藍莓,另一半加入提子乾.

將麵糊盛入已放紙兜模內.

放入焗爐焗20分鐘左右,就可以出爐.

攤凍甩模就攪掂,食落真係好鬆軟,幾好味.我會試吓整.

另外生薑芝士蛋糕今次改用手指餅蛋糕做底,淡忌廉加薑汁糖水打至軟忌廉狀備用,忌廉芝士加糖打至軟滑,再加生薑汁,糖薑碎,坐熱溶解魚膠液撈勻後,將打起淡忌廉加入,最後加埋打起蛋白,再倒入已墊好手指餅蛋糕模內雪凍就完成.

韓式炸醬麵

成日睇韓劇,見到佢哋食炸醬麵好似好好味咁,聽講係尖沙咀韓式餐廳食要$50幾蚊一碗,偶然係網上發現韓式炸醬麵食譜,見到都唔難整,一於DIY試吓整先.

材料包括有豬肉碎,洋蔥,紅蘿蔔,椰菜切粒/片,最緊要有韓式黑麵豉

首先用油炒熟醃過豬肉碎盛起,再爆香麵豉醬,要灑酒,跟住炒香洋蔥至軟身,加埋椰菜,紅蘿蔔粒,加入麵豉醬,將豬肉碎回鑊,加水煮至紅蘿蔔粒軟身,水份開始杰身,加糖,用生粉或粟粉打獻就可以熄火嘞.

將白麵條淥熟,過冷河,放係碟上,加青瓜絲,蛋絲,炸醬就食得.

味道唔錯,不過原來麵豉醬都幾辣,好彩煮到中途試味發現,即刻倒咗一半汁,再加番一半水溝稀,先至可以食得入口咋.