月餅課程(2)-士多啤梨冰皮月餅

今日下晝繼續學整月餅,今次係整士多啤梨冰皮月餅,冰皮月餅皮係用士多啤梨汁加焗/炒熟麵粉,加糕粉,白油,糖搓至滑身,放入雪櫃雪凍.

餡心則用士多啤梨汁加少少糖煮溶,加粟粉水煮完後雪凍,雪硬後切粒狀作餡心備用.

餡料主要用開邊綠豆浸軟後加水煮爛,再隔去水份壓成蓉,加油,糖,粟粉水等,煮至捻起可成四方形,再攤凍,然後加芝士忌廉,糖霜,士多啤梨乾切碎粒攪拌就完成.

用餡料包住餡心,再出冰皮包住外層.

外層碌上糕粉,壓入模中再吸出雪凍後就食得嘞.

一人可以有5個帶走,番到屋企食咗一個,唔係好甜,都幾好食,唔錯.

特色蛋糕甜品班-第九課-雲尼拉雪糕&合桃蜂蜜蛋糕

眨吓眼已經番到第9堂,今日學嘅甜品&蛋糕,其實係重複上期課程,即係已經學過,但上次Miss無用雪糕機,所以雪糕係短時間根本仍然好稀,但今次Miss自備雪糕膽帶回來雪定,所以雪糕攪完後好滑,好好食,攪到有啲同學想買部雪糕機添.

一人分得唔算太多,但少食多滋味,無所謂啦.

至於合桃蜂蜜蛋糕,本來焗兩個,但因為一個被焗爐爐溫唔妥,攪到焗燶面,有啲遺憾,但蛋糕內在就無乜問題,都好鬆軟.

除咗即場食之外,一人都可以攞走一塊.