合桃香蕉Muffin

唔知點解我次次整Muffin都唔係幾掂?其實Muffin係比較蛋糕容易整,所以有時睇落越簡單容易嘅野,越考起人,不過我份人就唔容易咁快屈服,所以今日又嚟試吓再整.

我將蛋加砂糖就好似海綿蛋糕咁打到好杰身,先開始慢慢分幾次落油,奶,再落香蕉茸,最後落過篩低筋粉,全麥粉,泡打粉等輕手撈勻,再靜置5分鐘左右,先用湯匙倒落紙模中,再灑上粗粒合桃碎係面,就可以入焗爐焗嘞.

一路焗已經聞到好香蕉味,約25分鐘就可以出爐,不過升得唔係好均勻.

趁熱切開睇吓點?都叫做OK啦,至少無沉底,都幾鬆軟,不過唔知攤凍後會如何?我準備明日攞去送俾朋友食.