芝麻合桃香蕉包

早幾日見到醒目媽咪自創香蕉合桃包咁吸引,又話好好食,一於試吓跟佢整番一個嚟食.

今次因為即興,所以祗係用直接法,我選擇將香蕉連麵粉一齊搓勻,但低估香蕉含水量,結果成個麵團打完好黏手,造型時比較困難,要不停加手粉,做咗個3辮包,摺好放係模內,而面頭就灑上芝麻.

呢個就係焗好嘅樣.

甩模後.

攤涼後切開睇吓點先? 都發得唔錯喎.

食一片先,唔....好香合桃味,但香蕉味唔夠,可能因為祗落一隻蕉嘅原故,但都好鬆軟,幾好食喎.醒目媽咪無介紹錯.