豆沙捲

蒸完鹹羅勒香草花捲後,今日就蒸甜豆沙捲,但始終因為豆沙黏唔穩麵團,蒸好後就會漏番出嚟,真係無乜計.

蒸之前.

蒸好後.

派對開心小食課程-第四課-蛋白脆糖

今堂仍然學整糖,做法都好簡單,主要將蛋白加超多份量糖打至企身,再唧成好似花塔餅形狀,低火慢焗至脆身,但都要有啲技巧,就係蛋白要打至起紋後先分幾次加糖,每次都要打到蛋白企身,先可以再加糖再打.

本來應該好快完成,但Miss一時計錯數,用多4倍糖,而祗係2倍蛋白,後來祗好再加入蛋白中和,但已經用咗成個鐘打蛋白.

其實另外要溶咗苦朱古力加入酸忌廉混合成餡料,當脆糖蛋白焗乾冷卻後再夾入朱古力醬.

唧好一粒粒好似花塔餅蛋白脆糖.

灑上玉桂粉/唂咕粉係面,再用低火烘焗,之後熄火再焗至乾身.

另一部份就唧成蛇餅.

呢個脆糖最好同酸味生果一齊食,咁可以中和脆糖甜味,我自己就唔太鍾意食糖,所以祗係攞咗少少番屋企試吓就算.

羅勒香蔥花捲

繼前幾日用羅勒香草焗西式包後,想試吓用佢嚟蒸中式包O唔OK? 所以今日就整咗呢個加入切碎羅勒香草,蔥白切粒同麵團搓勻嘅花捲.

我仲加多少少鹽,有啲鹹鹹地原來味道都唔錯架.

羅勒火腿洋蔥包

整呢個包,主要有3種材料,事前要將洋蔥,火腿切丁,放入焗爐焗乾身,一方面以免出水,另一方面可以增加香味,而羅勒就用自家哂乾咗浸軟切碎混香料入麵團,加橄欖油一齊與麵團搓勻.

當完成發酵後,將麵團切成等份滾圓放入塗油模中作最後發酵.

係焗中途已經聞到好香羅勒香草味,不過今次焗得麻麻地,面有啲燶.

甩模反轉

切開試食就唔錯,OK架.

上淘寶網買野,要注意速遞附加費!!!!仲唔俾人即場驗貨...

今日遇到一件勞氣事情,話說上個禮拜係淘寶網買咗野,兼俾埋運費,以為一切順利喇,到咗今朝速遞公司打電話,話會送貨嚟,不過要另再加收多HK$20附加費.我當然追問點解,明明已經俾咗運費,點解仲要再俾?個送貨員祗係強調我住呢區要收,如果問原因,就叫我打去佢哋熱線查詢.

於是根據佢提供熱線電話,接聽個位熱線客戶服務員一味重複強調自2009年3月已開始徵收,至於根據乜野標準去定所謂偏遠地區,又解釋唔到,真係越講越勞氣,我都費事再哂氣同佢講,要求搵佢上司直接反影,接聽嘅上司,話係客戶經理,講野態度同語氣當然好啲,但仍然無交待同點解要收,祗係話係佢哋網站有講明,並且暗示買家自己應該查清楚.

但我想試問買家上網買野?最多係同賣家講明運費,有幾個會去相關速遞公司網站查有無再收附加費?而且唔係香港境內,應該界定為境外,但點解一入到香港,彈丸之地,一個鐘以內車程,再要收多$20? 最攪笑係話自己係經理個職員,竟然話無權批準豁免. 最後我都費事再同佢講落去,我祗係要佢記低我嘅投訴,同埋將貨退回賣家,我將決定告知賣家後,佢又要求我收貨,寧願佢哋俾附加費,真係好唔想益呢間速遞公司,

事後再上呢間速遞公司睇清楚,竟然發覺佢哋唔知係咪俾人閙得多,改咗個名目叫做"特別地區附加費",無論收件或附件人都要俾,而幾乎全香港地區,除九龍外,全部都要收,你話係咪取巧呀?

我寫出嚟除咗勞氣外,仲想提醒各位上淘寶網買野網友要留意,否則就好似我咁激氣.

你哋有興趣就去參考吓喇:

http://hk.sf-express.com/tabid/165/InfoID/1141/Default.aspx

呢間咁嘅速遞公司下晝仲離譜,當賣家肯幫我俾$20附加費後,個速遙員再送貨嚟,竟然唔俾我拆開驗貨,要簽收先得,我即刻唔簽,叫佢攞番走,後來我同賣家講要取消交易,佢又再幫我聯繫番呢間野,應承俾我驗貨,你話係咪激死人.

佳節精選課程-第四課-蜜煎金蠔&家鄉鹹湯圓

今日學嘅兩款過節菜色,有蜜煎金蠔&家鄉鹹湯圓.

首先將金蠔洗淨後,再出生粉搓揉群邊,再洗一次後,索乾水放入碟中,加紹酒,薑汁,糖,麻油,隔水蒸約15分鐘,取出金蠔,隔出汁料.

燒熱鑊,爆薑蔥後,將金蠔回鑊煎至金黃色後贊酒,加入調味,蜜糖就完成.,味道唔錯,又容易整,我得閒都會試吓整.

另外將魚尾放入水中滾成魚湯,加紹菜,然後切碎馬蹄,冬菇,紅蘿蔔,芹菜,芫茜,紅蔥頭碎起鑊將上述餡料,免治豬肉一齊炒至熟,加調味獻汁兜勻,上碟攤凍.

糯米粉加少許澄麵粉,用滾水撈勻後加凍水,搓至成團.

包入餡料,成為鹹湯圓.

放入熱滾水內煮一陣,再放入魚湯再煮至浮起,就完成.

好少食鹹湯圓,但都幾好食,不過糯米比較滯,唔可以食太多粒.

椰糖蒸蛋糕

去馬來西亞旅行時,係馬六甲買咗當地正宗棕黑色椰糖番嚟,今日就用佢加少少椰汁蒸雞蛋糕.

睇吓蒸完出嚟幾圓幾靚,自從上次換咗隻泡打粉後就無問題.

切開見到蛋糕組織都好鬆軟,食落有好香椰糖味,唔錯,下次可以再encore.

派對開心小食課程-第三課-軟心朱古力

今日仍然教整朱古力,總共有3款,全部以朱古力軟心(Truffle)為主,分別以黑/白朱古力切碎坐溶加入牛油,淡忌廉攤涼備用,抽起一部份用機打至淡色杰身,唔夠硬就放入雪櫃雪一陣,攞出用挖瓜刮刮出圓球形雪至硬身,一部份放入唧袋.

至於朱古力外層或殼,就將黑.白朱古力坐溶,將白朱古力倒入模中,等一陣將溶液倒出,用膠刮刮平模表面,放入雪櫃雪硬後,唧入黑朱古力軟心約7-8成滿,再放番入雪櫃雪硬,將白朱古力溶液倒至滿,可以遮蓋軟心,雪硬後倒出就完成.

另外搓成圓球形,或唧成長條形軟心,將白朱古力溶液少許放在戴有膠手套手心,將軟心放上滾上一層溶液放入無糖可可粉內,用匙羹畢係牛油紙上,或者將滾上白朱古力溶液軟心攤凍後,再用黑朱古力溶液劃上花紋.

其實做法唔難,不過除咗倒模之外,都要用人手逐粒做,加工,劃花紋,都要用好多時間,之後仲要用熱水浸洗沾有朱古力工具,好彩我唔好食,應該無乜機會自己做.

香草薯仔牛肉包

繼續整有餡包,不過今次整嘅係咸包,用番低溫中種發酵,上次用湯種發酵法,過咗兩日麵包已經老化變硬.

首先要煮餡,將薯仔去皮切片蒸淋,再壓成薯蓉,用雜香草,黑椒粉再加炒熟免治牛肉搓勻,放入雪櫃雪至硬身,而麵團加入中種後搓至有薄膜,經過兩次發酵,分割,滾圓,鬆弘後包入餡料,作最後發酵,表面剪十字,灑上巴馬臣芝士碎,雜香草.

咁就可以入爐焗喇.

切開睇吓,麵包組織比較柔軟,而味道嘛.....梗係好食啦

佳節精選課程-第三課-肉末釀海參&蛋白杞子扒豆苗

上星期一去咗旅行,所以第二堂無上到,祗係攞番食譜,今堂仍然教過節餸菜,包括有肉末釀海參&蛋白杞子扒豆苗.

其實上一堂已經將乾海參燒過表面,用大熱滾水焗過,呢個動作要反覆3-4次,再將內臟同表皮刮乾淨,再用大熱滾水又焗,所以真係好多功夫,而且價錢又唔平.

今日就將浸軟身海參用薑,蔥段,唐芹加入水中,放入海參拖水,去除腥味,用紙抹乾身後,釀入已調味免治豬肉,馬蹄粒,冬菇粒,薑蓉,外面再用拖過水大蒜絲或蔥綁實,放入蒸籠蒸30分鐘.

未蒸之前

蒸熟後.

另外一樣係蛋白杞子扒豆苗,杞子用熱水浸軟,蛋白,忌廉,上湯調味料,生粉攪勻,先用熱油爆香蒜蓉,加適量鹽,糖,再用大火炒豆苗至熟鏟起,再將蛋白混合物炒至杰身加入杞子放係豆苗上面就完成.

本來兩樣菜色都唔錯,可惜唔知乜原因,海參食落口覺得澀口,結果哂咗,可能係換水時清除內臟未洗夠徹底啩?

粒粒紅豆包

因為遷就奄尖大少食中式饅頭,好耐都無焗麵包,今日又重開焗爐,用湯種法焗咗呢個用粒粒紅豆做餡嘅麵包.

焗爐太細,所以黏埋一齊,變得唔夠圓.

如果出爐新鮮食,就同低溫中種發酵分別不大,但隔一日食,麵包明顯無咁鬆軟.

生日Buffet

眨眼又過咗一年,一月中係我嘅生日,我兩位好朋友專誠請我去灣仔某5星級酒店食dinner buffet慶祝一番.

首先環境幾好,樓頂好高,坐位間距好寬闊,唔會俾人騷擾,而望出去係落地玻璃窗,睇到維港夜景同激光表演,加上現場有隊菲律賓樂隊演奏音樂,情調一流,祗係覺得燈光比較暗啲.

而服務態度一流,每次我哋行開攞野食,侍應生即刻收碟,幫你摺好枱巾放番係枱面上,非常勤力,而所有杯碟襯成一套,好優雅.

最重要梗係食物喇,頭盤有新鮮白酌蝦,已經去殼,龍蝦仔,大隻青螺,帶子,全部都好鮮味,不過我哋食得最多係24個月西班牙火腿片伴蜜瓜片,火腿片唔太咸,好好味. 呀!另外佢哋自製肝醬搽多士都好好食,又係食咗好塊.

熱盤都有好多款,不過我覺西式煎魚,雞卷,豬肉卷始終鞋啲,所以祗係選擇咗呢款香芧牛油汁煎大蝦,蝦肉好彈口.

其實佢哋賣點就係即場煎鵝肝,無限量供應,但我食咗半塊已覺得好油膩,同好滯,最後就剩係食哂旁邊用紅酒煮啤梨片,葡提子咋.

當然我最留意梗係蛋糕甜品,款色都有好多,不過肚容量有限,祗係試咗一半,都好好味. 至於雪糕種類唔算多,祗有4款,不過我哋覺得紅色嘅Rasperry Sebert最好食,味道好清新,有些少酸味,我朋友食咗3球呀.

至於其他沙律就無乜掂過,我哋傾吓又食吓野,食咗成3個鐘先埋單走人,估唔到最後餐茶都可以揀蜜糖檸檬茶,成壺上任飲添.

雖然係佢兩個俾錢,都幾貴架,總共連加一要成$1,7xx,幸好我有某銀行信用卡85折後都要$1,5xx,真係好多謝佢兩位,不過嚟近佢兩位生日,已經約定再嚟同一間酒店,不過另外唔同餐廳再試唔同buffet種類.真係好期待呀!

派對開心小食課程-第二課-心形朱古力盒

第一堂因為去旅行無上到,不過發覺係之前已經教過嘅鬆餅,所以都無乜損失.

今堂教朱古力係用假力,不過Miss都有講解真力嘅調溫度,首先要將心形膠模或矽膠模放入雪格雪至冰凍,而朱古力硬塊切碎後坐熱水溶解或用微波爐叮溶,最好溶解一半朱古力後再將剩下一半加入,慢慢攪至溶解,咁就萬無一失.

將雪凍心形模由雪格取出,將朱古力溶液倒入至滿,再坐在碎冰或冰塊上一陣,然後將朱古力溶液倒出,但其實控制厚薄都好重要,太厚唔好食,太薄又容易碎,跟住就放入雪格雪至硬身甩模.

而盒蓋係將朱古力溶液倒係牛油紙上,用紋刀將朱古力溶液推平,待半凝固時,放心形模係上面,然後用燒熱尖刀沿模邊界一圈,咁乾硬後就可以將蓋攞出嚟,如果發覺邊位唔夠平滑,可以燒熱平底鑊或鐵片,將朱古力盒邊位輕輕移轉1-2秒,就會變得平滑.

之後就製造放入心形盒朱古力糖果,包括有士多啤梨,乾果杏仁合桃塊,提子乾杏仁片堆等.

將士多啤梨浸入朱古力溶液約2/3攞起放係牛油紙上冷卻,再用白朱古力溶液劃上花紋圖案.

另外用匙羹盛起朱古力溶液放係牛油紙上,再將焗香杏仁,合桃,提子&切碎杏脯乾黏係上面,凝固後就完成.

另一做法將朱古古力溶液同焗香杏仁片,提子乾拌勻,用匙羹畢係牛油紙作成堆狀,凝固後就完成.

最後將所有朱古力糖果放回心形盒內,合上蓋面就完成啦.

雖然做法唔複雜,可惜我唔好食朱古力,又無情人可送,所以做完後都係欣賞多過食.

馬來西亞悠遊行-吉隆坡

呢篇係延續上一篇馬六甲,第3日朝早退房後坐的士去馬六甲中央車站,不過係馬來西亞坐的士好多都無咪表,所以上車之前一定要講好價錢先好搭,以免搭完之後打死狗講價.

去到中央車站,就去唔同汽車公司買票窗口,睇吓時間,揀最快開出個架就行埋去買票,其實基本上每半個鐘已有車去吉隆坡,所以唔駛等好耐咋.

行車大約個半鐘左右已經去到吉隆坡外圍,但短短路程由於非常塞車,足足再坐多45分鐘以上,仲未埋到總站,結果全車人都落哂車,司機叫埋我哋兩個都落車,手指指前面方向係總站,所以祗好落車攞埋行李,幸好係馬路旁邊搵到的士,司機仲識廣東話,佢話去酒店$15馬幣,原來路程好短,5分鐘已經到預訂酒店,即係又俾人斬囉,無法啦,鬼叫你係遊客咩!

放低行李後,行出酒店,見到有lift上行人天橋,原來係通去著名"Pavilion"商埸.地庫有個好大food court，同埋supermarket，我哋係度叫咗一個湯麵，沙爹，仲食埋沙冰，不過價錢就貴過馬六甲，後來發現買同樣手信都貴過馬六甲，早知就係馬六甲買齊好過。

跟住由另一出口行出去就係著名淮海路Bukit Bantang,呢條街好似彌敦道，係做遊客生意，由於落雨，行咗一陣就行番去Pavilion商埸，再經酒店旁邊馬路步行去雙子塔，因為下晝當然無得上skybridge啦，祗係係商場行吓，但係全部都係名牌，唔啱我哋睇，所以行番出嚟外面影幾張相留念就行番去酒店，順便搵吓附近單軌車站，準備明日去參觀名勝同唐人街。

夜景係番到酒店附近街道影，因為太近，我部相機仔影唔哂，其實係酒店房間都睇到單塔架，不過無咁清楚。

KLCC雙子塔商場

晚野再去Pavilion商埸food court食埋晚飯，不過又貴又唔好食，最搵笨最貴一餐，然後再去超市買生果番酒店食就休息嘞。

第４日開始攞住之前係網上download地圖，搭完單軌火車，跟住轉咗兩次唔同線火車，再行咗成30幾分鐘先去到嘅舊火車站。

呢個係酒店附迎單軌火車站，離開酒店行５分鐘就到好方便，所以以後個幾日都係盡量搭佢，再無搭搵笨的士嘞。

吉隆坡舊火車站，好有英國式彩，而且裡面都好大。

回教清真寺，不過講明非回教徒，謝絕參觀，所以祗係外圍影相就繼續去另一個地方。

呢度又有一群好有英國式彩建築物，好似係乜野紡織博物館之類，又係無得入去參觀，祗可以係出面影相，但朝早天氣真係好炎熱，成３０幾度，又攰又熱，老咗真係唔好自由行呀。

跟住仲要繼續行去中央市場，主要係賣工藝品，無乜好睇，唯一好處有冷氣同俾$0.5馬幣去厠所，過完冷河回完氣後，再向後行去唐人街，個度比較雜啲，好似香港女人街，打橫打直兩旁街道有花，手信賣，最多嘅係冒牌手袋，Ｔ恤，波鞋，結果祗係買咗食嘅手信，豬肉乾，蝦肉乾，飲咗杯出名嘅羅漢果龍眼燉冬瓜水就走嚕.....不過今次睇地圖見到附近有單軌車站，所以就沿住方向去搵，結果俾我哋搵到，咁就慳番唔駛轉兩次火車同車費，番到酒店放低手信後就出去食晏，今次去食肉骨茶，穿過Pavilion商埸，橫過淮海路，沿住一條小路行去後一條出名燕美路IMBI，個度有幾間賣肉骨茶同埋炒粉鋪頭，但因為下晝去到又已經過咗食晏時間無乜人，兩個人叫咗過細煲，加一碟炒菜同兩碗飯，原來個煲野好多料，裡面有豬軟骨，排骨，粉腸，豬肚，仲有好多唔同菜，加埋油炸鬼，豆腐卜另上，食到捧住個肚，味道都幾好，唯一係無冷氣，要一路食一路抹汗，真慘！

仲有番轉頭行另一條路有幾間肉乾店，售價平過唐人街好多，唉！又做咗老襯喇。

晚上今次去附近一間戶外式客家飯店食客家菜，佢嘅停車場好大，至少可以泊成百架車，大部份人都係揸車嚟食飯，而食飯地方80%以上都係戶外，如果落雨就有悵蓬伸出遮檔雨水，但原來價錢又幾平，食得過一餐。

睇吓幾多車泊係度，仲好有園林feel添。

一宿無話，第５日要搬酒店，因為想走時坐機鐵去機場，以免塞車誤點，結果係網上揀咗一間離機鐵站約１０分鐘路程酒店，搬完後無所事事，行去中央車站探路睇吓明日寄行李航空公司櫃位，同埋機鐵時間表，食完晏後番酒店休息一陣，約４點幾出發，點知又落雨，今次仍然坐單軌火車去一個叫＂秋吉＂地方，資料話個度有生果，蔬菜大市場，另外一面就賣衫褲鞋襪，點知去度市場好細，加上又落雨，有啲流浪漢瞓係行人天橋，四圍都唔係好乾淨，於是急急腳搭番車落淮海路行商場好過，到徬晚就行去阿羅街食飯，叫咗田雞粥，椒鹽中蝦，炒菜等，味道都ＯＫ，繼續再買沙爹，燒雞翼番酒店食。

最後一日退房後就拉住行李去車站，買咗當日機鐵車票，再行埋去航空公司櫃位寄行李同check-in，攞埋登機証就行去大堂中間買車票搭另一條火車線，去一個叫Mid Valley地方，個度有一個號稱亞洲最大商場嘅Mega Mall，入到入面真係好大，由起點直望唔到盡頭，總共有四層，又有戲院，遊樂場，保齡球場，家樂福超市，Jusco幾層，有好多香港品牌高店，最主.....主要嚟呢度原因係有冷氣，可以消磨幾個鐘. 混吉完夠鐘就搭車番中央火車站轉機鐵去機場番香港嚕......

終結今次旅行真係順風順水，之前計劃去嘅地方全部都去到，駛錢唔算多，大部份人都識講廣東話，普通話同英文，鋪頭都好多中文字，完全無溝通上問題，食野搭車價錢都平過香港，所以係一個絕對適合自由行嘅地方，下次我諗會再去馬來西亞其他地方玩，因為面積實在太大，一次去唔哂，其實今次已經係我第３次去架喇。