佳節精選課程-第三課-肉末釀海參&蛋白杞子扒豆苗

上星期一去咗旅行,所以第二堂無上到,祗係攞番食譜,今堂仍然教過節餸菜,包括有肉末釀海參&蛋白杞子扒豆苗.

其實上一堂已經將乾海參燒過表面,用大熱滾水焗過,呢個動作要反覆3-4次,再將內臟同表皮刮乾淨,再用大熱滾水又焗,所以真係好多功夫,而且價錢又唔平.

今日就將浸軟身海參用薑,蔥段,唐芹加入水中,放入海參拖水,去除腥味,用紙抹乾身後,釀入已調味免治豬肉,馬蹄粒,冬菇粒,薑蓉,外面再用拖過水大蒜絲或蔥綁實,放入蒸籠蒸30分鐘.

未蒸之前

蒸熟後.

另外一樣係蛋白杞子扒豆苗,杞子用熱水浸軟,蛋白,忌廉,上湯調味料,生粉攪勻,先用熱油爆香蒜蓉,加適量鹽,糖,再用大火炒豆苗至熟鏟起,再將蛋白混合物炒至杰身加入杞子放係豆苗上面就完成.

本來兩樣菜色都唔錯,可惜唔知乜原因,海參食落口覺得澀口,結果哂咗,可能係換水時清除內臟未洗夠徹底啩?