成功自製燒腩肉

好耐之前曾經焗過一次燒肉,但皮完全唔脆,之後都就無再整過,但見到好多網友都成功做到,於是又想再嘗試整吓,昨日去街市買咗舊比較正方形腩肉,洗淨出水後,搽上醃料同酒,放係雪櫃一晚,抽乾水份,今朝再攞出嚟吊咗8個鐘,再用粗鹽蓋實豬皮面,旁邊用錫紙圍邊,焗約50分鐘,將鹽塊/錫紙除去,繼續焗至皮脆為止,其間要攞出嚟用豬插均勻再插豬皮.

睇吓呢舊就係焗完出爐嘅燒腩嘞,望落都唔錯啩?

由奄尖大少手起刀落斬大舊燒肉,未到開飯兩個已經食咗一半有多,真係皮脆肉滑,自家製用新鮮豬肉,寧舍不同.

派對開心小食課程-第五課-蝴蝶酥

過完新年又繼續上烹飪堂,今日教整酥皮,同整蝴蝶酥,其實已經學過好多次酥皮,各導師方法大同小異,今次教摺法係3x4x3x4,即共144層,阿Sir話已經係最盡層數,唔好再摺,因為會令層數模糊,變成反效果.

今次3個人一組,自己整,務求各人都有機會做,做好嘅酥皮,最好放係雪櫃一日先開酥皮,焗出嚟會好啲.

經過一輪功夫,將酥皮碌薄,底面灑上砂糖,由兩邊向中間捲好,切成等份就可以攞去焗喇.

一路焗已經聞到陣陣香味,出爐攤凍後食,非常好味又唔太甜,真係好正,但大部份好食嘅野,都唔係好健康,所以小食多滋味就好嘞.

甘荀方包&香蕉合桃朱古力鬆餅

今日又一心二用,同一時間整兩樣野,就係甘荀方包&香蕉合桃朱古力粒鬆餅.

因為仍然係新年,所以做麵包都整色整水,就係用甘荀一半刨絲,一半甘荀蓉,同麵團一齊搓勻,加埋低溫中種,就焗咗呢個甘荀方包.

今次因為最後發酵時間夠,所以四邊頂角.

攤凍切開睇吓都唔錯,但因為水份比例多,兩側始終都有啲收腰現象.

趁麵包發酵期間,就焗咗呢個香蕉朱古力合桃鬆餅,準備明日送俾舊同事試吓,今次用咗第二個食譜,將牛油加糖打至鬆身後,加入蛋黃,麵粉,泡打粉,奶攪至滑身,另外打起蛋白加糖至企身,再同麵糊混合一齊,果然效果好好多,係我整咁多次鬆餅以來,最成功嘅一次.

可惜焗爐溫度唔平均,攪到有啲比較燶,有啲又唔太上色,下次再諗吓點樣調較爐溫先.

佳節精選課程-第七課-甘荀菜肉水餃&水餃皮

新年過後,又恢復上烹飪堂,今日教嘅菜肉水餃,自己平時係屋企都會包,但特別之處係教埋做水餃皮,仲加埋甘荀汁,特別健康啲,顏色都靚啲.

水餃皮主要用麵粉,鹽,水搓成麵團,切開數大塊,再搓成圓柱體,切等份一粒粒,用棍碌薄成水餃皮,但都幾哂工夫時間,要逐塊碌薄

至於餡料,其實視乎各人口味,可以全素,或加免治豬肉,今日嘅餡料包括已經拖水椰菜,甘荀,木耳,全部切絲,最後加調味,薑蔥汁等撈勻,用水煮熟水餃後再放入另一鑊已加入麻油滾水中,除咗可以增加香味,最主要係餃子唔會黏埋一齊.

呢碟係甘荀菜肉水餃.

呢碟係俾食素同學,餡料無加肉,至於試食後,就覺得水餃皮比出面街買現成嘅煙韌,好食啲.如果自己整要多啲人食會好啲,一個人就唔好哂咁多功夫囉.

破例食菠蘿油

自從去學整麵包之後,知道菠蘿包材料,已經介食咗菠蘿包好耐,但聽講元朗呢間餅家,菠蘿包好正,所以破例買一個試吓.

既然破例,就索性夾埋牛油.

咁就變身成為菠蘿油嘞.

但.....一啖咬落去,成個包已經扁哂,唔駛講梗係落咗麵包膨脹劑喇,不過回心一計,祗係賣$3一個,計埋材料,人工等等成本,就收貨算吧,都係試一次啫,我應該唔會再買嚟食.

麥包-麵包機

自從舊曆年前蒸完N底糕後,已經有好耐無自製任何食品,因為要清咗啲糕先,其次天氣太凍,成日都唔想郁,做完之後洗碗碟,更加凍,自來水好似冰水咁.

卒之今日見到啲糕已經清得7788,所以去整麵包嘞,但為咗唔想洗咁多工具,所以就搬出麵包機代勞,仍然用低溫中種法.

由於麵包機唔可以較爐溫,所以焗出嚟比較深色.

加上麵包機發熱線係環繞旁邊,唔係上,下面,所以麵包四周比較燶,食之前要批皮先得.

切開後麵包組織都OK,當然無自己搓麵團,發酵同用焗爐焗咁好,但就乾手淨腳,放哂材料入去就攪掂,勉強食埋呢幾日,等天氣無咁凍先再搓包.

開年行大運,兼夾入廟拜神

今日年初二,例牌要去奶奶屋企開年,晏晝食完開年飯後,就進行指定動作,由奶奶率領大家逐間廟拜神祈福,希望來年保佑合府平安,大人工作順利,事事順景,小朋友就學業進步.

首先去第一間係文武廟,今日可能陰天落雨,所以唔算太多人,不過入面煙火都好勢利,有一部份家人就會順便求簽,我就無做,因為如果求得下簽,就成日會有陰影,都係隨遇而安就好喇.

接住就行去呢間道教"省躬草堂",入面唔係燒普通香燭,而係燒檀香,所以行入去聞到檀香味道,個人幾舒服,仲有求簽之前要擲勝杯,問"大將軍"係唔係度?若果擲到3次有兩次係正杯先可以繼續求簽,否則求到都會唔靈喎.

最後就去埋天后廟拜埋天后娘娘先可以收工,打道回府.

唔知係咪覺得拜得神多神庇佑呢? 所以奶奶要我哋拜足咁多間廟,我自己就無乜所謂,祗要大家團團圓圓,高高興興就好.

終於蒸完糕喇!

眨吓眼又過咗一年,年近歲晚,我呢種鍾意係廚師攪攪震嘅人,點會錯過機會呀?但今年比較辛苦,因為奄尖大少要加班,所以得我自己一個人大掃除,洗床單被袋,仲要蒸糕,都幾踢腳,所以唔可以一氣呵成蒸糕,分開幾日先蒸完哂. 睇吓我蒸咗啲乜糕?

今年用咗呢隻出名糯米粉蒸糕,本來買埋粘米粉,點知攞錯咗,攪到買咗兩包都係糯米粉,仲山長水遠係大埔墟買,所以由佢擺係度用就算,費事哂車錢去換.

南瓜黃金鯉魚糕加兩個樣衰唔夠油甩模細年糕,用咗呢隻糯米粉好似軟身啲.

芋頭糕,芋頭唔夠粉,完個芋頭我唔太識揀.

馬蹄糕試用咗另一個食譜,但糕身比較削,下次都係用番自己嘅食譜.

仲有一大底蘿蔔糕,自從舊年去學整蘿蔔糕,用切條方法,奄尖大少鍾意食,話可以食到一條條蘿蔔絲,所以今年都沿用番呢個切法. 無裝飾糕面,原因係有個麻煩友唔鍾意芝麻&芫茜,所以慳番.

我趁蒸糕空檔時間,仲整埋髮菜江瑤柱炆冬菇蠔豉,留番新年期間做餸.

最後祝各位網友新年發財,萬事如意,來年虎虎生威,DIY次次成功!

佳節精選課程-第六課-七彩腰果炒雞丁&荔芋春卷

今日學嘅兩款菜色,分別係七彩腰果炒雞丁&荔芋春卷

七彩腰果炒雞丁,首先將腰果放落已經加咗砂糖滾水中,滾2分鐘,撈起索乾水份,再放入暖油內炸至金黃色,隔去油份,灑上少許海鹽備用.

將3色椒,洋蔥,沙葛或馬蹄,菜脯切粒,雞脾肉切粒稍為醃下再走嫩油,然後燒熱鑊,爆香薑茸,乾蔥茸,洋蔥粒,將所有菜粒加入炒勻贊酒,將雞脾肉粒回鑊,落調味料兜勻,上碟後撤上腰果就完成.

準備各種材料

而荔芋春卷,就首先要將芋頭去皮切大塊,隔水蒸淋,而鹹蛋黃亦一齊蒸熟,全部壓爛成茸,免治豬肉加入調味醃一陣,加埋蔥粒,芫茜炒熟同芋茸,鹹蛋黃茸撈勻成餡料,用春卷皮包起落鑊炸,初期用中火炸至浮起變金黃色,撈起再開大火回鑊炸一陣,將油迫出,索乾油份上碟就食得喇.

手震影得麻麻.

春卷即炸即食,熱辣辣當然好味,但都好熱氣,所以我食咗一條,就放棄權利,讓俾其他同學食,而腰果炒雞丁,味道幾好,祗係切粒粒功夫較多,嫌麻煩可以用雜菜粒代替三色椒.

健康蕃薯方包

整俾自己食當然要健康啲,我用咗昨日食剩蕃薯壓成蓉,加入麵團內搓勻,仍然用低溫中種,不過唔知係咪呢隻橙色芯蕃薯水份較多,攪到搓好耐都仲好黏手,最後用棍碌時要落好多手粉先捲得到放入模裡面.

今次焗完係平面,不過無方角,自己食無乜所謂,都係咁食落肚啫.

雖然已經比平時焗多5分鐘,麵包組織仍然太熟軟,下次都要加多啲筋粉.

派對開心小食課程-第四課-格仔曲奇&美國芝士餅

其實嚴格嚟講應該稱為棋盤曲奇,因為Miss話無圍出面條邊,先叫做格仔曲奇,主要將麵粉,牛油.糖霜搓勻,加入全蛋或蛋黃,最後加入麵粉,唔駛用力搓架,成為麵團就得,然後將麵團分為3份,將其中一份加入唂咕粉或綠茶粉,再分別碌薄成正方形,面積同厚薄都要相同,用保鮮紙包好,攤平放入雪格雪至硬身,而用手指按落去有印就可以攞番出嚟,用水或者蛋液掃係其中一塊麵團上,將有顏色一塊搭上去,稍為按壓,再用保鮮紙包好,又放入雪格雪一陣,稍為硬身後,切去邊位,切成條狀,將一條條雙色麵條相隔用水黏實,可以造成4,6,9,12格不等,用保鮮紙包好,稍為按壓黏實成四方形麵團,又要再雪一陣.

將另一塊原式麵團碌薄至可以包住格仔麵團,包住一圈,隔住保鮮紙稍為按壓後,再雪一陣夠硬先攞出嚟,橫切成一塊塊,放入已掃油焗盤,或掃油錫紙,免黏布都得,而切出頭尾再搓成圓柱形,雪硬切成一塊塊成為雲石曲奇.

跟食譜份量,總共可以切成3盤,呢盤係最後一盤,有6格,同埋12格.

呢盤係焗好咗嘅9格曲奇.

我哋呢班因為人少關係,加上有兩位同學夠鐘要走先,所以剩低好多可以分,不過我唔太鍾意食曲奇,因為實在用太多牛油,所以祗係攞咗十零塊就算喇.

Miss仲同場加影教埋做美國芝士餅,而餅底就係用曲奇餅原色麵團碌薄放入慕士圈內,叉洞焗至上色,倒入芝士忌廉漿放入焗爐開低火慢慢焗,焗完後再加酸忌廉係面,焗多2分鐘就完成喇.

因為趕住放學,所以開大咗火嚟焗,面個樣就唔靚仔.

不過加咗酸忌廉係面就遮咗醜嘞.

一人分咗一舊,不過我覺得酸尼廉可以唔需要加咁多糖,酸少少會好味啲.

椰糖無花果麵包

因為想儘量用咗啲椰糖,所以就改食譜焗咗呢款麵包.

我將椰汁加椰糖溶解後加入麵團,仍然用低溫中種發酵,再加埋切碎無花果乾,今次用模焗成山形方包.

甩模後.

因為心急,未等麵包涼透就切開,結果好似擦子膠咁,下次都要耐心啲,食落唔覺椰糖味,麵包就幾鬆軟.

佳節精選課程-第五課-蝦子冬荀&百花釀花菇

今日學呢兩款菜色分別係蝦子冬荀&百花釀花菇.

蝦子冬荀,首先要將新鮮冬荀去殼削外層厚皮,底部亦要切去硬塊,所以實際可以食唔太多,之後將冬荀切塊出水約4-5分鐘,再索乾水份,走油炸至略為金黃色,而蝦子用白鑊慢火炒香灑上冬荀,再炒勻就完成.

由於淨係靠蝦子味道,所以比較淡,我諗自己整機會不大,因為我最怕走油,好肥膩.

百花釀冬菇,首先要將乾冬菇浸軟去蒂,用生粉洗去表面污穢,用糖,蠔油撈勻蒸約20分鐘, 鮮蝦去殼,腸後,用布吸乾水份,放入雪櫃雪一陣,攞出嚟用刀背拍爛,加調味攪勻後,再用力摔在碗中至有彈性,抹生粉於冬菇裡面,將蝦膠釀入.

蒸熟後淋入上湯汁液.灑上蔥花就完成,呢款菜色比較清淡,味道唔錯.