甘荀方包&香蕉合桃朱古力鬆餅

今日又一心二用,同一時間整兩樣野,就係甘荀方包&香蕉合桃朱古力粒鬆餅.

因為仍然係新年,所以做麵包都整色整水,就係用甘荀一半刨絲,一半甘荀蓉,同麵團一齊搓勻,加埋低溫中種,就焗咗呢個甘荀方包.

今次因為最後發酵時間夠,所以四邊頂角.

攤凍切開睇吓都唔錯,但因為水份比例多,兩側始終都有啲收腰現象.

趁麵包發酵期間,就焗咗呢個香蕉朱古力合桃鬆餅,準備明日送俾舊同事試吓,今次用咗第二個食譜,將牛油加糖打至鬆身後,加入蛋黃,麵粉,泡打粉,奶攪至滑身,另外打起蛋白加糖至企身,再同麵糊混合一齊,果然效果好好多,係我整咁多次鬆餅以來,最成功嘅一次.

可惜焗爐溫度唔平均,攪到有啲比較燶,有啲又唔太上色,下次再諗吓點樣調較爐溫先.