新攪麵機開張-健康紫心蕃薯方包

自從上禮拜由深圳托咗部新攪麵機返嚟,昨日終於同佢開張,因為有食剩紫心蕃薯,所以就整咗呢個紫心蕃薯方包.

一開機發覺躁音同震動都比舊機(350W)大好多,好彩部機吸盤都好穩固,總共有5個速度,我祗係開到3度,打咗約5分鐘,已有薄膜,麵團都好柔軟,真係比舊機快好多.

唔知係咪天氣夠熱,好快已發酵完,可以攞去焗.

我想方包起角,所以用咗350g筋粉,同埋等佢發至9成滿先焗,結果同我預期一樣.

今朝攤凍切開內部組織發得唔錯,麵包過咗一日仍然好軟熟,因為我將6成麵團預早發酵兩個鐘,再放落雪櫃發多4個鐘,去完街番屋企再加埋其餘剩低4成筋粉,其他材料混合,所以麵包可以無咁快老化.