2013年12月29日 星期日

黑糖桂花杞子海珊瑚糖水

呢幾日天氣寒冷又乾燥,諗起好耐之前朋友送嘅海珊瑚(海燕窩),就攞嚟浸軟後加黑糖,桂花,杞子煮糖水,滋潤下,而且海珊瑚膠原蛋白豐富,至啱女士們食.

2013年12月24日 星期二

玫瑰士多啤梨果醬

果醬差不多食完,想偷懶買現成就算,但見到果醬糖漿比例頗重,而且唔會百分百生果,結果決定都係勤力些去生果檔買咗兩盒$25士多啤梨共500g自己煮,昨日將士多啤梨洗淨切丁用沙糖醃一晚,今朝開工,將乾玫瑰花蕾浸軟身後,切去花托,籽唔要,花瓣切碎一齊煮,總共有兩樽.

2013年12月22日 星期日

意大利聖誕麵包-Panettone

我每年都會做一次,兩個月前已經開始用Rum酒浸雜乾果,焗好後酒味會消失,剩低香氣.
切開見到麵包好多乾果,好味.


2013年12月17日 星期二

香草雜果仁碎包

朋友送手信(香草雜果仁碎), 本用作加橄欖油/醋點包食,我就用嚟整包,味道唔錯.

2013年12月12日 星期四

紅酒桂圓包

我copy台灣名店一款麵包食譜,但無跟足發酵方法,因為幾麻煩,前後至少3日,祗係做咗液種冷藏一日就算,除咗桂圓,合桃外,又另外加添杞子,葡萄乾,原本麵包質感似歐陸包,皮脆肉韌,我懶得用鐵鍋蓋,加蒸汽,所以質感係軟熟,食落有淡淡紅酒香味,幾得意.


2013年12月10日 星期二

紅酒雜菜燴牛肋條

BBQ完剩番牛肋條+之前去酒樓食晚飯送嘅紅酒,煮咗呢味雜菜紅酒燴牛肋條,咁又可以打到斧頭,慳番一餐餸錢落袋嚕。

2013年12月8日 星期日

排包

諗起以前經過尖沙咀車厘哥夫,都會不期然被麵包香味吸引入去,當然唔少得會買幾塊排包食,同埋曲奇餅添,現在自己識焗麵包,自然一定會整喇,不過一睇到食譜,又牛油,又蛋黃,就不期然卻步,所以都係間中先會整,今次係送俾朋友食,自己最多食邊位兩塊就算喇.

自家種有機白菜仔有收成喇!

經過上次失敗後,我家主人痛定思痛,決定加強保護措施,又勤力澆水,施肥,終於有似樣嘅有機白菜仔食,不過做農夫真係唔容易架,我都係坐享其成啫.

2013年12月7日 星期六

2人BBQ

剛踏入秋冬,屋企有人已迫不及待話要BBQ,但我覺得未夠凍,而且天氣仲係未夠乾爽,但上星期睇到天氣預告,同氣溫都好適合BBQ,於是就決定今日攪,天未黑但太陽都唔係好猛烈,決定提早燒完,可以將食物攞番落屋企慢慢食,唔駛攪到半夜開燈,一頭煙.
一切準備妥當,可以開始燒喇
雖然兩條友,但都準備咗唔少野架,包括有香茅九層塔鹽焗烏頭魚,串燒豬柳,黑椒金菇,3色椒,牛肋條,魷魚等,全部自己醃製,減少食味精同添加劑.
當然唔少得我至愛燒蕃薯,同粟米,食完好滿足.




試用表情圖案

多謝豆丁主義教學,見步驟唔太複雜,於是依據步驟下載/上載試吓玩.

有興趣就參考以下條link喇.
http://seeddauding.blogspot.hk/2013/12/emoticons.html



2013年11月29日 星期五

暖笠笠黃鱔蠔豉臘味飯

上星期日我家大人突然要求,想呢個星期五食黃鱔蠔豉臘味飯,原因不詳,亦唔知點解要星期五?可能佢睇到天氣預告話天氣會轉冷啩? 其實我都打算會整,不過天氣未夠凍,氣氛不足啫,於是今日開工浸晒蠔豉,蝦米,冬菇,去街市買條靚黃鱔,叫檔主起肉,番屋企再拖水,去邊骨刺,切絲,再蒸臘/膶腸,全部切粒,一切準備就緒,等大人打電話通知放工,就開始洗米煮飯,飯水要落幾滴油同比平時少些水,否則加埋食材後,飯會淋唔好食,將所有材料下鑊兜抄至熟,因為單靠飯煲熱力,未必所有材料可焗到熟,而且加酒炒過香些,終於攪掂,可以開飯嚕...好過係出面食,基本上飯同料各一半,認真足料架,自己食落肚,就唔好慳咯,係咪?

2013年11月28日 星期四

冬日暖暖-芝麻黑糖糕

今朝起身陰陰寒寒,唔係好想出街,諗起之前買咗包黑片糖,成$2X一包,唔可以由佢擺係度唔用,除咗用嚟煲糖水,不如試下蒸黑糖糕,上網搵到呢個食譜,都好簡單易做,糕身都好鬆軟,唔知係咪因為落咗糯米粉呢?


2013年11月25日 星期一

充實而忙碌星期一早上

今日又係新的星期開始,當各人忙於返工/返學,我亦無偷懶,過咗一個充實而又忙碌早上,首先做咗護手霜(白色,可可脂+椰子油)+滋潤晚霜(泥黃色,成份包括有金盞花浸泡橄欖油,Vita E,卵磷脂,花粉等),跟住就蒸饅頭,與此同時趁空檔再燉蛋,咁食完晏晝就有甜品食嚕...

2013年11月24日 星期日

今日午餐-雜錦煎餅

今日晏晝無乜胃口,抄下雪櫃剩餘物資,於是就決定整咗呢個煎餅,我喜歡呢種煎餅質感多過蔥油餅,因為加咗1/5糯米粉,而且不需太多功夫搓/捲,加上材料可以隨便搭配,幾好唔錯.

2013年11月19日 星期二

黑糖薑蕃薯糖水

呢幾日天氣好dry,我其實好少煲糖水,結果都忍唔住要煲番啲糖水滋潤下.

2013年11月18日 星期一

有機白菜仔

呢幾顆係今年第一次下種時種白菜仔,幾乎全軍覆沒,一係就發唔出,一係一出就被雀仔啄爛晒,剩下呢幾顆,真係碩果僅存呀!



自製天然殺蟲藥

係網上搵到話將辣椒水噴係菜葉上至少3日,可以將菜蟲殺死,為咗唔駛咁辛苦成日要捉蟲,即管試下,睇吓得唔得先?

2013年11月12日 星期二

自家種有機菜-update

自從上次成功摘了4顆菜心食後,再次下種白菜仔亦都一日一日長大,但問題是唔落殺蟲藥結果係...菜葉一長大些少已被蟲食到剩番得菜梗,現在某人祗好每晚去"捉蟲/蝸牛",所以堅持有機並不容易呀...
白菜仔開始長大
蔥亦開始成長中

睇吓咁大塊菜葉食咗一半有多,就知蟲幾利害.


2013年11月11日 星期一

是日甜品-木糠布甸

眼見之前買淡忌廉就快過期,唔知用嚟整乜好?雖然已經用咗一半整無油忌廉方包,於是猛搵食譜,發現整木糠布甸係可以用得最多,存貨中又有齊其他材料,於是就即刻開工,好快就攪掂,今日下晝就有甜品食嚕.....

2013年11月7日 星期四

簡單好味忌廉蛋糕

之前買咗盒淡忌廉,就快到期,於是就簡簡單單做咗個海綿蛋糕嚟夾忌廉餡,我今次嘗試不跟食譜做法,反而似戚風多些,就係蛋黃,糖坐暖水打溶後,加入過篩栗粉,麵粉,再加溶牛油同少少水,另外打起蛋白,快手撈入蛋黃漿內,而焗時用耐熱墊底加少少熱水,然後放上蛋糕盤焗,果然出嚟效果軟熟過平時用開海綿蛋糕方法,無咁乾同硬.

2013年11月6日 星期三

自家種有機菜心

多得奄尖大少努力淋水施肥,終於自家種有機菜心有收成喇,菜好爽脆有菜味,可惜因為無落農藥關係,有些菜葉俾蟲蛀到狗牙邊,今晚加咗臘腸/潤腸去炒,好好味!


2013年11月5日 星期二

今日晏晝-自炒....韓式粉絲

今日諗起N年前曾經買咗一包韓式粉絲,搵番出嚟又無壞,於是就抄吓雪櫃有乜材料? 一齊放埋落去炒,最後加少少韓式辣醬,咁就夠晒冶味,唔駛出去幾十元食一碟.

2013年11月1日 星期五

蜜糖柚子汁

昨日買咗一個柚子番嚟食,點知果肉好酸,但如果掉咗佢好似好浪費,靈機一觸,將果肉全部剝晒出嚟,加蜜糖少少水,一齊打爛,原本想隔去渣,但太細微好難隔到,索性照入樽,當果汁飲,但發覺仍然好酸,唯有加水當凍飲,總好過浪費嘛.


2013年10月28日 星期一

自家種植有機菜中

經過夏天種西瓜大成功後,奄尖大少再嚟新嘗試種菜,我幫佢買咗唐芹,水蔥,菜心,白菜仔4種,但下種後水蔥同唐芹種唔出,而白菜仔一長出少少葉,又被雀仔啄爛晒,結果祗剩下僥倖存活菜心,希望快高長大有收成喇,原來做農夫真係好辛苦架.
 這盤係菜心,如無意外,12月頭可以收割.

呢盤係白菜仔剛再下種,長出少少菜葉,已經掛咗紅色膠袋,來恐嚇雀仔,希望可以順利收成到喇.

2013年10月27日 星期日

豐富美味海鮮餐

昨晚同舊同事聚舊,其中一位因為與店主相識,託佢幫我們去街市買當日最靚海鮮,煮法亦由佢幫我們決定,所以在海鮮未上檯前,我們係完全唔知道有乜野食? 樣樣都係驚喜. 以下就係我們昨日菜單,包括有:
1) 凍龍蝦-同一般煮法不同,好簡單用清蒸或灼方法煮熟攤凍,再點桔油食,係完全食到龍蝦鮮味,而且肉質結實,又有膏,好甘香.
2) 跟住上埸係勁大size嘅豉油王煎大蝦, 有膏肉又彈牙
3) 蒜蓉粉絲蒸XLsize蟶子登場,蟶子蒸火侯剛好夠爽,而墊底粉絲吸晒汁液更好食
4) 鮮鮑片小炒,如果成隻鮑魚蒸好容易過火,今次係首先油泡生鮑片,再加韮黃,韮菜一齊炒,好冶味,而且鮑片唔會韌.
5) 薑蔥炒蟹,係花蟹雖然唔算大隻,但蟹肉飽滿,蓋亦多膏,祗稍嫌獻汁杰身,不過好多蔥,非常好食.

6) 今餐主角出場嘞...就係清蒸老鼠班,呢幾年係街市難得一見,魚唔太大條,但肉質非常嫩滑有魚味,大家其實都已經好飽,但經過最後努力,都食剩得番棚骨,可見魚好食程度.
7)醉蝦,呢樣我無食,因為我對酒精敏感,但望落係海蝦,頭又有膏,應該唔錯.

最後食完歇一陣,再食埋甜品,潮州綠豆爽/芋泥,嚟個完滿ending先收工,由於同店主相熟,所以各人俾錢時都好意外竟然咁抵食,一定係友情價,所以大家真係好滿意同開心,我亦寫低呢篇blog作為日後回憶.







2013年10月24日 星期四

今日試做-Carbonara 天使麵

結果係唔難整,不過醬汁份量唔夠多,而天使麵太淋,要煮少一分鐘,而味道都唔錯,OK嘅,不過唔可以成日食,好邪惡架...

紅/南棗合桃糕

因為我好耐之前應承幫朋友整,過兩日有聚會見面,所以趁機會兌現諾言,不過諗住用晒包合桃,結果比例上相對紅南棗糕少咗,祗係見好多合桃在內.

2013年10月23日 星期三

4色5油皂

好耐都無打過皂,原因係現在多數用皂液,比較方便,皂化期又短,兩星期左右已經用得,但皂就要4-6星期先可以用,近排天氣乾爽,又想消耗庫存油量,溫故知新,所以又開始打皂,而且仲可以試用多功能方筒模,真係一舉數得,今次用咗5種不同油,包括椰子油,棕櫚油,橄欖油,可可脂,小麥胚芽油,基本上係有乜油就用個種,除咗椰子/棕櫚油做主打外.
其實皂內有些少汽泡未清除,變咗唔夠完美.

2013年10月11日 星期五

我嘅今日下午茶點-黃梅果醬芝士餅

原來係中秋節前買咗芝士忌廉,準備朋友嚟學整冰皮月餅作餡料用,但點知後來佢病咗無整到,眼看芝士忌廉就快過期,於是就整咗芝士餅,今次係試新食譜,話係文華酒店嘅芝士餅,主要加咗白朱古漿,但超難溶,而且食落味道同平時芝士餅分別不大,所以已經"X"咗呢個食譜,唔會再用喇.

2013年10月6日 星期日

假日無聊之作-豆沙小丸子

朋友俾咗一包白玉粉(糯米粉)我,我擺咗係度好耐都無郁過,今日晏晝無聊之際,諗起上次用剩紅豆沙,索性攞出嚟解凍,半粒鐘已經有得食喇,真係簡單易做,味道淡淡地啱我.


2013年10月3日 星期四

當蜜桃成熟時?

近來去街市,成日都見到有不同品種桃賣,剛剛果醬食完,所以就買咗兩個桃嚟整果醬,加埋朋友送手信杏脯乾一齊煮,但由於杏脯乾已抽乾水份,所以除咗用水浸軟外,煮時仲要不停加水慢火煮,比較新鮮多好多時間,但幸好都係一樣咁好味.

2013年9月25日 星期三

自家製少辣XO醬

前排朋友送咗一小樽自製XO醬俾我,味道唔錯,但因我唔食辣,所以令我有自己整唔辣XO醬想法,況且現在買現成XO醬越來越貴,於是今日就實行開工,其實昨日已經要浸軟同蒸一蒸江瑤柱,再撕成絲狀,我就加咗焗香咸魚仔,左口魚乾碎.蝦米碎各樣,起鑊爆香紅蔥頭碎,蒜蓉,加酒炒香材料,覺得夠乾身,就落豉油,糖,蠔油調味,雖然顏色唔係好靚,但都好冶味,又唔難整,幾好唔錯.