2013年9月25日 星期三

自家製少辣XO醬

前排朋友送咗一小樽自製XO醬俾我,味道唔錯,但因我唔食辣,所以令我有自己整唔辣XO醬想法,況且現在買現成XO醬越來越貴,於是今日就實行開工,其實昨日已經要浸軟同蒸一蒸江瑤柱,再撕成絲狀,我就加咗焗香咸魚仔,左口魚乾碎.蝦米碎各樣,起鑊爆香紅蔥頭碎,蒜蓉,加酒炒香材料,覺得夠乾身,就落豉油,糖,蠔油調味,雖然顏色唔係好靚,但都好冶味,又唔難整,幾好唔錯.


2013年9月18日 星期三

淘寶網購-足療機

上個月淘寶5大物流公司舉行¥1搶集運,包首3公斤,又唔收住宅/扁遠地區費,抵到爛,同朋友一齊搶,結果搶到3次。
原本想買部足浴機,但再三考慮清楚,因為要入水/放水,又要拖出/拖入,恐怕自己用唔到幾耐怕煩就擺埋一邊,最後趁咁平運費,就決定買咗呢部足療機,因為過咗3公斤都係計續重價錢,昨日收到打開,發覺比想像中大部,,試用咗約15分鐘,點知食完飯,沖完涼已經超眼瞓,九點幾已經忍唔住睡魔急call,要上床瞓,今朝起床,都仍然好攰,加上下半身好酸軟,呢啲唔知係咪排毒反應呢?我會試多幾日,希望能改善睡眠質素。

2013年9月15日 星期日

試係手機寫blog

前幾日睇到有網友話可以係手機寫blog,於是我又試吓,果然成功喎,咁日後如果唔方便用電腦時,又多一個選擇,幾好!另外順便預祝大家中秋節快樂。:)

大功告成,所有舊網誌發佈了

自從上星期成功匯入所有Yahoo網誌+相片到Blogger後,但由於相片規格問題,要全部網誌內相片要執過,才可發佈,經過一星期努力,每日執相,現在終於將851篇網誌全部發佈 👏,真係唔希望再有第二次要搬家,不過從中亦可以睇番呢幾年生活點滴,成功喜悅,失敗嘅經驗,都算有得著.

2013年9月12日 星期四

蛋黃蓮蓉月餅

轉過嚟之後,終於開始寫第一篇飲食網誌,一年容易又中秋,我已經幾年無整月餅,因為整完後頭痛要送俾人食,又唔知人哋是否鍾意食?自己又食唔得咁多,今年又心思思想整,於是6月已開始煮定轉化糖漿,用檸檬汁天然些,驚買番嚟嘅用工業用醋精之類,而蓮蓉都係自己炒,少油少糖,叫做健康些,有大有細,分別係半隻或全隻蛋黃,細隻就送俾朋友試吓.


2013年9月8日 星期日

終於搬家成功了!!!!

上星期一開始已經同雅虎申請備份,點知我想得太簡單,雖然有同一文件類別(XML),但原來格式規格不同,嘗試咗好多次都失敗,但又唔甘心放棄,雖然轉咗過嚟未必有人睇,但無理由唔得,終於今日搵到幾位同道中人網友分享,我集合佢哋嘅做法,終於成功搬晒嚟新家,當然唔係百份百完整無缺,加上相片size唔吻合,所以要逐張再調整過,暫時祗係試驗性質發佈5X多篇,其餘以後再慢慢修復發佈喇.自古成功在嘗試,大家要繼續努力呀! :D