可愛座檯手機套

今日晏晝-豬潤牛肉魚湯河粉

本來呢餐平平無奇,重點係河粉自己蒸嘅,昨日蒸腸粉,順便蒸埋河粉,一舉兩得,今朝煲新鮮魚湯,咁就成為美味健康嘅一餐.

蒸腸粉

好耐已經無蒸腸粉,趁現在天氣凍凍地,對住火爐當取暖,所以又整番轉,齋腸OK無乜問題,但豬潤腸好唔掂,捲到爆開晒,幸好自己食無乜所謂喇.

boxing day=整包day

今日boxing day=整包day, 中式.西式一齊發, 法包+椰汁椰糖饅頭, 饅頭係因為應承老友整俾佢阿媽食, 因為佢話阿媽鍾意我整饅頭好食啲喎, 而整法包主要因為買咗入爐高溫石仔,加上又發咗星野酵母,趁有威力時整包就最好嘞.

入爐高溫石仔

法包因爐細,太近上火,結果..包面燶咗,幸好味道唔錯,不過真係馬拉松發酵呀,由昨日11點左右,室溫發到今朝8點,成20個鐘有多,無法鬼叫我選擇用天然酵母咩.

新鮮出爐蛋撻做早餐

其實已經係昨日早上早餐,不過昨日唔得閒寫blog, 由於昨日中午約咗朋友食晏,諗起N年前學烘焙時學過整蛋撻,但從來一次都無自己整過,原因係街買太方便,十元有3個,毋須咁辛苦自己整餐死,但近幾次買到撻皮好唔掂,唔知用乜油搓皮,所以趁可以同朋友分享就決心試整,預早一日搓好撻皮,放入雪櫃,第二朝就開好蛋漿,倒入撻皮內,放入焗爐,20分鐘唔駛就有得食,新鮮出爐蛋撻真係好好食,撻皮又脆,無怪油味,正呀!

冬至晚飯

今日冬至適逢係星期一,返工係無假放,所以通常同家人團圓食飯都會提早,但今年去開酒樓訂唔到位,祗好延後至嚟近星期六食,但又唔想今日正日太冷清,雖然得兩支公,都整咗3樣過節會食餸菜,包括有瑤柱炒豆苗,豉油王煎蝦碌,預早炆好海參冬菇蠔豉豬柳,結果係...食唔晒,真係眼闊肚窄囉.

冬日甜品-杏仁露加蛋

呢排頻頻整杏仁露,主要係買咗成斤杏仁,細粒個種,但又唔係成日煲湯,加上天氣乾燥成日會乾咳,所以就常整嚟食,今次突然想加隻蛋,於是趁煮滾杏仁露,就打隻蛋係碗底,再將滾熱杏仁露倒入碗內,靜置4-5分鐘,半熟在碗內攪拌就食得,咁蛋白會嫩滑啲.

又到聖誕!又到聖誕! 聖誕包Panettone

每年到聖誕,我都會焗聖誕包Panettone,今年都唔例外. 本來Stollen都得, 但我嫌用太多牛油/糖,自己焗可以減油/糖,健康啲,今次因為用天然酵種液,天氣又凍,結果馬拉松式發咗成20幾個鐘才可以焗,而雜乾果皮就早兩個月已經用RUM酒浸,所以焗完試食真係啖啖酒香味,好食.

冬日滋潤甜品-杏仁露

上次朋友來訪時,買了一斤細粒杏仁,為免變壞,而屋企有人都願意食杏仁露,所以昨晚浸咗杏仁同埋小許白米,今日開機攪碎,自己食就無謂隔渣,寧願粗孩啲,少甜食完晏晝即煮,好味!

二人撐檯腳午餐

今日舊同事嚟學蒸饅頭,順便一齊食埋晏晝,我就煲咗南瓜粥,煎家鄉薄撐,最後煮埋甜品,蛋白杏仁露食,真係完美一餐,好過出街食好多.

廣式炸醬撈麵

我有時會無端端想食某種食物,今次都係,而且屋企又有齊材料,咁就當然立刻開工,還下自己心願,我加多啲蔬菜絲,會健康啲,因為第一次試整,祗係網上搵食譜,但唔太多,所以自己再調整比例,加加減減,好彩味道都OK.

貝殼形口金包

終於拎起支針做番個最簡單兩片貝殼形口金包,差唔多已經唔記得點縫?要睇番本書,溫故知新先可以開工,因為布本身花款已經類似拼布,所以無謂再加其他花邊之類東西,下次又唔知幾時先再做?發覺自己越來越懶,點算呀?

班蘭咖吔醬

我以前煮過一次,同今次食譜大同小異,不過唔知係咪我買蛋較細?結果用多3隻蛋黃,而且煮完杰身後我再用攪拌機攪多一次,咁醬會較幼滑,不過都用咗好耐時間,因為怕太高溫會煮到好粗鞋,要慢火慢慢攪,不過自己煮勝在百份百天然,無添加,好味!

藍莓餐包

終於有番啲mood整下野食,夏天實在太熱,完全根本唔想郁, 見有藍莓乾存貨,雞蛋又想快啲消除,所以昨日搓好麵團,低溫冷凍一日後,今朝開工,祗係焗爐太細,包迫到呢...變晒形,不過自己食就算喇,影響不大.

蜜糖迷迭香豉油麴雞下脾

前兩日經過凍肉鋪,見到3隻雞下脾都係$12, 於是買番嚟用自製低鹽豉油麴+自家種迷迭香/九層塔醃過夜,怕肥膩所以唔煎炸,用焗爐焗熟後再搽蜜糖,咁就可以配粉麵當晏晝食,又經濟又唔駛傷腦筋諗晏晝要食乜嚕...

試做環保酵素

適逄朋友要晒果皮,有大量柑肉剩下,於是問佢攞咗嚟試做環保酵素,希望3個月後成功可用喇,不過真係等到頸都長埋呀.

總共有30個柑肉+砂糖,唔想晒錢買咁貴黑糖,求其用白砂糖先.

首先將柑肉切粒並盡量去除果核

再用攪拌機打碎果肉,主要搾取汁液計準水/果渣份量

最後混合糖水就完成嘞

做法就好簡單,但跟住要日日放氣攪拌一次,再等多兩個月,總共3個月先用得,希望唔好發霉喇,否則就前功盡廢嚕...

DIY 護膚品

天氣開始轉涼同乾燥,又係時候要轉護膚品喇. 共做咗4款,包括玫瑰果油卵鄰脂滋潤晚霜(左上), 椰子油可可脂護手霜(右上),可可巴/甜杏仁油/可可脂潤唇膏(左下), 玫瑰果油保濕防曬日霜(右下)

新玩具-氣泡水機

睇韓劇時,俾我發現一部可以係家居用氣泡水機,原來淘寶都有買,香港亦有人由英美等地入口呢種機賣,經過研究比較後,決定都係幫香港人買,比較有保証,雖然價錢幾貴,但係現在又無乜嗜好,所以忍痛決定買咗番嚟,以後唔需要買出面加咗人工色素/味道,高糖汽水飲,唯獨支CO2用完後要再搵賣家幫手充氣就麻煩啲,但都係用完60L後先要充氣.
隨機附上6種唔同味道糖漿,一支可以沖1L,我試咗橙汁味,同街買橙汁汽水無乜分別,幾好飲.

自製豬肉乾

現在街買食物安全成疑,有時間自己整都好容易,求其係網上搵個食譜,再自行加減,第一次整比較鹹啲,下次要加多些糖或減豉油.

狂淘

我每年都會留意淘寶集運有無攪promotion平啲運費?咁就一次買多些要替換家庭用品,上禮拜自取首重有75折,所以決定提早買家庭用品,到年尾大掃除替換就唔駛再買,不過今次要俾國內運費,加埋轉運費都要成$9X港紙,好難計係咪平過係香港買?祗係唔駛四圍搵,格價,顏色/SIZE都會齊些,又慳番時間咋,所以是否要去淘寶買野會平?睇你自己決定.

左邊紫色間條毛拖鞋秒殺價$1人仔,拖鞋下面玫瑰花防熱手套+護墊,$5人仔一套,當然唔係樣樣都咁平喇

 左邊3層浴室雜物架$4.99人仔咋

龍眼紅茶菌二酵

我一向有飲紅茶菌,但唔知道可以二酵,自從加入一個FB發酵食品谷後先知道,見有龍眼就即刻試下,祗用少量紅茶菌液加埋龍眼肉,放在室溫一日,今日飲有些甜龍眼味,無咁酸,幾好.

又嚟蒸饅頭

昨日焗麵包俾自己做早餐,今日就輪到蒸饅頭俾奄尖大少,剛巧星期六會見老友,佢鍾意我整饅頭,所以順便蒸多一份,但又唔想重複一樣味道,於是改下原料,加椰子油/椰糖,變成原味同椰糖饅頭兩款,各式其式喇.

迷迭香蜜糖燒雞扒配意粉

今日趁開爐焗麵包,順便焗埋迷迭香蜜糖燒雞扒,迷迭香因為比較少用,越生越多,於是剪幾棵用嚟醃雞扒,加埋低鹽豉油麴,煮些少茄汁意粉就攪掂晏晝一餐.

Ceasar 凱撒麥包

初時學整麵包時,心中有一團火,狂買下一堆麵包模,若干年過去後今天,無咁狂熱,加上有咗麵包機後,多數都整方包就算,今日攞番呢兩個麵包模出嚟開焗爐焗麵包,當重溫下整形包手技吧.

當年淘寶仲未好流行,係網上同麵包網友買嘅日本貨,都幾貴吓

原本應該係硬包,但我無落石春,蒸汽變成軟包就算,自己食都無乜所謂

懶人叮飯-紫菜青瓜蟹柳絲飯

前排行過759見到有韓式叮飯賣,買咗一盒試下,現在天氣咁熱,真係有米懶煮,今日就加咗紫菜,青瓜,蟹柳絲,用飯素+麻油撈叮飯一齊食,味道幾好,飯軟硬適中,好過上次買日本叮飯.

夏日消暑特飲-香茅檸檬蜜糖水

昨日農夫剪了一堆香草,曬乾後諗住留作日後使用,我見到有香茅,屋企又有檸檬,蜜糖,於是就剪碎一支香茅,加冰水打爛,過濾渣滓後,加檸檬/蜜糖飲,味道清新,都幾好飲喎.

香腸蛋卷

為了唔想晒咗朋友一番心意,又攞部蛋卷機出嚟用,今次加香腸,效果好些,蛋卷熟時可以自動升起,而且之前混合蛋漿再倒入筒中,蛋質感嫩滑些.

簡單好味燒排骨

前幾日經過凍肉店,見到有豬仔骨賣,立刻通知好友,佢搵咗好耐,而且仲做特價添,我都唔執輸,買番一塊,都係$21,昨日解凍後,用醬汁醃一日,今日開爐焗當晚飯餸菜其中一樣,再炒碟菜,真係所費無幾,好過出街食呢.

一份麵團兩款包

昨日打好麵團,仍然用天酵液種,喂完粉兩個鐘頭後就打麵團,再室溫發酵兩個鐘,放番入雪櫃內,繼續低溫發酵12個鐘,今朝室溫解凍後就整形做兩款包,咁就無咁單調. 玉桂提子卷+提子餐包

種瓜得瓜

經過我家農夫辛勤淋水,施肥,為怕有化學物質渗入植物內, 仲親自堆肥,結果終於開始有收成嘞,相片內西瓜三兄弟,左邊係黃肉西瓜,中間係黑美人,右邊連農夫都唔清楚係乜瓜,祗係怕分薄養份,摘咗落嚟先,跟住都會繼續有收成,不止呢幾個瓜嘅, 真替佢開心.

是日午餐-一人前日式溫泉蛋海帶雞卷拉麵

早兩日行過凍肉鋪見到$11/3隻雞脾,於是買番嚟做咗滷水雞卷,今日再用鰹魚粉+味醂做湯底,煮札日本拉麵,再加料落溫泉蛋同海帶,咁就成為日式拉麵,如果出街食又要成$5X,有時間我就寧願自己煮好過喇.

黑椒香草薯片

趁開焗爐焗麵包,順便試下朋友早前送刨絲/片器,用嚟刨薯片,但唔知係咪初用,發覺好難控制,而且刀頭不利,未買我就建議唔好買,費事晒錢,而薯片就厚薄不均勻,又做唔到waffle格仔效果,加上我重手落多咗黑椒粉,變成咗辣辣薯片添.

曬黑嘅土司(米飯麴酵)

早排買咗包米麴,自製豉油麴,係網上見到有網友話可以加飯,糖,水發酵成酵液焗麵包,既然有存貨,梗係要試下,發了30個鐘後,仍然好少泡泡,於是用保鮮紙遮蓋樽口,再用牙簽拮洞,果然6個鐘後已活躍好多,於是立即隔出汁液打麵團,發酵兩個鐘後就放入雪櫃,繼續低溫發酵, 今朝先攞出嚟室溫解凍,約過了一個鐘後就分割麵團作最後發酵,需時都要成兩個鐘,用番平時土司模,焗爐溫度/時間相同,點知焗好打開蓋,完全深啡色,真係唔明係咪因為米飯麴酵液原故,攤凍後明日食之前片去外皮好了,有啲無奈,唉!

米飯麴發酵情形,不過我無再續養,都係用番原本星野液種算嘞.

 睇下幾深啡,旁邊仲爆皮添

蒸饅頭 (星野酵母液種)

今日3號風球高掛,橫風橫雨,不宜外出,留係屋企,無所事事,於是攞出已喂粉星野酵母液種蒸饅頭,但唔明點解用頭尾麵團搓成個舊,會皺咗皮,其他就無事喎.

自家種有機西瓜

農夫一放工返嚟,見橫風橫雨,即刻當機立斷,上天台摘咗呢個西瓜,本來應該可以再大些先摘嘅,奈何風雨無情呢.

跟風-煉奶牛奶包

成日係網上都見有人整,我又嚟跟風試下先,一出爐已經好香,食落都好軟熟,但背後材料...好魔鬼,偶然食下都無妨嘅(自我安慰中).

泡製豉油麴

聽講日本好流行用鹽麴/豉油麴代替普通調味料,話有好多益處,之前朋友都俾咗一些自製鹽麴我,但奈何健康問題,我好少用鹽,反而多用低鹽豉油,昨日行過City叔婆,見到有米麴,忍唔住買咗一包,今日就跟袋上做法,試下整自家低鹽豉油麴先,遲些會試下用米麴嚟做天然酵母焗麵包,睇網上好多人都話得.

忌廉排包

今日突然間好想食排包,於是即刻焗,唔知係咪天氣太熱,人都傻咗添,我無落牛油,所以無咁香味,但都好食喎.

自家種有機通菜

我家農夫近日新品種,就係種有機通菜,菜梗比較幼嫩,因為佢話太老唔好食喎.

一包兩吃

昨晚飯後,無端端突然想食菜肉包,於是即刻係雪櫃攞出天酵喂粉,又將冰格免治豬肉搬回普通冷藏格解凍,今朝食完早餐,就開始攪大龍鳳,因為天酵發得比較慢,終於食晏前完成,我將一部份做生煎包,另一半就蒸菜肉包,生煎包呢..剛煎好即食,包底夠脆,好香口,而蒸菜肉包就夠鬆軟,不同口味,咁就可以滿足到自己,其實生活有時真係可以好簡單就快樂.

今日飯後甜品-夏威夷果仁雲尼拉雪糕拌芒果粒

呢排頻頻整甜品,除咗天氣熱想食冰凍甜品外,就係之前買咗1 LTE淡忌廉,開咗要盡快用完,否則過期就晒咗,今次模仿H字頭雪糕,加咗烘香夏威夷果仁碎,真係好好味,雖然無H字頭雪糕咁滑,但係無加人工雪糕乳化劑同增稠劑,就可以食得放心.