新玩具-雪條模

近排日日都成34度,好鬼死熱,剛好又淘咗啲雪條模具,可以兩用,因為係矽膠做, 因此又可以焗蛋糕,見屋企有椰汁剩,於是買盒淡忌廉,實行整椰子雪糕條,但懶得用唧筒,結果哈哈笑個口整得唔靚,剩低雪糕漿就混合埋成一條,味道唔錯嘅,但由於無落雪糕乳化劑或者蛋黃,所以有啲沙沙地,唔算太滑,自己就可以接受.

新嘗試-咖哩炒蟹(少辣)

近排天氣咁熱,如非必要,真係唔想入廚房開爐,所以無乜可以post同大家分享,今日見雪櫃有半隻紅洋蔥剩下,突然又想食蟹,於是去買咗一隻大肉蟹返嚟,求其係網上搵個食譜,望望就開工,可能因為蟹有鮮味,又唔太辣,都幾好食喎,剩下蟹汁仲可撈埋麵食,一啲都無晒.