DIY開心快活人: 5月 2010

2010年5月31日星期一

無孔4片口金包

呢款係上堂學嘅無孔4片口金包,現在已經好少人做,因為要用一個工具鋏夾實口金邊,所以無孔,但要將布邊塞入口金邊內都有一定難度,唔易做.

2010年5月29日星期六

菠蘿果醬包

今日就用咗前兩日煮好嘅芒果菠蘿果醬做包,今次無用低溫中種,而改咗用普通中種法,即係搓好70%麵團,放係室溫發酵兩個鐘後,再加埋30%粉,其他材料打至起薄膜,就可以第一次發酵,因為天氣熱,所以發酵30分鐘已經可以分割,搓圓後再等20分鐘就可以包餡,而最後發酵都係用咗20分鐘,就已經可以入焗爐.

放已經包餡包包入天使蛋糕模內作最後發酵.

搽上蛋漿就可以攞去焗嚕....睇吓出爐個樣係咪好吸引呢?

甩模後就好似個皇冠咁嘞.

攤凍切開試食先,麵包發得好鬆軟,果醬又唔太甜,真係好"正"呀.

2010年5月28日星期五

近排我每次出網誌都會出現一啲莫名其妙留言,見到有啲網友什至有10幾個呢類留言,真係好離譜,但Yahoo好似無佢哋符,原本係呢度寫blog,係想同大家交流,分享一些自己生活鎖碎事,但現在似乎已經變咗質,攪到好多網友另外開facebook,而我覺得facebook始終對個人私隱保護唔夠,亦唔想再開多一個類似blog,所以暫時決定我會繼續係呢度寫blog,但全部都會設定"不可回應",以避免再受騷擾,請大家見諒.

2010年5月27日星期四

芒果菠蘿果醬

之前整嘅士多啤梨果醬差不多食完,所以今日就整咗新口味嘅芒果菠蘿果醬.

首先買咗兩個超熟嘅菠蘿,加三隻芒果.

菠蘿去皮削釘去芯後,將菠蘿切塊放入鹽水浸一陣,撈起去除水份後,放入攪拌機打成菠蘿茸,芒果去皮後,亦將果肉打成茸,加入適當砂糖,因為要視乎生果甜與酸決定,無一定比例,再加半個檸檬汁,以防變色及增加果膠濃度.

靜置3個鐘後,用煲開細火煮,其間要不停攪拌,直至果醬變濃稠,或用茶匙攞少少放係碟中,用手指劃過,如果果醬分開無融合一齊,就差不多可以落果膠,但我無果膠,就用咗粟膠代替,最後加埋生粉水就完成喇.

記住玻璃樽要放落滾水消毒幾分鐘先可以用嚟裝果醬,否則果醬會好快變壞架. 未煮之前芒果味濃過菠蘿味,但經過高溫煮完後,反而祗覺有菠蘿味,下次再煮可以唔駛落芒果,反正都食唔出,哂料呀.

2010年5月26日星期三

芝麻牛油卷

原本牛油卷應該精緻細個啲,但我唔想捲到手軟,所以變成咗呢個加大版嘅牛油卷, 仍然用低溫中種發酵,呢款麵包同普通芝麻卷分別在於係捲之前,搽上一層溶解牛油,令到焗完後麵包內部組織層次比較分明,我自己食梗係用植物油代替喇.

今日天氣好熱,所以第一次發酵祗係30分鐘,最後發酵亦祗係20分鐘已經足夠.

焗好切開睇吓,隠約見到麵包內部一卷卷.

食落明顯比芝麻卷鬆軟.

2010年5月22日星期六

簡單又好味-雙色饅頭

已經食哂麵包,但又唔想焗麵包要等發酵咁麻煩,所以就做咗呢款簡單嘅中式包點,雙色饅頭做明日早餐.

啡色部份係加咗無糖可可粉,疊埋白麵團一齊捲,再切件,而家作最後發酵.

眨吓眼就蒸熟嘞.

趁熱食咗一個,饅頭好鬆軟,有淡淡朱古力味,間唔中換吓口味都唔錯呀.

2010年5月21日星期五

併布-自己做第一件作品証件袋

已經上咗4堂,終於好艱辛咁完成咗第一件作品,就係呢個証件袋,原來併布係好哂功夫同時間,如果唔係我本身對裁剪都識啲,加埋有時間,我諗真係要學多兩堂先可以完成.

呢個併布圖案,本來係一個花籃,但第一堂導師祗係派紙樣,又無實物,又無相片參考,結果胡亂剪花布片縫埋,知道時已經全部縫好哂,又唔想再重做,所以就變成呢個不知所謂圖案出嚟,真係有啲無奈.

裡面有不同暗格,用作插証件或卡.

攤開前後就係咁款,我諗唔會真係攞嚟用,祗係留為將來做記念品算嘞.

2010年5月18日星期二

新攪麵機開張-健康紫心蕃薯方包

自從上禮拜由深圳托咗部新攪麵機返嚟,昨日終於同佢開張,因為有食剩紫心蕃薯,所以就整咗呢個紫心蕃薯方包.

一開機發覺躁音同震動都比舊機(350W)大好多,好彩部機吸盤都好穩固,總共有5個速度,我祗係開到3度,打咗約5分鐘,已有薄膜,麵團都好柔軟,真係比舊機快好多.

唔知係咪天氣夠熱,好快已發酵完,可以攞去焗.

我想方包起角,所以用咗350g筋粉,同埋等佢發至9成滿先焗,結果同我預期一樣.

今朝攤凍切開內部組織發得唔錯,麵包過咗一日仍然好軟熟,因為我將6成麵團預早發酵兩個鐘,再放落雪櫃發多4個鐘,去完街番屋企再加埋其餘剩低4成筋粉,其他材料混合,所以麵包可以無咁快老化.

2010年5月17日星期一

3片,4片&駁腳口金包

雖然祗係學咗3堂口金包,但見到書上嘅3,4片口金包都好靚,睇完做法圖解後,充膽粗粗跟住做咗呢兩款3,4片口金包.

左邊紫色係3片口金,全人手縫製,不過線步較疏,所以睇到線突出嚟,另外綠色個款係4片口金,我嘗試用衣車車線,但三角位車得差少少,而上口金鉸個位好窄.

另外呢款係上堂學嘅駁腳口金,原來呢款口金唔好用太厚布做,否則上鉸時會好難插針縫落去架.

2010年5月14日星期五

檸檬戚風蛋糕

今朝一早起身,即刻焗咗呢個檸檬戚風蛋糕,因為晏晝約咗舊同事聚舊,想送啲見面禮俾佢.

呢個係17CM模,樣子都唔錯啩?

除咗有外在美,都有內在美架,切開睇吓,食落都好軟熟,但就小甜,因為我估計錯檸檬汁酸味,減咗糖,變咗小甜蛋糕,下次都係跟足落糖算嘞.

2010年5月13日星期四

深圳購物日

今朝起身食完早餐,見到天氣都唔錯,近排因為去咗學口金,併布,DIY護膚品,所以想去深圳書城買啲書參考吓,於是就出元朗坐專線小巴去落馬洲,過福田口岸,順便買張深圳通搭車,唔駛成日搵散銀,咁就仲更加方便嘞.

出咗福田口岸直落坐深圳地鐵4個站,到咗少年宮站,由C1出口直行過去就係書城底層,真係好方便,唔駛上番路面.

底層買嘅係兒童,少年,初中,高中,電腦書籍,梗係唔啱我哋啲成年人喇,跟住就上電動樓梯去第二層,裡面啲書擺得好整齊,有好多指示或電腦俾人搵書,更加有坐位可以坐係度打書釘,而且唔多人,地方好大,又唔擠迫,真係好正呀.

買咗幾本啱心水書之後,再上多一層,係食野同其他商店.望番落去,睇吓幾大.

書城分咗兩個區域,呢邊係賣書.

另外呢邊賣CD,DVD,電子書籍等.

上多一層見到有間賣十字繡,併布嘅店鋪,以我性格,當然又要放低銀兩先走得喇.

係KFC食完過香港無得賣嘅蝦堡套餐後,又再坐番地鐵去福田口岸,轉搭巴士去之前係淘寶網搵到深圳賣家,賣咗部650W勁馬力攪麵機,因為用開個部已經俾我用到打咗柴嚕...問過佢哋服務熱線,淨係檢查部機都要收$70,仲要自己托去整,所以索性買部新機算吧.

係賣家鋪頭,其實係住家式經營,仲賣咗其他野添.

以下睇吓我嘅豐富收獲,包括有:

布料,絲帶,木鈕,鎖匙扣等等.