香蕉蛋糕

每當香蕉成熟時,我總係心思思想攞佢嚟整野食,今次就焗咗香蕉蛋糕,焗好一出爐已經聞到好濃郁香蕉味,聞到都好想食,而且用芥花籽油,又減糖,所以健康啲.

當稍為攤涼啲,就即刻切一塊試食,好鬆軟好香蕉味,不過下次仲可以減少糖.

港式麵包

港式麵包特徵係多油,多糖, 但係正因為咁,所以特別好味,唯有想食嘅時候,間唔中整吓,好似今次就每樣整少少嚟食,包括有雞尾包,墨西哥包(主要剩番喞雞尾包面裝飾餡料,唔好晒),餐包等等, 另外有剩麵團就焗咗提子方包,唔想提子外露焗乾咗,所以捲晒係麵團入面.

薰衣草沐浴液

原本我準備打呢款皂液俾屋企人用,點知有人心急已經買咗一支番嚟用,我本來用開自己打嘅皂皂洗白白,而家就祗好留番自己用, 呢個配方係中性,主要用椰子油,芥花籽油, 橄欖油, 可可脂調配而成,稀釋我就用咗橙花花水, 再加薰衣草精油, 因為唔想加增稠劑咁麻煩,所以就用慕士樽;用試紙試過PH值係8左右,今日就試吓用先.

自製蚊怕水

呢排春天回南又潮濕又熱,一開窗蚊就飛入嚟,咬到我不停抓痕,所以即刻做支蚊怕水嚟噴吓先,蚊怕水主要用香草,包括有香茅, 迷迭香(Rosemary), 百里香(Theme), 馬鞭草, 熱水煲滾,攤凍隔去渣滓.

將香草水+適量酒精,薄荷精油搖勻就噴得,希望可以趕走啲死惡蚊,唔好再咬我.

同格仔餅機開張

今日終於有時間,心情開部新格仔餅機嚟玩,粉漿唔難開,不過最好過篩,令到粉漿幼滑啲,格仔餅機都唔難用,不過雖然兩面都有發熱線,但面個邊好似唔係好上色,但底已經開始金黃色,下次再挑戰吓其他做法.

搽上煉奶,花生醬就成為奶醬格仔餅,好味之餘,都係個句,少食多滋味,自己落咗乜野自己知嘛.

新鮮出爐-波蘿包&熱狗包

原本淨係想整熱狗包用來夾香腸,但心血來潮,突然間想食菠蘿包,於是即刻搓份菠蘿皮蓋上面,出爐後稍為攤凍,即刻食咗半個,果然菠蘿皮夠鬆脆,好味

自己垃垃雜雜嘅午餐

今朝去開街市買餸,諗起屋企買米送嘅粉絲,平時好少用,不如買幾隻新解扇貝起肉,用粉絲墊底蒸做午餐,於是坐言起行就有得食.
蒜蓉,紅蔥蓉用油炒過,所以食落待別香口,好好味,正!

淨係食扇貝,粉絲梗係唔夠飽,於是加熱番兩條焗蕃薯,焗可以濃縮糖份,所以特別香甜架.

另外仲有茶點,係第一次整木糠布甸,雖然個個都話容易整,不過我好似喞得層次唔夠分明喎.

今日下午茶點-檸檬牛油蛋糕

主要想試吓朋友提供嘅牛油蛋糕食譜,剛巧有檸檬,又加埋入去,其實無跟足食譜,減油又減糖,油又兩溝,用咗牛油(6成)+起酥油(4成), 但都好香牛油味喎.
影完呢張相後,搽上RUM酒糖水,再用保鮮紙包實,睇吓明日食有乜分別?

呢兩塊影完相就即刻試食,外皮比較脆,但蛋糕就好軟熟,唔錯.

又買新玩具

幾年前已經見到有格仔餅機賣,興趣不大,所以無諗住買,但近期發現現在啲機已經可以多用途,唔止淨係整格仔餅,自己張信用卡又可以換,於是就決定用積分+補錢換咗返嚟玩吓.
睇相以為好細部,點知去攞時發現成盒都幾大,而且都幾重.

番到屋企,第一時間打開睇吓先,部機實物比相大啲.

第一塊坑紋板可以打平,放上香腸,餡餅之類煎或焗有坑紋意大利香草包,不過話要金黃色,麵包外層要搽油架.

第二塊係用來整夾餡三文治,但餡料要熟透先好放入去夾喎.

最後呢塊就要嚟整格仔餅,說明書有幾款唔同格仔餅食譜提供,不過份量都好多,我會盡快擇日開工試吓呢3種用途先.

第一次煎蠔仔餅,大成功!!

我鍾意食蠔仔餅,但係出面叫餸都係好細碟,仲有其他人一齊食,當然唔好意思自己猛食喇,於是決定自己試吓煎,我跟足原材料,希望味道正宗啲,好似係街食咁好味.
不過為咗健康起見,我祗係落咗1.5個鴨蛋黃,其餘全部係蛋白.

經過一輪工夫,洗乾淨蠔仔再拖水,落胡椒粉,薑汁酒醃一醃,再混合開好番薯粉漿,蛋漿,芫茜等就可以落鑊煎,不過一定要油多啲,蛋邊先夠香同脆,煎好後偷食一啖,果然好好味,又唔腥,今次真係大成功嚕...

加埋蒜蓉西蘭花,就可以開飯,其實我呢個份量煎完有兩底半,所以今晚可以豪食到飽為止,唔駛要就住食,真係大滿足.

斜紋格仔蛋糕卷

前排買咗本彩繪蛋糕卷書,齋睇唔郁手做,好似唔係咁好,今日就決定開工大吉.
首先要焗個蛋糕體先,最晒工夫時間係呢部份,顏色越多分次焗次數就越多,而且又要調色,喞花或線條,加上我係新丁,好少喞花更加雞手鴨腳,不過最終都完成到,真係自己都鬆一口氣.

呢個蛋糕體係用戚風蛋糕,我再加埋用蒸焗法,所以蛋糕比較棉密同軟身.

攤凍後再捲入內餡,放番入雪櫃雪至硬身.

呢個蛋糕卷除咗外觀,仲好有內涵架,內餡係芒果忌廉,因為我切呢兩片係頭尾,所以個樣肉酸D.

自家煮自己食-紅洋蔥牛柳絲飯

紅洋蔥牛柳絲飯-呢幾日天寒地凍,又微風細雨,無特別事都係留係屋企自家煮自己食好過.

甘草酵母金縷梅精華液

精華液差不多用完,今次就整咗呢支甘草酵母金縷梅精華液, 用金縷梅花水,添加甘草,酵母萃取液,甘油,另外再加入佛手柑,燈花精油.

芝麻餐包

連續幾日天氣又凍又落微雨,攪到個人都好沉悶,今朝決定焗好耐都無整過細包-芝麻餐包,今次用湯種法,幸好保持到水準,買相唔錯,唯獨是因為焗盤太細,令到本來圓包變咗形,有啲美中不足.

今日一人午餐-日式咖哩魚飯

雖然魚手指,日式咖哩汁都係現成,不過經過加工,將魚手指焗到金黃,唔駛油炸, 再將紅洋蔥粒,焗香蕃薯粒(代替薯仔)加入咖哩汁裡面, 咁就成為好味嘅咖哩魚飯嚕....

北菇雞盅頭飯

今朝一早起身,天色好陰暗,間中又落下微雨,攪到人心情都好down, 但唔想咁悶足成日,於是打起精神,實行體力勞動,清潔屋企,打掃地方,做完晒之後打開雪櫃,冰格內有急凍雞肉,於是實行就蒸個北菇雞盅頭飯做晏晝,好過出街食.

自己煮去晒雞皮,少油少鹽健康好多.

玫瑰士多啤梨果醬

今次買咗南韓士多啤梨,比較甜啲,不過好似唔夠香,所以加啲浸軟切碎玫瑰花瓣一齊煮,明日就有新鮮果醬搽麵包嚕....

試自製涼粉

個時候見過阿媽用火水罐改裝整涼粉,後來好多地方都有現成買或罐頭裝,已經好少人會自己整,上網搵到食譜同做法,發現唔係咁難整,於是去葯材鋪買咗啲涼粉草,睇吓好似樹枝咁.

洗乾淨就加水煲30分鐘左右,再將涼粉草捽出膠汁,隔去渣滓,再煲滾,倒入粟粉水,攪拌均勻後可以熄火,倒入盤中凝固

凝固攤凍可以放入雪櫃冷藏,再食時取出切粒,但今次因為開始漏咗落枧水,後來發覺再落番,不過涼粉膠汁捽唔夠,加埋粟粉水落時間唔啱,所以比較稀同淡味.

不過加埋芒果粒,士多啤梨粒,椰糖漿就好好食喎,下次再改良應該會好啲啩.

蜜汁叉燒

屋企有人想食叉燒,但我又唔想買街個啲紅卜卜嘅人造色素嘅叉燒,所以昨日買咗新鮮梅頭廋肉醃咗一日,今日就開爐焗叉燒.
今次用蔥墊底,可以多啲香蔥味,又防止黏焗盤.

因為自己食,真係搽蜜糖,唔係麥芽糖開水架.

燒完出爐後再搽多一次蜜糖,再等多10分鐘先切片.

雖然買相無街賣咁靚仔,但勝在夠健康,真材實料.

椰汁棗蓉千層糕

上次整完南棗合桃糕,有棗蓉剩低,又唔想整咁單調棗蓉糕,於是就蒸咗呢款類似印尼椰汁千層糕,減咗糖食落都好煙韌,不過今日中午成26-27度,企係廚房,每隔3-4分鐘倒一層唔同式糕漿,真係好熱,奉勸各位,夏天千祈唔好整呢款糕.

善用剩餘物資-香蜜花生醬

見到新年時買嘅花生,仲剩番好多,於是就DIY花生醬,首先將花生白鑊番炒香, 隔離個碟榛子粉後來無落到.

將炒香花生放入攪拌機攪至成漿糊狀,加入花生油,蜜糖,再攪拌均勻就OK喇,係咪好容易呢? 而且無街買咁多添加劑,防腐劑,不過一次就唔好整太多,以免食唔切會油益.