山形牛奶方包+檸檬蛋糕

好耐之前應承某人會請佢食麵包,蛋糕,今日終於一氣呵成,做齊兩樣,檸檬蛋糕攤凍後會再夾檸檬奶黃醬,咁就檸上+檸喇. 

蜜糖杏仁小蛋糕

準備用作明日送禮手信,最佳食用時間應該係焗好第二日,因為可以令蜜糖沁番入蛋糕內,會比較濕潤,無咁乾.

cannelé (可麗露)

cannelé (可麗露)-係一種法國著名小蛋糕,特點在於外層用蜂蠟包裹蛋糕,令到蛋糕外脆內軟,原本應該用銅模焗,但價錢太貴,而且不易買到,於是改用矽膠模,但效果無銅模咁好,外皮上唔到焦糖色,脫模後再番焗,才勉強似樣,溶蜂蠟都好麻煩,所以應該唔會再整.試食後幸好仍然外脆內軟.

全麥方包-麵包機

我好少用麵包機自動程式,嫌程式太固定,唔可以因應麵粉質感,氣溫,濕度改變,今次破例試吓用全麥包快速設定,不過我用咗低溫中種發酵法,切開睇嚟效果都OK,咁以後可以乾手淨腳啲.

黃鱔煲仔飯

昨晚我家主人提議今晚食黃鱔煲仔飯,其實難度不大,不過準備工夫較多,例如要浸定蠔豉,蝦米,冬菇,今日買咗黃鱔番嚟,要將幼骨切除再切絲,又要蒸蠔豉,冬菇,臘腸,再全部切粒,濽酒全部炒熟,放回飯面再蒸,不過偶一為之都整喇, 睇吓餸同飯比例差不多1:1,好過出街食煲仔飯,得好少餸,所以雖然咁多工夫做都抵嘅,因為可以盡情食嘛..

糖不甩

之前整甜薄撐,用剩芝麻花生糖餡,今日就搓糯米粉整咗糖不甩做下午茶,前後所需時間約10分鐘已經有得食,真係快,靚,正呀! 

牛奶饅頭

今次試吓用麵條機壓麵團,睇吓係咪外皮真係光滑啲,不過可能我係用低溫中種,結果蒸完後都仲係有少少氣泡,未夠光滑,下次可能要再來回壓多兩,三次至得.

DIY 素麵條

今日忘記買上海麵番屋企,因為係我家奄尖大少指定今晚食糧,反正屋企又有中筋粉,於是搬出久違好耐嘅麵條機,實行DIY不求人,但已經好耐都無整過麵條,於是祗係嘗試做一半份量.

當分割麵條後唔想黏埋一堆,於是就用衣架晾起,令麵條稍為乾身.

當麵條有8成乾就可以除下,放係碟中.

煲滾水將都麵條淥熟,再過冷河就食得嚕...,至於奄尖大少評語係麵質幼滑,但稍嫌稔身,有改善空間喎.

三文治忌廉蛋糕

平時好少整蛋糕,今次係因為淡忌廉就快過期,想用咗佢,以免浪費,不過蛋糕稍為甜啲,下次可以再減糖.

今日一人午餐-七彩繽紛炒飯

加入雜菜粒,椰菜絲,蟹柳炒飯多菜少肉係我而家,或將來飲食習慣.

香蔥花卷

係咁寒冷天氣,最好就食番啲暖苙苙嘅包,唔知係咪太耐無整過,所以捲得麻麻地,不過加咗少少鹽,油,爆香蔥粒先捲,所以有一種蔥香味,唔錯.