是日清潤湯水

而家天氣咁乾燥,為咗自己&家人著想,清潤湯水梗係唔可以停,今日去街市買粉葛,檔主提議我加栗子一齊煲,我未試過,不妨試吓,再加埋扁豆,赤小豆同一塊果皮,無落肉煲

簡簡單單祗係呢幾樣材料,加埋一塊陳皮放落滾水裡煲約3個鐘.

3個鐘後就已經飲得,味道幾清甜,我連蜜棗都無落但唔覺得淡.

南乳燒雞

今日焗咗南乳燒雞,但準備功夫係由昨日開始,首先我買咗一隻冷鮮雞,根據呢間店鋪介紹, 佢哋啲雞劏完之後,隔夜以冷風降溫，不經水浸,所以能夠保持雞味好過冰鮮雞,當然價錢亦都貴啲,要$55一隻,番屋企洗乾淨雞後,就落,乾蔥,蒜頭,薑粒,南乳(壓爛),玫瑰露,糖等,醃佢一晚.

一宿無話到今朝係雪櫃攞雞出來,用熱水淥雞皮,再立即用冰水淋一次,主要令雞皮收缩,稍後焗嘅時候皮會脆啲.再將上皮料(蜜糖或麥芽糖,加白醋,玫瑰露加熱成液體)搽上雞身表皮.

跟住要用鈎吊起隻雞風乾約5-6個鐘頭,最好放在當風地方,吹乾雞表面.我吊佢係廚房窗口,開窗吹乾.

過咗6個鐘頭後就可以將雞放入焗爐焗,因為焗爐有燒雞架,所以唔駛翻來翻去.

經過約半個鐘,就已經焗熟,但中間見雞背同雞翼已變燶,所以將溫度教低,熄火後再焗多一陣先從爐中攞出來攤凍.

攤凍後就可以斬件,再將醃雞汁煮滾加生粉作汁,用來點雞食就完成啦.

食完後我覺得幾好,當然唔可以同新鮮雞比,至於皮都係唔脆,但夠乾身可以單獨撕開皮食,但因為我怕肥,所以將皮掉哂. 下次我會試吓整豉油雞,睇吓食法有乜唔同.

烹飪課程-第九課(泰式魚餅&星洲蘿蔔糕)

今日上烹飪課學嘅係泰式魚餅&星洲蘿蔔糕.

第一步當然要刨蘿蔔蓉,然後用油,鹽,糖煮一煮再同粉撈勻,倒入糕盤後,再攞去蒸熟

蒸熟蘿蔔糕後要攤凍,雪硬,先可以切成丁方粒狀

爆香乾蔥,菜甫,免治豬肉,加入蘿蔔糕粒,紅椒碎,再落蛋&調味就食得,我覺得如果改落XO醬,蝦米炒會更冶味,而蘿蔔糕粒最好煎香先回鑊,會比較乾爽.

另一款泰式魚餅,要將檸檬葉切碎,豆角切粒,再加入調味撈勻,撻至起膠,用左,右手互相撻至成圓形,放落鑊中炸熟

炸好就可以開餐啦,味道同出面泰國餐館有9成相似,以後想食就可以係屋企自己整,慳番唔駛俾人賺囉.

凱撒包&法包

點解要做呢兩款包?因為剛買咗兩個新麵包印同埋介刀,要試新野.

就係呢3樣啦

準備功夫將浸水仙嘅石春洗乾淨

隔晚已經發定中種麵團,今次破例加咗2g麵包改良劑,又加埋法包粉

發酵完就用模壓印

但....點知焗完後完全無哂,唉激死人

跟住焗埋法包,放盤石春落底層,倒熱水落盤中,製造蒸汽,麵包面亦都噴咗水先入爐

焗好啦,中規中距,呢種包好難同出面鋪頭比較,因為始終係家用焗爐,中途我已經將石春移走兼散汽,再焗多10分鐘

麵包孔都有唔太大,麵包面算脆幾軟熟,唔太差入到口嘅

終於戰勝曲奇槍

今日趁焗麵包,從雪格攞出早前搓好嘅榛子曲奇餅麵團解凍,再試用曲奇槍,經過上次慘痛經驗後,係我未將佢掉落垃圾桶前,唔訓氣再檢討失敗原因,同上網睇其他網友心得,哈哈!終於俾我征服佢啦,又唔駛將佢拋棄,真係開心lu...

我專登買咗張矽膠墊,因為上次我覺得餅底燶啲,size點解有大有細呢?原因同壓下去嘅力道有關,壓輕啲會細塊,壓大力啲就會大塊,今次係試驗性質,所以我無再做過,祇要下次知道點做就得囉.

呢個係焗好後個樣,我覺得好過上次,都好鬆化,我都食咗3-4塊,下次應該可以再做得好啲,Yeah

蛋糕課程-第八堂_歌劇院蛋糕(Opera Cake)

今日好開心呀,因為終於學到Opera Cake啦,我報呢個蛋糕課程,主要就係想學呢個蛋糕,但係材料比較多&價錢較貴,而且功夫亦多,

首先當然要做餅底先,佢唔係普通海綿蛋糕,係加咗杏仁粉,用分蛋法打起.

坐溶朱古力,加奶&忌廉打起至杰身

跟住打起咖啡奶油,都要用好多時間先至打得軟滑和顏色變淡

仲要煮咖啡糖水,無影相

終於可以砌餅,最底層係蛋糕,跟住相隔朱古力餡,又蛋糕,再鋪咖啡奶油,如是者共9層

最後一層係咖啡奶油,放入雪櫃雪硬身

將雪硬蛋糕攞出再淋上坐溶朱古力液

唧上音樂符號就大功告成,係咪好想食呢?

切開後可以見到入面相間嘅內容,試食後發覺味道濃郁,有朱古力味同埋強烈嘅咖啡味,兩種味道並存,無被對方蓋過,但因為有咖啡,所以祗適合成年人食.

回歸傳統焗麵包

經過幾個禮拜不停測試麵包機焗麵包,成日食方包,已經開始厭倦,今日攞番個焗爐出來,焗番麵包,包底係用北海道土司(中種)食譜. 我做咗兩款麵包.

一款用新買花型麵包模整入面係吉士餡

焗嘅時候要用另一個焗盤壓住,令包成型.

焗完出爐啦,但未完全頂角成花型,下次要加大10g粉團,或者再發耐些少時間.

另一盤係蟲蟲型蕃薯包,蕃薯餡係用BBQ食剩嘅煨蕃薯加姜汁,黃糖搓成

睇吓出爐啦,個樣都幾好.

印尼糯米雞卷

好耐以前我有位同事係印尼華僑,係佢教識我食印尼菜,我特別鍾意食印尼點心&糕點,呢幾年開咗好多東南亞食品商店,乜野材料同調味料都有得買,我決定自己整糯米雞卷好過幫襯村口印尼商店要$5元一件,但功夫比較多.

首先要將急凍雞脾或雞胸肉蒸熟,然後用手撕成雞絲,用胡椒粉&鹽撈勻,食譜話用石粟子,我無買到.

再用乾蔥&蒜蓉爆香,加入荽茜粉,小茴粉,南薑粉,沙薑粉,椰糖,&椰汁煮至汁收乾攤凍

糯米浸水3個鐘後,用椰汁撈勻,加入香芧隔水蒸熟,我唔記得買香芧.

飯蒸熟後趁熱包入雞絲,用香蕉葉卷起,我搵唔到香蕉葉,用保鮮紙卷起定型,食完後覺得有7-8分相似,下次要加多啲椰汁蒸飯,今次飯比較硬難包,記得要買香芧,增加香味,我唸起碼會有9分相似.

好嘢以後又多樣野做晏晝,我食咗兩舊已經好飽

唔駛$10晏晝&咖哩雞

今日為自己整咗一個唔駛$10嘅晏晝,就係好簡單嘅香蔥芽菜炒麵啦.

材料有X桃牌嘅乾炒麵餅一個,一盒裏面共有5個麵餅(約$7-8),用滾水焗約10分鐘,過冷河攤乾,跟住買咗$3芽菜(祗用咗一半),加埋幾條蔥,

我用煲仔飯鼓油調味,貪佢無咁咸又上色,睇吓芽菜勁多,最後食之前落啲麻油就更好味啦,係咪又平又好食呢?同係出面街買個啲又無料麵又硬爭好遠.

食完就跟住開工,準備炆咖哩雞,所有材料大灑冷

首先要將乾蔥,蒜蓉,咖喱醬&沙爹醬爆香,跟住落洋蔥,檸檬葉,之後落紅蘿蔔,加水炆一陣先,因為紅蘿蔔比較硬,再落薯仔,我無將薯仔走油,因為怕肥膩,我係批皮切塊後,用清水洗咗表面嘅澱粉,再浸&換水2-3次,令佢爽身,所以煮一陣就淋,最後加埋雞塊,約炆多10分鐘,加調味,熄火再加椰汁&奶,炒勻就OK.