再戰豉油雞

今日奄尖大少放假,佢要求我買隻新鮮活雞俾佢親自操刀浸製,佢認為自己人食唔需要原隻浸,又要將雞翻來翻去咁麻煩,所以佢將雞對胸斬開兩邊,然後放入豉油雞汁中浸.

當豉油雞汁中一滾起,即熄火用瓦碟壓住,唔俾隻雞浮起約20分鐘就浸熟啦.

攤凍斬件就可以開餐,食後雞發覺脾部份非常嫩滑,但雞胸就比較鞋咗啲,我覺得佢呢個方法都幾好,但應該將雞胸向上,而雞脾/翼就向下浸,咁隻雞就應該成隻都咁嫩滑啦.

甜品蛋糕技巧班-第一堂-香蕉朱古力批

今日又開始上新課程,主要都係焗蛋糕&甜品,第一堂教嘅呢款係香蕉朱古力批,係比較簡單嘅一種甜批.

首先當然係要搓批皮,因為係朱古力批,所以批皮加咗無糖可可粉落去搓

批皮碌薄入模後要叉洞先好放入焗爐焗,否則批底會漲起.

Miss同場教埋我哋用撻殼焗,呢兩個就係我自已整嘅撻皮,但原來搓得撻邊靚唔容易,要有技巧,Miss示範咗好多次,我哋先搓得比較好啲.

跟住用牛油,朱古力坐溶後,加入淡忌廉同蛋液成為朱古力餡漿

切香蕉成粒狀或片狀入撻模或批模底層

跟住注入朱古力漿,再將泡消去,就可以入焗爐焗

焗好出爐啦,而家見到個面漲起,其實凍咗之後,就會下陷啲,變番平實.

除咗一人有兩個撻攞走外,仲可以當堂每人有一件試食,都幾好味,一啲都唔覺甜,但其實係陷阱,因為我哋知道朱古力漿入面加咗唔少牛油,但最慘食落一啲都感覺唔到,所以呢...真係唔好食咁多蛋糕或甜品呀!

唔駛用叮叮薯片機自製健康薯片

今朝去開超級市場,順便買咗一個薯仔&兩個細嘅紫心蕃薯,準備用微波爐來叮薯片&蕃薯片,雖然好多網友話個部薯片機好用,但我又唔多鍾意食薯片,所以用咗以下呢個方法叮,都一樣掂喎.

材料有薯仔同埋紫心蕃薯,工具就係呢部食物處理機,刀片要換上片皮功能,之後洗乾淨薯仔&蕃薯,批皮後,原隻放入中間個煙囪中間,開掣唔駛30秒就會自動將薯仔&蕃薯批成薄片狀

跟住用竹籤串起一塊塊薯片,用玻璃兜盛住,一齊放入微波爐叮,玻璃兜主要係"long"起一串串薯片.

呢度係一個薯仔嘅份量,不過呢個係反面教材,因為叮咗5分鐘後,有啲薯片軟身後就黏埋前面個塊,要用手逐塊分開,所以應該唔好太貪心,串咁密咁多,要有啲距離,盡量唔好俾佢黏埋一齊.

我係用高火(1000度)去叮約8-9分鐘,就聞到好香薯仔味,由竹籤剝佢落來,攤凍就食得lu...

另外又叮咗蕃薯片,祗係用咗5分鐘.

食後發覺唔係所有薯片都咁脆,同街出面買嘅炸薯片好唔同,祗係一半半咋,有啲比較煙un,但若果再叮就會燶變深啡色會苦,至於蕃薯片就超硬,唔好食,佢哋個買點主要係無油健康而已,對於鍾意食零食又怕肥嘅人,都可以講係望梅止渴嘅.

蒸荀尖蝦餃

今日無乜特別野要做,又唔想去街,去街市買野煲湯時,順便買咗一斤急凍海蝦,番來溫故知新包蝦餃,對上一次,由於皮太厚,唔得通透,睇吓今次改良後會變成點?

蝦餃餡有出過水嘅荀粒,剝殼索乾水蝦仁同埋蛋白

將蝦仁切粒加鹽,胡椒粉搓至起膠,再加入荀粒,麻油&蛋白攪勻,放入雪櫃雪凍待用.

將滾水撞入澄麵粉&生粉中,焗一陣,再將餘下嘅生粉倒入其中,加冷水搓勻成軟滑粉團,再搓成數條圓長形狀,切約10g重一粒,用已搽上油嘅拍皮刀(兩邊刀鋒都未開嘅刀,係上海街有得買),壓薄成圓形粉皮,睇吓我初期壓到幾肉酸,又厚薄唔均勻.

跟住中期就比較似樣.

到咗後期就漸入佳境,睇吓已經好圓,同埋厚薄均勻.

包好就可以蒸啦,正宗摺法應該要有8摺,但以我啲3腳貓功夫梗係無啦,形狀更加參差不齊.

第一籠因為唔記得時間,蒸耐咗,啲皮淋哂

第二籠記得蒸5分鐘就夠啦,當堂無咁樣衰,似番啲樣

攤凍後仍然好通透,至於食味就無酒樓嗰啲咁多汁,因為我無落肥豬肉粒,我寧願揀無咁好食,好過唔健康囉.

坦白講拍皮同包餡真係難度幾高,需要多多練習先會包得靚.

雙色方包

我見係日本麵包網站,登咗呢個雙色包食譜,見都幾好,況且我又未整過雙色包,所以今日試吓焗.

首先用綠茶粉&紅蘿蔔汁分別搓咗兩舊粉團,原著係用菠菜葉攪爛搾汁,我嫌麻煩,所以改咗用綠茶粉.

同平常一樣,經過第1&2次發酵,放氣後,將麵團各分成3份,再搓成長條形

相間地放入麵包模中作最後發酵

發到8-9成滿,就可以放入焗爐焗

呢兩個就係焗完之後嘅側&正面

原本係相同份量麵粉,但發完後唔知點解紅蘿蔔個邊比較多,而綠茶個邊好似無咁發,應該係格仔樣,但而家變成唔知乜樣,但幸好食落都好軟熟無乜差別,祗係形狀唔得靚仔.

手痕又買書

今朝去街市買餸,經過書店,就行入去睇吓,見到所有烹飪書籍全部八折,以我意志力咁薄弱嘅人,梗係出事啦,結果....又買咗以下呢3本書,基本上海綿蛋糕我已經識焗,不過好奇睇吓書點寫,至於冰淇淋就留番出年夏天先試囉,做餅乾就對我非常有用,因為到而家我仲未掌握得好.

Boxing Day-焗蕃薯

今日繼續係屋企無所事事,下晝奄尖大少唸起之前買咗蕃薯,又唔想蒸咁悶,靈機一觸,不如用焗爐焗好似街邊煨蕃薯咁食,二話不說,即刻搬出焗爐.

將兩舊大蕃薯放入去開爐焗,呢個時候已經焗咗45分鐘左右,睇吓出面細個條已經開始流糖汁啦.

再焗多20分鐘度,攞咗條細嘅出來切開,雖然已經熟透,但未起糖心,食落口唔係好甜同唔juicy,所以由得大個條繼續再焗多45分鐘.

好啦,大個條終於出爐啦,表面明顯比較收咗水份同燶啲

切開之後,見到皮肉分離,食落肉質非常淋滑,好juicy,同係街買嘅無乜分別,哈哈,咁又攪掂咗一餐lu...

聖誕再戰雪芳蛋糕

繼上次失敗嘅斑蘭椰汁雪芳蛋糕後,今日下晝無無聊聊,又再試吓焗雪芳蛋糕,今次係檸檬雪芳,吸取上次失敗教訓後,知道我個焗爐溫度較高,所以今次降低爐溫20度先將蛋糕糊入爐,當焗咗10分鐘後,更將爐溫降低多20度,又用錫紙遮面,增加焗時間多10分鐘,結果就係..

睇吓呢幅相都知成功咗啦,好開心呀!

攤凍甩模後都無下陷,不過唔記得將表面燶嘅痕跡剷走,否則就可以完美啲.

呢個係蛋糕內部,好有彈性,同上次好唔同,比較乾身,我俾咗一舊奄尖大少食,佢無彈成舊食哂落肚,我自己就一口氣食咗半個,因為知道無乜油,同埋我又減咗糖,所以又唔太甜,最重要係終於有番啲自信心啦

中式蛋黃蓮蓉包

今日雖然好忙碌要準備聖誕大餐，但仍然抽空蒸咗蛋黃蓮蓉包，因為之前學人炒蓮蓉，攪到舊蓮蓉餡又硬又起哂砂，差啲要餵垃圾桶，但唔訓氣第二日再攞番佢出來，加水慢慢再將佢煮開，最後加埋粟粉打獻，估唔到竟然可以起死回生，攤凍後雪到今日都仲非常軟熟同滑溜。

講番呢個蒸包，首先將中筋粉加糖，依士，梳打粉，少量菜油同奶水攪勻，搓至光滑，成為麵團，再靜至少半個鐘以上。

等待麵團發酵時，將蓮蓉餡包入半隻蛋黃（已用燒酒蒸熟）

發酵後分割麵團，搓成圓形，拍扁成中間厚側邊薄嘅麵皮，包入蛋黃蓮蓉餡，收口向下，包紙墊底，放入蒸籠作最後發酵，坐在鑊中暖水約２０分鐘。

跟住開爐火（猛火）蒸約１０分鐘，再熄火焗１０分鐘，就可以將包攞出攤凍食。

蒸完之後變咗蓮蓉大包，右下角嗰個包，我用麻油掃面加蔥，捲成饅頭。

切開後試食，包皮幾煙ＵＮ，發得唔錯，餡唔太甜適中，仍然好軟滑，都叫做有番啲安慰。